Read Yimchungru Naga 1 Korint 15 Bible Online

1 Korint 15 - Yimchungru Naga bible

1 Korint 15

¹Keoniorübo, kheakü inü nüsa ki thsangyuthsangrabah leangkhi tüsho ju kheak nüsa akin düküngde azhipkhi thiyusheak-atsü lümkhitshihnelah.

²Inü nüsa ki thsangyuthsangrakhi yu nüsanü düküngde tholosho, ha thiyusheakatsü hode nüsa khümkhita lah. Jude yungsho, nüsanü akeangkeang ching kindo.

³Tümütüsho tümü inü leangkhikheanü akhuhbe adungto thsüde nüsa kilim jihdo, junangde amüsühyu yande isa neakbo dünkheak khrista shekheah,

⁴api kiuyuka bahbah amüsühyu yande asam nipü api arhang kamlo,

⁵tüsho api ju Kephas ki, jushu thürükheak mahne ki akhiuk.

⁶Jushu kim khülang chingnü keoniorü 500 akumung ki akhiuk, khürü sheabah-a lalashe ahihbe khihni khiungde lah.

⁷Jushu apinü Jakob ki, jushu amüsüh-thsangyurü alala ki akhiuk.

⁸Akheam thsüde kim münühkhühde azübekhi I ki she akhiuk.

⁹Tümüde I a amüsüh-thsangyurü bolung aninibe, amüsüh-thsangyurü de ajipü müthülün, tümütüsho inü Thrünpuh borü thsümüchikheah.

¹⁰Tüshe Thrünpuh amüthsüm hode tümü lanü I ah, tüsho I kilim api amüthsüm akeangkeang mülakheah. Tüshe arü kheaknü inü amürangbe rhimo, ju inü yung, tüshe I lung lakhi Thrünpuh amüthsümnü ah.

¹¹I yungsho arü thsüthsü, isanü thsangyuthsangra tüsho nüsanü kin.

¹²Kheakü Khrista ashe chingnü arhang kamlodo de thsangyuthsangrakheasho, küde thsah nüsa khürünü asherü arhang kamlokhi müla de thakhukla?

¹³Tüshe asherü arhang kamlokhi mülakhülaa, Khrista arang mükamloa labah;

¹⁴Khrista arhang mükamlokhülaa, isa thsangyuthsangra tüsho nüsa akin akeangkeang ah.

¹⁵Ju kheaknü alü isa ju Thrünpuh dünkheak arükchih thiyumütsan jihrübo thsübah, tümüde apinü Khrista ashe chingnü arhang kamloshih de Thrünpuh dünkheak isanü thiyumütsan thsü — tüshe asherü arhang mükamlokhülaa apinü anihbuh arhang mükamloshihde alabah.

¹⁶Tümütüsho asherü arhang mükamlochokhülaa, Khrista arhang mükamloa labah.

¹⁷Khrista arhang mükamlokhülaa, nüsa akin akeangkeang, tüsho kheakü khiungde nüsa neakbo ching labah.

¹⁸Judüasho sherü Khrista lung shedünü dükheakdo.

¹⁹Isanü ha rhangdung thsungkheak lang Khrista kheak mulonglam lakhülaa, mihtsürü alala kheaknü amuzhobe kuhi thsübah.

²⁰Tüshe atsütsü asherü she arhang kamlobah dükhi amütsan Khrista ashe chingnü arhang kamlodo.

²¹Tümüde mihtsürü khülang hode ashepü arükhi nangde mihtsürü khülang hode asherü arhang kamlopü she arü.

²²Tümüde alala Adam lungnü she, junangde alala Khrista ching arhang labah.

²³Tüshe mihbüm aban nihbuh kim ching arhang kamloshih: alala kheaknü akhuh Khrista; jushu api arüchoki api yo thsürü labah.

²⁴Judüki apinü yakzanshuhrü, thiyukhüm-sühmüh tüsho wu alala dükheakshih dunglim Abuh Thrünpuh kilim kiulongthsü jihabahchoki akheam arübah.

²⁵Tümüde apinü anihbuh riribo alala ajing khüp müyüzahshihyi khiungde yakzan shuhbah.

²⁶Akheam thsüde adükheakshihpü thiriri ju ashekhi.

²⁷“Tümüde Thrünpuhnü lüpdükhi api jing khüp yüzahshih.” Tüshe küyimki “Lüpdükhi api king khüp yüzahshihdo” de athabanü, lüpdükhi api jing khüp yüzahshihbuh ju a mübe.

²⁸Küyimki lüpdükhi api khüp kamshihbanü, atsührü she lüpdükhi api jing khüp yüzahshihbuh khüp kamchoh, junangde mihbüm aban ki Thrünpuh ju lüpdükhi labah.

²⁹Kheakü mihtsürübonü asherü thsung thsüde baptikhi amütsan tümü a? Asherü ju arhang mükamlobeasho, tümüde mihtsürübonü arü thsung thsüde baptikhea?

³⁰Tümü thsükhi isanü kimkhü aban küpkhuk lucho?

³¹Keoniorübo, isa Atungpuh Jisu Khrista ching I nüsa kurungkheak müretahkhinü I nimung aban shechoh de khipkhitshihchoh.

³²Mihtsürü lümkhi ayannü langa inü Efisia ching mütüm shiwüh bolung keochihsho, I tümü alü thsüba? Asherü arhang mükamlobasho, “Isanü tsühanü tüsho yunganü, tümüde shido isa ashebah.”

³³Dümülapyukshih: “Müyamrü amütsünü yakli atsü thsümünimchoh.”

³⁴Nü lümkhi alungki ching arang, tüsho neak düyihbeaklo. Tümüde khürü a Thrünpuh mükheahkhi müla. Inü ha nüsa achihbe thachoh.

³⁵Tüshe khürünü akeokhibah, “Küde thsah asherü arhang kamloba? Arü küdürü pang arüba?”

³⁶Nüsa makharü mihtsürü! Nüsanü tümü hiuchonü ju müshedüa rhangdung masürüchoh.

³⁷Küyimki nüsanü ahiubanü tode asürüpü lakhi apang müyangchoh, tüshe wheat müjih yungsho püpü lachoh.

³⁸Tüshe Thrünpuhnü ju kilim apinü alümkhi nangde pang, tüsho müjih mungji aban kilim nihbuh pang jihchoh.

³⁹Tümüde shih rhangdung lakhi alala rukhüh yung, tüshe mihtsürübo thsungkheak mungji khülang, shiwühbo thsungkheak püpü, wuhnubo thsungkheak püpü, tüsho thüngühbo thsungkheak püpü de lah.

⁴⁰Yinmirü pangbo tüsho alomirü pangbo lah; tüshe yinmirü müretah khülang, tüsho alomirü müretah püpü lah.

⁴¹Ani müretah khülang lah, tüsho khinu müretah püpü, chiningbo müretah püpü; chining bolung müretah büthsüthsü lah.

⁴²Junangde asherü arhang kamlokhi ju ruk ah. Tümü hiukheanü adükheakbe ah, tümü asürüa lanü müdükheakbea ah.

⁴³Wüntre mülakhi ching hiuchoh, müretah ching asürüchoh. Reangmüzahkhi ching hiuchoh, wu ching asürüchoh.

⁴⁴Alomi pang hiuchoh, me pang asürüchoh. Ju ching alomi pang lasho, me pang she lah.

⁴⁵Hanangde ha thrüta lah, “Akhuh mihtsürü Adam rhangdung lakhi mihtsürü kam”; ashube Adam a rhangdung jihbe me kam.

⁴⁶Tüshe akhuhbe ju me yungde pang, tüsho jushu me ah.

⁴⁷Akhuh mihtsürü alomi chingnü, asungthulung mihtsürü ah; mahnepü mihtsürü ju yinmi chingnü ah.

⁴⁸Asungthulung mihtsürü lakhi nangde, sherü asungthulung yoanü ju ruk ah; tüsho yinmi mihtsürü lakhi nangde, sherü yinmi yoanü ju ruk ah.

⁴⁹Isanü asungthulung mihtsürü kiphahde alakhi nangde, isanü yinmi mihtsürü she kiphahde alabah.

⁵⁰Keoniorübo, inü nüsa ki ha thachoh: Shih tüsho thiyihnü Thrünpuh kiulongthsü yamrüplurüp mulukhuk, yungsho adükheakbenü amüdükheakbe yamrüplurüp muluchoh.

⁵¹Kheahang! Inü nüsa ki aramyu thachoh. Isa alala müshe, tüshe isa alala amüthribah,

⁵²kim khülang ching, mükthrap khülang ching, akheam hulipungpung mütchoki labah. Tümüde hulipungpung mütbah, asherü müdükheakbe thsüde arhang kamlobah, tüsho isa alala amüthribah.

⁵³Tümüde adükheakbenü amüdükheakbe tüsho ashebenü amüshebe phuyubeah.

⁵⁴Küyimki adükheakbenü amüdükheakbe, tüsho ashebenü amüshebe phuyubanü, thrüta lakhi müchit dünjibah: “Ashekhi ju akuk ngükhi ching muyuabahdo.”

⁵⁵“O ashekhi, nü akuk ngükhi küching la? O ashekhi, nü yo thsünübe küching la?”

⁵⁶Ashe thsünübe ju neak, tüsho neak wu ju yakzan.

⁵⁷Tüshe isa Atungpuh Jisu Khrista hode isa kilim akuk ngükhi jihbuh Thrünpuh ki makshe jihang.

⁵⁸Jumonü, amuzho I keoniorübo, düküngang, daphap, kamruhroro Atungpuh rhimo ching nüsanü biriang, tümütüsho Atungpuh lung nüsa rhimokhi akeangkeang yung de nüsanü mükheahlah.