Read Yimchungru Naga Rom 6 Bible Online

Rom 6 - Yimchungru Naga bible

Rom 6

¹Dale tüsho isanü tümü thaba? Mihmüthsüm suhdahpü thsüde isanü neak ching mutuklode alabea shi?

²Jude yung! Isanü küde thsah neak ching shebah judü lang rhangdung lakhukpü?

³Isa alala Jisu Khrista ching baptirü ju api shekhi ching baptikheah de nüsanü mümükheah de?

⁴Jumonü ashekhi ching baptikhinü isa api lung kiuyukabah, junangde Abuh müretahkhi hode Khrista ashe chingnü asürüshihkhi ruk isa she rhangdung aso ching tsahbeah.

⁵Tümüde isanü api nangde ashekhi ching api lung arihkhülaa, atsütsü api nangde arhang kamlokhi ching api lung arihbah.

⁶Isa awün api lung yümkihdo de isanü mükheahlah, junangde neak lakhi pang thsümünimbah tüsho kheaküa isa ju neak azhorü müthsü.

⁷Tümüde shepü shedünü neak chingnü zuzu kamdo.

⁸Tüshe isa ju Khrista lung shekhülaa, isa she api lung labah de isanü kinchoh.

⁹Tümüde Khrista ashe chingnü asürükhi küyimkishe müshelo de isanü mükheahlah; kheakü ashenü api kurungkheak yakzan mushuh.

¹⁰Api shekhi ju neak ching khülang ki shedo, tüshe api rhangdung lakhi ju Thrünpuh kilim lah.

¹¹Jumonü nüsa she neak ching shebah Jisu Khrista ching Thrünpuh kilim lakhi lümang.

¹²Jumonü shihkünkhi ching nünü mihyuanipü thsüde ashepü lakhi nü pang ching neaknü yakzan düshuhshih.

¹³Nü pang shihchambo ju mihbukmuyuk rhimopü neak kilim düjih, tüshe ashe chingnü arhang kamlokhi mihtsürü nangde tüsho nü pang shihchambo thiyurolungki rhimopü Thrünpuh kilim jihang.

¹⁴Tümüde neaknü nü kurungkheak yakzan mushuh, tümütüsho nü yakzan khüp müla tüshe mihmüthsüm khüp lah.

¹⁵Dale tüsho tümü a? Isa yakzan khüp müla tüshe mihmüthsüm khüp lamonü isanü neak yihbeakba shi? Jude yung!

¹⁶Nünü ashe lim bekhi neak yungsho thiyuro-lungki lim bekhi mihyuanikhi, küpü ki mihyuanibanü ju azhorü kamchoh de mümükheah de?

¹⁷Tüshe nüsa khülangki neak azhorü thsübah nüsanü akinkhi thsangyukhi ching mulong shuhmülanga jihde mihyuanide akamkhi Thrünpuh ki makshe jihang,

¹⁸tüsho neak chingnü zuzu kambah thiyuro-lungki azhorü kamdo.

¹⁹Nüsa yakli mukhiukdahkhinü inü mihtsürü lalim yande thachoh. Khülangki nüsa pang shihcham mütsangkhitkhi tüsho amülim atobe lim jihkhi nangde kheakü nüsanü atsangkhitpü thsungkheak thiyuro-lungki lim jihang.

²⁰Küyimki nüsa neak azhorübo lakhea, thiyuro-lungki chingnü nüsa zuzu lakheah.

²¹Dale tüsho kheakü nüsanü achihde alakhi rhimokhi chingnü nüsa tümü alü thsüde? Jurübo akheam ju ashekhi lah.

²²Tüshe kheakü nüsa neak chingnü zuzu kam tüsho Thrünpuh yo azhorü kam, ju müthri nüsanü atsangkhitkhi ngü tüsho akheam ju lün rhangdung lah.

²³Tümüde neak mihkhah ju ashekhi, tüshe Thrünpuh akeang thsambah ju Atungpuh Jisu Khrista ching lün rhangdung lah.