Read Yimchungru Naga Rom 14 Bible Online

Rom 14 - Yimchungru Naga bible

Rom 14

¹Akin ching reangmüzahkhi mihtsürü leangkhiang, tüshe lümkhi atsangachihpü thsungkheak yung.

²Khürü a tümütümü she atsühpü akin lah, tüshe akin ching reangmüzahkhi mihtsürünü wokephüyak lang tsühchoh.

³Shepünü tsühchonü amütsühbuh mükhemükim düthsü, tüsho shepünü mütsühnü atsühbuh kheak mahkhap düla; tümüde Thrünpuhnü api leangkhido.

⁴Khürü yamlarü mahkhappü nü she a? Anihbuh putungrü ki api zhipchoh yungsho lungchoh. Tüsho api bemusubah, tümüde aputungrünü api zhipshihpü kuklah.

⁵Mihtsürü khülangnü nimung khülang ju püpü nimungbo kheaknü adungto, püpürünü nimungbo alala rukhüh ah de lümchoh. Mihbüm abannü nihbuh lümkhi adüngakhi labeah.

⁶Shepünü nimung leangkhichonü, Atungpuh wüntrekhi chingnü leangkhichoh. Shepünü tsühchonü Atungpuh wüntrekhi chingnü tsühchoh, tümütüsho apinü Thrünpuh kilim makshe jihchoh; shepünü mütsühnü Atungpuh wüntrekhi chingnü mütsühchoh tüsho Thrünpuh kilim makshe jihchoh.

⁷Isa shenü she nihbuh thsungkheak lang mülachoh tüsho isa shenü she nihbuh thsungkheak lang müshechoh.

⁸Isa lasho, isa Atungpuh thsungkheak lachoh; tüsho isa shesho Atungpuh thsungkheak shechoh. Jumonü isa lala she yungsho sheshe she, isa ju Atungpuh yo ah.

⁹Tümütüsho api ju asherü tüsho arhang larü chido yo Atungpuh thsüpü thsüde Khrista she tüsho arhang kamlo.

¹⁰Tümüde nünü nü keoniorü thiyukhapcho le? Yungsho tümüde nünü nü keoniorü khenocho le? Tümütüsho isa alala Thrünpuh thiyukhappung miki zhipbah;

¹¹tümüde ha thrüta lah, “I lale, Atungpuhnü thachoh, mihbüm abannü I ki khukningbah, mihbüm abannü I Thrünpuh ah de alokhibah.”

¹²Jumonü isa abannü nihbuh dünkheak Thrünpuh kilim jihbah.

¹³Jumonü isanü khülangnü khülang thiyumükhapnü, tüshe keoniorü limro ching küyimkishe jingmükhebe yungsho limkhudo muzopü pungkhianü.

¹⁴Tümü she amüsüh müla de Atungpuh Jisu hode inü mükheahlah; tüshe mümüsüh de alümrü thsungkheaknü ju mümüsüh.

¹⁵Nünü atsühkhinü nü keoniorü yurisho, kheaküa nü amuzho ching mütsahchoh. Nünü atsühkhi junü shepü dünkheak Khrista shekheanü api düyurishih.

¹⁶Jumonü nü tsükhi ju amütsü ah de düthashih.

¹⁷Tümüde Thrünpuh kiulongthsü ju jim tüsho ayungbe yung tüshe Amüsüh Me ching thiyuro-lungki, mungtsü tüsho asühachihkhi lah;

¹⁸shepünü hanangde Khrista tankihchonü Thrünpuh kilim aleangkhikhukbe tüsho mihtsürünü am de thachoh.

¹⁹Tümünü mungtsü thsücho tüsho bekihchonü isanü yananü.

²⁰Tsühyungbe dünkheaknü Thrünpuh rhimo düthsümünim. Lüpdükhi amüsüh ah tüshe apinü atsühkhinü püpürü angakshihkhi ju amülim ah;

²¹nü keoniorü jingmükhepü thsüde shih tsühpü, yukhu yungpü yungsho, tümükhüh rhimopü dükdü yung.

²²Nü akin lakhi ju nü le Thrünpuh dükeak zoang; apinü am de alümkhi ching nihbuh küdah thsüde mübahyukrü asühpü.

²³Tüshe shepünü dukiuhlode tsühchonü abahyukkhi lah, tümütüsho apinü atsühkhi ju akin hode yung; tüsho lüpdükhi akin hode marükhi ju neak ah.