Read Yimchungru Naga 1 Korint 13 Bible Online

1 Korint 13 - Yimchungru Naga bible

1 Korint 13

¹Inü mihtsürübo tüsho yunirü yuthabo chingnü thatha she, amuzho mülasho I ju yinchi kingkhi yungsho larüp kingachihkhi düsheak khülang ah.

²Tüsho müchitpü wubo, aramyu alala anikhitpü tüsho mükheahmudu alala lalashe tüsho awungbo lah-a bahpü I akin alala lalashe, amuzho mülasho I tümü müla.

³Inü I lakhi alala zhochihrü kilim jihabahbah she, tüsho I pang atakpü jihjih she, amuzho mülasho, I alü müla.

⁴Amuzho ju arümkheam tüsho lümrhihkhi; amuzho ju mükthsü yungsho lülüshishi yung;

⁵amuzho ju kükheangküyang, mükhütmüra yungsho phümüsüpbe yung; amuzhonü amülim muzochoh;

⁶amuzho ju amütsü ching asühkhi yung, tüshe thiyuro ching asühkhi lah.

⁷Amuzhonü alala arümkheamchoh, alala akin lachoh, alala mulonglamchoh, alala rünkhiungchoh.

⁸Amuzho küyimkishe mükheam; tümüde müchitkhibo hode tsoabahbah; thiyuthabo arün thsübah; mükheahmudu hode tsoabahbah.

⁹Tümüde isanü chama lang mükheahlah tüsho chama lang müchitchoh;

¹⁰Tüshe küyimki khiukdahkhi arübanü, mukhiukdahkhi ju hode tsoabahbah.

¹¹Küyimki I azürü lakhea, I yu thakhi, I anikhitkhi, I lümkhi azürü nangde alakheah, küyimki I azorü kamkheanü, inü azürü yaklibo bah.

¹²Tümüde kheakü isanü meayinpung ching thrimthrimde ngüchoh, tüshe judüki isanü mironü miro ngübah. Kheakü inü chama lang mükheahlah; judüki I mükheahrama lakhi nangde inü mükheahramde amükheahbah.

¹³Tüsho kheakü harü mahsam lah: akin, mulonglam tüsho amuzho; tüshe harü bolung atobe ju amuzho.