Read Yimchungru Naga Rom 7 Bible Online

Rom 7 - Yimchungru Naga bible

Rom 7

¹I keoniorübo, inü nüsa ki thapü lakhi tsükjide nüsanü anikhitbah, tümütüsho nüsa alalanü yakzan dünkheak mükheahlah. Arü la khiungde yakzannü mihtsürü kurungkheak yakzan shuhchoh.

²Junangde arhangkhi liberü ju api la khiungde aniubuh kilim yakzannü rhüka labah; tüshe api shesho, api kilim rhüka lakhi yakzan chingnü alibe zuzu kamchoh.

³Junangde aniubuh lachoki alibenü püpürü thrürü lung lasho alibe ju müzammüramrü de ajibah, tüshe aniubuh sheabahsho ju yakzan chingnü alibe zuzu labah, tüsho alibenü püpürü thrürü ki rhangrhang she alibe ju müzammüramrü yung.

⁴Junangde, I keoniorübo, Khrista pang hode nüsa yakzan ching she, jude athsükhinü isanü Thrünpuh thsungkheak aso asopü thsüde ashekhi chingnü asürübuh kilim nüsa khülangnü khülang yo labah.

⁵Küyimki isa shih ching lakheanü, yakzannü thurumusukhi neak ching asühbe isa pangbo ching rhimode la, junangde isanü ashepü aso asoshih.

⁶Tüshe kheakü isa rhüka lakhi ching shekhinü, yakzan chingnü zuzu kam, junangde thrüta lakhi awün ching yung tüshe Me aso ching isanü tankihchoh.

⁷Dale tüsho isanü tümü thaba? Yakzan ju neak a de? Jude yung! Tütüshe yakzan hode yungkhülaa inü neak mümükheah-a labah. Yakzannü, “Nünü düyihnelune,” de müthakhülaa inü mümükheahpü lakheah.

⁸Tüshe thiyuzüng hode neaknü I kheak yihnelune lakhi mungji alala lahkhitpü kim ngü. Tümüde yakzan kheaknü büthsüde neak ju ashekhi lah.

⁹Khülangki I yakzan chingnü chamkhibah rhangdung lakheah, tüshe küyimki thiyuzüng arükhea, neak ju arhang kamlo tüsho I sheabah;

¹⁰rhangdung handarüpü lakhi thiyuzüngnü atsütsü ashepü handarükhi inü ngü.

¹¹Tümüde neaknü thiyuzüng ching kim atsü ngüde I mülapyuk tüsho junü I laksah.

¹²Jumonü yakzan ju amüsüh tüsho thiyuzüng ju amüsüh, thiyuro ju atsü ah.

¹³Dale tüsho küpü atsüanü junü I kilim ashepü hande arükhea shi? Jude yung! Tümü atsüanü ju hode neaknü I kheak ashebe rhimo, junangde neak ju neak ah de tüsho thiyuzüng hode neak ju amütsübe neak de ahuhpü lakheah.

¹⁴Yakzan ju melim ah de isanü mükheahlah; tüshe I a neak khüp yinkhi me-mülakhi ah.

¹⁵Inü I rhimo manikhit. Tümüde inü akünkhi inü mürhimochoh, tüshe inü athraneankhi inü rhimochoh.

¹⁶Kheakü inü amükünkhi inü rhimosho, yakzan ju atsü ah de inü mulungchoh.

¹⁷Judüasho ju inü yungde I kheak lakhi neaknü rhimochoh.

¹⁸I kheak, I mih ching atsü tümü müla de inü mükheahlah. Inü alim rhimopü lümchoh, tüshe ju mürhimokhuk.

¹⁹Tümüde inü künde alakhi atsü inü mürhimochoh, tüshe inü rhimode alakhi ju inü amükünkhi amütsü ah.

²⁰Kheakü inü amükünkhi inü rhimosho, ju inü yungde I kheak lakhi neaknü rhimochoh.

²¹Jumonü inü alim rhimopü mulongchoki amütsü khah ki lakhi ju yakzan ah de inü ngüchoh.

²²Tümüde I pang alung chingnü Thrünpuh yakzan kheak inü asühchoh,

²³tüshe I lümkhi yakzan bede thirithsükhi I pang shihcham ching yakzan püpü inü ngüchoh tüsho I ju I pang shihcham ching lakhi neak aramrü kamshihchoh.

²⁴I a küdükhüh masühkhi mihtsürü a! Shepünü ha ashekhi pang chingnü I bekhitba?

²⁵Atungpuh Jisu Khrista hode Thrünpuh ki makshe jihang! Junangde, I lümkhinü a Thrünpuh yakzan tankihchoh, tüshe I shihnü a neak yakzan tankihchoh.