Read Yimchungru Naga 1 Korint 14 Bible Online

1 Korint 14 - Yimchungru Naga bible

1 Korint 14

¹Amuzho müshamang, tüsho me thsambahbo, adungto thsüde müchitpü künang.

²Tümüde shepünü thiyutha chingnü thachonü mihtsürü ki yung tüshe Thrünpuh ki thachoh; shenü api manikhit, tüshe Me ching aramyu thachoh.

³Tüshe shepünü müchityubo mihtsürübo ki thachonü arü shuhkihpü, mulong toyu tüsho mulong shukheampü lah.

⁴Shepünü thiyutha thachonü nihbuh runglochoh, tüshe shepünü müchitchonü borü düküngshihchoh.

⁵Kheakü inü nüsa alalanü thiyutha ching thashihnelah, tüshe alü müchitshihnelah. Athanakrü khürü labah borü düküngshihpü müthsüsho, shepünü müchitchonü thiyutha chingnü atharü kheaknü atobe ah.

⁶Keoniorübo, inü nüsa ki thiyutha chingnü thade arüsho, nüsa kilim amikheak akhiukkhi, mükheahmudu, müchitkhi, yungsho thsangyukhi khürü hande marüsho, inü küde thsah nüsa alü thsüjihpü?

⁷Rhangdung mülakhi kingzükingdobebo khungpi yungsho bingkhungnü düsheak mütsande müjihsho, tümü khungkheanü küde thsah khürünü amükheahba?

⁸Tüsho hulipungpungnü düsheak mütsande müjihsho, shepünü thirithsüpü thsakhamba?

⁹Junangde nüsa kheak lah; nüsanü manikhitbe yutha chingnü thasho, tümü thakheanü shepünü anikhitba? Tümüde nü ju apung ching thakhi labah.

¹⁰Alomi ching thiyutha büthsüthsü ahihdo lah, tüshe küju she amütsan müladüa müla;

¹¹tüshe inü thiyutha amütsan mümükheahsho I ju atharü ki khiungkerü thsübah tüsho atharü ju I ki khiungkerü thsübah.

¹²Junangde nüsa kheak lah; tümütüsho nüsanü me thsambahbo ngüpü künde lale, borü shuhkihpü thsüde thsambahbo ching tsüdakpü mürangang.

¹³Jumonü shepünü thiyutha thachonü athanakpü wu thsungkheak tamkhüntamnübeah.

¹⁴Tümütüsho inü thiyutha chingnü tamkhüntamnüsho, I menü tamkhüntamnüchoh tüshe I lümnü a tümü müla.

¹⁵Judüasho inü tümü thsüba? Inü menü tamkhüntamnübah tüsho lümnü she tamkhüntamnübah; inü menü khün thsübah tüsho lümnü she khün thsübah.

¹⁶Nünü menü Thrünpuh ki mungshi jihsho, manikhitrü bolung larünü nünü athakhi yu mümükheahle küde thsah nünü makshe jihkhi ching “Amen” de athaba?

¹⁷Tümütüsho nünü makshe tsüde jih-a lapü kuklah, tüshe mihtsürü püpürü a alü müthsü.

¹⁸Nüsa alala kheaknü alü inü thiyuthabo chingnü athakhi Thrünpuh ki makshe jihchoh;

¹⁹judüalalashe, püpürü thsangdanpü thsüde, inü borü ching thiyutha chingnü thiyu chithürü thürü kheaknü a I lümnü thiyu phüngü thabah.

²⁰Keoniorübo, nüsa lümzülümdo ching azürü düthsü, amütsü ching khungarü thsang, tüshe lümzülümdo ching azorü kamang.

²¹Yakzan ching thrüta lah, “Jakso mihtsürü tüsho khiungkerü yuthabo chingnü inü ha mihtsürü ki thabah, tütüshe arünü I ki manide alabah, Atungpuhnü thachoh.”

²²Hanangde thiyuthabo ju akinrübo thsungkheak amütsan yung tüshe amükinrübo thsungkheak ah; müchitkhi ju amükinrübo thsungkheak yung tüshe akinrübo thsungkheak ah.

²³Jumonü, borü abümnü mukhungbah alalanü thiyuthabo chingnü thasho, tüsho aleangkheakrü yungsho amükinrü azahsho, nüsa ju abünrü ah de arünü müthaba de?

²⁴Tüshe alalanü müchitde alachoki, amükinrü yungsho aleangkheakrü azahsho, alalanü api ju aneakrü ah de alümkihshihbah tüsho alalanü api yiuhkhapbah,

²⁵tüsho api mulong ching rama lakhi lahkhitbah; junangde apinü khukningde Thrünpuh kingaünbah tüsho Thrünpuh nüsa bolung lah de athabah.

²⁶Keoniorübo, dale tüsho tümü a? Küyimki nüsa rukhüh mukhungbanü, mihbüm aban khün, thsangdan yu, amikheak akhiukkhi, thiyutha yungsho athanakkhi lah. Harü alala borü düküngpü thsungkheak rhimobeah.

²⁷Khürünü thiyutha chingnü athapü thsüsho, mahne yungsho mahsamnü lang khindungachihde thashang, tüsho khülangnü thanakshang.

²⁸Tüshe athanakpü thsüde she mülasho, arü abannü arüngyam ching malande laang tüsho nihbuh ki le Thrünpuh ki thashang.

²⁹Wukihrü mahne yungsho mahsamnü thashang tüsho athakhi ju püpürünü mütsanmükhishang.

³⁰Binde alakhi khürü ki amikheak akhiukkhi rhimosho, akhuhbuh ju tukloshang.

³¹Tümüde nüsa alalanü khindungde müchitpü kukbah, junangde alalanü anikhitbah tüsho mulong toshihbah;

³²tüsho wukihrü mebo ju wukihrübonü adanyukkhi khüp labah.

³³Tümütüsho Thrünpuh ju neamneamruru yo yung tüshe mungtsü Thrünpuh ah. Amüsührü borübo alala ching,

³⁴borübo ching aliberübonü zhikde alabeah. Tümüde arünü athapü mümülü, tüshe yakzannü athakhi nangde arübo abukkhüp larü thsübeah.

³⁵Arünü tümükhüh mükheahpü künsho, thüyam ching arü niubuhrü ki keokhishang. Tümütüsho aliberü khülangnü arüngyam ching thapü ju achihbe lah.

³⁶Yungsho Thrünpuh yu nü kheaknü arükhea de, yungsho ju arükhi nü kheak lang a de?

³⁷Khürünü api wukihrü, yungsho me-larü ah de lümsho, inü nüsa kilim thrütkhi ju Atungpuh yukhüm ah de apinü amükheahbeah.

³⁸Khürünü ha amümürang thsüsho, api ju amümürang thsüabahang.

³⁹Jumonü keoniorübo, müchitpü künang, tüsho thiyuthabo chingnü athapü düzhipdo;

⁴⁰tüshe alala akhamazhamde tüsho akhinashunü arhimobeah.