Read Yimchungru Naga Rom 3 Bible Online

Rom 3 - Yimchungru Naga bible

Rom 3

¹Dale tüsho Jihudarü alü tümü la? Yungsho tsütabahkhi alü tümü la?

²Limro aban ching hihde lah. Akhuhde, Jihudarü ju Thrünpuh müchityu bede thiyia lah.

³Khürünü akin mülamo tümü la? Arü akin mülakhinü Thrünpuh thiyuro lakhi amülim kamshihcho de?

⁴Jude yung! Ha thrüta lakhi nangde mihtsürü aban arükchih lalashe Thrünpuh a thiyuro lashang, “Nünü athachoki nü alim huhbah tüsho nü mahkhapchoki akuk ngübah.”

⁵Tüshe isa mihbukmuyukkhinü Thrünpuh thiyuro huhpü thsüsho, isanü tümü thaba? Apinü isa thsümüchichoki Thrünpuhnü amülim thsüchoh de isanü athakhukba de? (Inü mihtsürü ayannü thachoh.)

⁶Jude yung! Jude thsüsho, Thrünpuhnü küde alomiküp mahkhapkhukpü?

⁷Tüshe I arükchih hode api müretah alü kamshihsho, tümü thsükhi kheakü khiungde I aneakrü nangde bahyuka la le?

⁸Dale tüsho, “Atsü arüpü thsungkheak isanü amütsü rhimoanü” de isanü tümüde müthapü? Mihtsürü khürünü hadürü thade I mükhemükimdo! Arü thülünde abahyukbah.

⁹Dale tüsho isa ju arü kheaknü atsübea shi? Jude yung. Tümüde isanü akhuhlim Jihudarü le Greekrü chido neak bukkhüp lah de thado.

¹⁰Ha thrüta lah: “She thiyuro-lungki müla, sheshe müla;

¹¹Shenü she manikhit, shenü Thrünpuh müyim.

¹²Alala rholode tsodo, arü rukhühnü amülim thrip tsodo; Shenü she atsü mürhimo, sheshe müla.

¹³Arü thrukeang ju akhimshuhkhi kiuyuk ah, arü mulonü mülapyukchoh. Arü münküpbo khüp phuruto müzüm lah.

¹⁴Arü mün athruajibo tüsho akhühnü milah.

¹⁵Thiyih bukpü arü jing athrilah,

¹⁶arü limro ching athsümünim tüsho thsümütsü lah,

¹⁷tüsho arünü mungtsü limro mümükheah.

¹⁸Thrünpuh trekhi arü mük ki müla.”

¹⁹Kheakü tümüpürü yakzannü thachonü yakzan bukkhüp larü ki thachoh de isanü mükheahlah, junangde mihbüm aban mün tuklobah, tüsho alomiküp athrünkhi Thrünpuh mahkhapkhi khüp lah.

²⁰Tümüde mihtsürü sheshe yakzan rhimokhinü api miki alim müthsü, tümütüsho yakzan hode neak mükheahkhi arüchoh.

²¹Tüshe kheakü yakzan tüsho wukihrübonü thiyumütsan thsüa lalashe, Thrünpuh thiyuro-lungki ju yakzan kheaknü büthsüde akhiukdo.

²²Ha thiyuro-lungki ju Jisu Khrista ching akin hode akinrü alala kilim Thrünpuh kilimnü arüchoh. Ju ching büthsüde tümü müla,

²³tümütüsho alalanü neak yihbeakdo tüsho Thrünpuh müretahpü thamaa lah,

²⁴tüshe Jisu Khrista hode arükhi api amüthsüm hode akeangnü alim kamshih.

²⁵Thrünpuhnü akin hode thiyihnü dünthsükhishihpü, api thiyuro-lungki huhpü arüshih, tümütüsho akhuhlim yihbeakkhi neakbo api arümkheamkhinü Thrünpuhnü khenoabahjih —

²⁶apinü ju kheakü kim ching api thiyuro-lungki huhpü thsü, junangde api alungki tüsho Jisu kheak akin larü alim-kamshihrü thsübah.

²⁷Dale tüsho isa lülüshishikhi tümü kamcho? Tümü müla! Ha thsungkheak amütsan tümü a? Isanü yakzan animonüa shi? Yung, tüshe isanü akinkhinü ah.

²⁸Tümütüsho yakzan rhimokhinü yungde akin hode mihtsürü alim mütsanchoh de isanü athazhak thsüchoh.

²⁹Yungsho Thrünpuh ju Jihudarü Thrünpuh lang a de? Api ju khiungkerü Thrünpuh she yung de? Am, khiungkerü thsungkheak she ah,

³⁰tümütüsho Thrünpuh ju khülang ah; tüsho apinü tsütabahkhi tüsho tsütamübahkhi arü akin hode alim mütsanjihbah.

³¹Dale tüsho ha akin hode yakzan isanü bahkhicho de? Jude yung! Judübüdün a, isanü yakzan shuhchoh.