Read Yimchungru Naga Rom 9 Bible Online

Rom 9 - Yimchungru Naga bible

Rom 9

¹Khrista ching inü thiyuro thachoh, inü akeangyu mütha; Amüsüh Me ching I lümkhinü thiyumütsan jihchoh,

²junangde I mulong ching mulong rozhak ato tüsho mükheamkhi thsünü lah.

³Tümüde I keoniorü, I buhtsührü, I mihtsürü dünkheaknü I muthrumüneana tüsho Khrista kheaknü chamkhia lah de inü lüm.

⁴Arü ju tsührü kamkhi müretah, tangzüng, yakzan jihkhi, kingaün, tüsho alokhikhi lakhi ah;

⁵arü ju Ibri jipürübo kheaknü atrükkhitkhi; tüsho mihtsürü ayannü Khrista ju arü mihtsürü. Alala kurungkheak yakzanshuhrü Thrünpuh lünnü shishang! Amen.

⁶Tüshe ha Thrünpuh yu akuk müngükhi yung. Tümüde Israel kheaknü atrükkhitkhi alala Israelrü yung,

⁷tüsho api tsühsoniuso thsümonü alala Abraham tsührü yung; tüshe Isak hode nüsa tsühsoniusobo mung jibah.

⁸Ha amütsan ju Thrünpuh tsührübo a alomi shih tsührübo yung, tüshe alokhikhi tsührübo ju tsühsoniusobo khelah.

⁹Alokhikhinü athakhi ju ha lah, “Ha kim ching I arülobah tüsho Sara tsührü khülang labah.”

¹⁰Tüsho ju lang yung, tüshe küyimki mihtsürü khülang, isa jipürü Isak hode Rebeka tsührübo lakhea,

¹¹Thrünpuhnü amokhitkhi lümkhi mutukzhakde ayüpü thsüde arü müzübeyia lalashe tüsho atsü yungsho amütsü tümü mürhimoyia lalashe, rhimobo hode yung tüshe apinü ajikhinü,

¹²alibe ki tha, “Azopünü akheambuh tankihbah.”

¹³Ha thrüta lah, “Inü Jakob muzho, tüshe inü Esau thranean.”

¹⁴Dale tüsho isanü tümü thaba? Thrünpuh kilim jakkheahkhi la shi? Jude yung!

¹⁵Tümüde apinü Mosa ki tha, “Inü mihmüthsüm larü kheak mihmüthsüm labah, tüsho inü amuzho larü kheak amuzho labah.”

¹⁶Jumonü mihtsürü lümkhi tüsho mürangkhi kheak yung tüshe Thrünpuh mihmüthsüm kheak lah.

¹⁷Tümüde amüsühyunü Pharao ki thachoh, “Alomi alala ching I mung zhiyukshihpü thsüde nü kheak I wu huhpü inü nü asürüshih.”

¹⁸Junangde apinü amulongrü kheak mihmüthsüm lah, tüsho apinü amulongrü mulong müküpshihchoh.

¹⁹Tüshe nüsanü I ki thabah, “Tümüde apinü arükchih yimkhitcho? Shepünü api lümkhi reanglokhukla?”

²⁰Tüshe Thrünpuh ki alokhukpü thsüde mihtsürü khülang ju nüsa she a? Azünkhinü azünbuh ki, “Tümüde nünü I hade azünkhea?” de athaba de?

²¹Phühdamrünü alo neamkhi rukhühnü khülang adungto tüsho püpü ju yancho thsungkheak rhimopü alim müla de?

²²Tüsho Thrünpuhnü tümü rhimokheanü dükdü ah. Apinü api bukakhiukkhi tüsho api wu huhpü kün. Tüshe athsümünimpü lakhi api bukakhiukkhi kukruk kheak apinü khide arümkheam.

²³Tüsho apinü api müretah leangkhipü thsakhamkhi api mihmüthsüm kukruk ju apinü isa kheak dungkihkhi muzhomopungkhi api müretah akhiuka huhpü mulong.

²⁴Tümüde isa ju Jihudarü chingnü lang yungde khiungkerü chingnü she apinü ajikhi mihtsürübo ah.

²⁵Apinü Hosea ching thachoh, “Sherü I mihtsürü müthsükheanü inü ‘I mihtsürü,’ de ajibah tüsho inü mümuzhobe ki, ‘Inü amuzhobe,’ de ajibah.”

²⁶“Tüsho arü ki, ‘Nüsa I mihtsürü yung,’ de thakhi dangpung ching, ‘Arhang Thrünpuh tsührübo,’ de ajibah.”

²⁷Tüsho Isaianü Israel dünkheak zhi: “Israel tsührübo khekhi ju loyi nangde lalashe, arü aningkhi lang akhümkhitbah;

²⁸tümüde Atungpuhnü alomi kheak api rhimo niokheamde tüsho akheam thsüde arhimobah.”

²⁹Tüsho Isaianü müchit, “Wuto Atungpuhnü isa tsühsoniusobo maningshihkhülaa isa Sodom nangde kama labah tüsho Gomorra nangde alabah.”

³⁰Dale tüsho isanü tümü thaba? Junangde thiyuro-lungki mümüshamrü khiungkerünü akin hode thiyuro-lungki ngüdo;

³¹tüshe yakzan ching ningkihbah thiyurolungki müshamrü Israelnü yakzan dünjipü ching akuk müngü.

³²Tümü thsükhea? Tümütüsho arünü akin hode mümüsham, tüshe rhimo kheak ningkih. Jingmükhelung kheak arü jingmükhe,

³³ha thrüta lakhi nangde, “Kheahang, mihtsürübo jingmükhepü thsüde inü Zion ching lung khülang, arü keamshihbe lungto khülang zochoh; tüsho shepünü api kheak kinbanü achih müngüshih.”