Read Yimchungru Naga 1 Korint 4 Bible Online

1 Korint 4 - Yimchungru Naga bible

1 Korint 4

¹Hanangde mihtsürübonü isa ju Khrista yamlarü tüsho Thrünpuh aramyu atoathüprü khejihbeah.

²Kheaküshe atoathüprübo ju thiyuro lapü yihnüpü lah.

³Tüshe I ju nüsa yungsho mihtsürü mahkhap yande I yukhappü ju inü khide ninide lümlah. Inü I küdah thsüdü she thiyumükhapchoh.

⁴I lümkhi müsühde lah, tüshe junü I atsütsü amülim mülakhi mümütsanchoh, I yukhapbuh ju Atungpuh lah.

⁵Jumonü kim mukhiungyide tümü thiyudükhap; Atungpuh arükhi khiungde aleangang. Amiting ching rama lakhi apinü ayin ching hande arübah tüsho mihtsürü mulongbo lahkhitbah. Ju kim ching mihbüm aban nihbuh mungshi Thrünpuh kilimnü aleangkhibah.

⁶Keoniorübo, nüsa alü thsungkheak inü harü Apollo ki tüsho inü rhimodo, junangde nüsanü ha thakhi amütsan ike kheaknü anikhitbah, “Tümü thrüta lanü ju hode düyü.” Junangde nüsanü püpürü azhihde khülang dünkheaknü mükükheang.

⁷Tümütüsho shepünü püpürü kheaknü nüsa büthsüde kamshihcho? Nüsa müngükhi tümü la? Tüsho nüsanü ju leangkhia lasho, tümüde nüsanü müleangkhikhi nangde kükheangcho?

⁸Nüsa künkhi alala laabahdo! Nüsa alarü kamabahdo! Isa mübede nüsa kiulongthsürübo kamdo! Tüsho nüsa kiulongthsürü thsükhülaa, isanü nüsa lung yakzan shuhrungbah!

⁹Tümüde mihtsürü sheshihkhi nangde akheam thsüde Thrünpuhnü isa amüsüh-thsangyurü ah de huhdo dükhi inü lümlah; tümütüsho isa ju alomi, yunirü tüsho mihtsürübo ki mükkheahdung kamdo.

¹⁰Khrista dünkheaknü isa makharü, tüshe nüsa a Khrista ching lümlung larü. Isa yiuhyiuhlah, tüshe nüsa müranglah. Nüsa wüntre ching lah, tüshe isa bahyuka lah.

¹¹Ha kim khiungde isa khümkethürilah, khimmürhüt phuyulah, khitode shikdo, isa lapung mümütsan,

¹²isa khahnü rhimochoh. Küyimki athruajibanü, isanü müngühjihchoh; küyimki thsümüchibanü, isanü arümchoh;

¹³küyimki mükhemükimbanü, isanü muzhode alochoh; kheakü isa alomi sünit, alomiküp müneanmuru nangde kamdo.

¹⁴Inü ha nüsa achih ngüshihpü yung, tüshe inü muzhokhi tsührübo nangde nüsa ki thsangdanpü thrütchoh.

¹⁵Tümüde Khrista ching nüsa aheangrü mükhebinkhi lalashe, nüsa abuh hihde müla. Tümütüsho thiyusheak-atsü hode Jisu Khrista ching I nüsa abuh kamdo.

¹⁶I kheahkhirü kamang de inü nüsa ki tuthsukchoh.

¹⁷Jumonü inü nüsa kilim Atungpuh ki thiyuro lakhi, inü muzhokhi I tsührü Timothi nüsa kilim thiyichoh. Alala ching borü aban inü thsangyukhi ayede, Jisu Khrista ching I limro apinü nüsa ki lümkhitloshihbah,

¹⁸I nüsa kilim marüpü müdam nüsa khürü a kükheangde kamdo.

¹⁹Tüshe Atungpuhnü alümkhi thsüsho, I nüsa kilim nahde arübah, tüsho harü akükheang mihtsürübonü athakhi yungde arü wu inü ayimkhitbah.

²⁰Tümüde Thrünpuh kiulongthsü ju thiyu thabe yung tüshe wu ah.

²¹Nüsanü küpü mulongla? Tso khülang, yungsho muzhode athünak me chingnü I nüsa kilim arüba shi?