Read Yimchungru Naga Rom 5 Bible Online

Rom 5 - Yimchungru Naga bible

Rom 5

¹Jumonü akin hode alim kamshihkhinü isa Tungpuh Jisu Khrista hode Thrünpuh lung isa mungtsü lah.

²Akin hode apinü kheakü isa zhipde alakhi amüthsüm ching isa bedarü. Tüsho Thrünpuh müretah mulonglam ching isa asühachihchoh.

³Ju lang yung, thsünükhinü arümkheam akhiukchoh de mükheahbah isanü isa thsünükhi ching asühachihchoh,

⁴arümkheamkhinü yakliyakko akhiukchoh, tüsho yakliyakkonü mulonglam akhiukchoh,

⁵tüsho mulonglamnü isa müshangmangshih, tümütüsho isa kilim jihkhi Amüsüh Me hode Thrünpuh amuzho isa mulong ching yüzahshih.

⁶Isa yiuhyiuhde alachoki, kim dükdü ching amükinrü thsungkheak Khrista she.

⁷Tümütüsho khürünü thiyuro-lungki mihtsürü thsungkheak shepü achakato ah; judüalalashe khürünü mihtsürü atsü thsungkheak shepü mürangpü kuklah.

⁸Tüshe isa aneakrü lachoki isa thsungkheak Khrista shekhinü Thrünpuhnü isa thsungkheak api muzho huh.

⁹Jumonü kheaküa api thiyih hode isa alim kamshih, alü thsüde Thrünpuh bukakhiukkhi chingnü apinü isa khümkhitbah.

¹⁰Tümütüsho thiriri lachoki api tsührü shekhinü Thrünpuh kheak isa tsüarihshih-a lasho, alü thsüde kheakü tsüarih-a lale, api rhangdungnü isa khümkhitbah.

¹¹Ju lang yung, tüshe shepü hode kheakü isa tsüarihkhi leangkhia la, isa Atungpuh Jisu Khrista hode Thrünpuh lung she isa asühachihchoh.

¹²Jumonü mihtsürü khülang hode alomi ching neak tüsho neak hode ashepü arükhi nangde, mihtsürü alalanü neak yihbeakkhi nangde ashepü ju mihtsürü alala kheak bu.

¹³Yakzan müjihyide neak ju alomi ching lakheah, tüshe yakzan mülapung ching a neak ju mükhe.

¹⁴Tütüshe Adam kheaknü Mosa khiungde, Adamnü Thrünpuh yukhüm manide arhimochoki nangde neak müyihbeakrü mihtsürü alala kurungkheak she yakzan shuh.

¹⁵Tüshe akeang thsambah ju alakmihkhi nangde yung. Tümütüsho mihtsürü khülangnü alakmihkhi hode ahihdo shekheasho, mihtsürü khülang Jisu khrista amüthsüm ching ahihdo thsungkheak Thrünpuh amüthsüm tüsho akeang thsambah lah.

¹⁶Tüsho akeang thsambah ju mihtsürü khülang neaknü adünjishihkhi nangde yung, tümüde khülangnü alakmihkhi mahkhapnü abahyukkhi hande arü, tüshe ahihdo lakmihkhi dunglim akeang thsambahnü alim mütsanjihkhi hande arüchoh.

¹⁷Tümüde mihtsürü khülangnü alakmihkhi hode ashepünü yakzan shuhchosho, mihtsürü khülang Jisu Khrista hode Thrünpuh amüthsüm suhdahde tüsho rhangdung ching thiyuro-lungki thsambah leangkhipü larü küdükhüh she alaba.

¹⁸Junangde khülangnü alakmihkhinü mihtsürü alala thsungkheak abahyukkhi nangde, khülangnü thiyuro-lungki rhimokhi hode mihtsürü alala thsungkheak rhangdung handarükhi alim mütsanjihchoh.

¹⁹Tümüde mihtsürü khülang mihyumanikhinü ahihdo aneakrü kamshih, junangde mihtsürü khülang mihyuanikhinü ahihdo thiyuro-lungki kamshihbah.

²⁰Alakmihkhi alü kamshihpü yakzan arü, tüshe küching neak alü kamchonü mihmüthsüm alü kamchoh,

²¹junangde neaknü ashekhi ching yakzan shuhkhi ruk, isa Atungpuh Jisu Khrista hode mihmüthsümnü lün rhangdung lim thiyuro-lungki yande yakzan shuhbah.