Read Yimchungru Naga Rom 13 Bible Online

Rom 13 - Yimchungru Naga bible

Rom 13

¹Mihtsürü abannü thiyukhümsühmüh khüp laang. Tümütüsho Thrünpuhnü amülüjihkhi kheak hode thiyukhüm-sühmüh püpü müla, tüsho sherü lanü Thrünpuhnü amokhitkhi lah.

²Jumonü shepünü thiyukhüm-sühmühbo azhihchonü Thrünpuhnü amokhitkhi azhihchoh, tüsho shepünü azhihchonü nihbuh kheak mahkhap hande arübah.

³Tümüde yakzanshuhrübo ju atsü rhimorü ki mihtrebe yung tüshe amütsürü ki ah. Shepü thiyukhümsühmüh lanü nünü api ki mütrebea de? Junangde nünü tümü atsüanü rhimoang, tüsho apinü nü shijihbah,

⁴tümüde api ju nü tsüpü thsungkheak Thrünpuh yamlarü ah. Tüshe nünü amülim rhimosho, trede laang, tümüde apinü nukshang ju akeangkeang ching mühanchoh; api ju amülim rhimorü kheak bukakhiuk rhimopü Thrünpuh yamlarü ah.

⁵Jumonü nüsanü Thrünpuh bukakhiukpü thsungkheak lang yung tüshe lümzülümdo thsungkheak she thiyukhüm-sühmüh khüp laang.

⁶Hamonü nüsanü rukbo jihchoh, tümüde thiyukhüm-sühmüh larü ju ha rhimode Thrünpuh tankihrübo ah.

⁷Ajihpü larü alala ki jihang, rukbo jihpü larü ki jihang, ashakpü larü ki shakang, akin tüsho wüntre jihpü larü ki jihang.

⁸Khülangnü khülang ki muzhoachihpü kheak hode she ki she azüng düzo; tümüde shepünü nihbuh yamhingrü muzhochonü yakzan mihyuanido.

⁹Thiyuzüngbo, “Nünü müzammüram düthsü, nünü dülaksah, nünü dahüh, nünü yihnelune düla,” tüsho thiyuzüng püpü tharüpkhi ju, “Nünü nihbuh nangde nü yamhingrü muzhoang.”

¹⁰Amuzhonü yamhingrü ki amülim müthsüchoh; jumonü amuzho ju yakzan mihyuanikhi ah.

¹¹Ha kheak khiode ha kim tümü a, kheakü künangde ayapkhi chingnü asürüpü kim khiuka lanü nünü mükheahlah, tümüde akhümkhit ju isanü atan kinkhi kheaknü athüninbe lah;

¹²azhing tsodo, animung thünina lah. Jumonü isanü azhing rhimobo tukloanü tüsho ayin zülu yihanü;

¹³isanü animung lakhi nangde rhimoanü — kushimkhi yungsho amüshangkhi, müzammüram yungsho mümüsühkhi, rukachihkhi yungsho mükthsükhi yung.

¹⁴Tüshe Atungpuh Jisu Khrista zülu yihang, tüsho akünkhi reangkeamshihpü shih-yakli lim mulong düjih.