Read Yimchungru Naga 1 Korint 5 Bible Online

1 Korint 5 - Yimchungru Naga bible

1 Korint 5

¹Amükinrü bolung she müdünjikhi, nüsa bolung mihtsürü khülangnü bethsürü lung lakhi müzammüram lah de atsütsü thiyusheak jihdo.

²Tüsho nüsa kükheanglah. Nüsanü ju müthri tüzhobe yung de? Nüsa bolung shepünü ha rhimokheanü yihkhita bahang.

³I pang mülaa lalashe, me ching I nüsa lung lah. Tüsho I bekhi nangde ha rhimobuh kheak inü thiyukhapabahdo.

⁴Küyimki nüsa, isa Atungpuh Jisu Khrista mung chingnü mukhungbanü, tüsho isa Atungpuh Jisu wu bebanü,

⁵ha mihtsürü Arimri kilim jihang, junangde pang ju athsümünimbah tüsho Atungpuh nimung ching api me khümkhitbah.

⁶Nüsa kükheangkhi ju atsü yung. Phaüm anikhühnü yikhap abümnü lamshihchoh de nüsanü mümükheah de?

⁷Nüsa yikhap aso kampü thsüde phaüm awün yihkhita bahang, tümütüsho atsütsü inü mükheahkhi nangde nüsa phaüm muyukkhi yikhap nangde alabah. Tümüde isa phungho-thünio namfimihnunu Khrista laksah-a kingaündo.

⁸Jumonü isanü lungchihkhi tüsho amütsü awün phaümnü yung tüshe atsangkhitkhi tüsho thiyuro phaüm muyukkhi yikhap bede thünio leangkhianü.

⁹Müzammüram mihtsürü lung marihpü inü nüsa kilim I yo kihüm ching thrütdo;

¹⁰ju amütsan amükinrübo müzammüram, yihnelune, ahührü yungsho sangthsü kingaünrü yung. Arü kheaknü atsokhipü thsüsho nüsanü alomi chingnü shahde atsopü kambah.

¹¹Tüshe inü nüsa kilim thrütkhi ju a keoniorü shepü müzammüram, yihnelune, sangthsü kingaün, mülapmüji, müshangmuru, yungsho jangkhijangra amülim lanü darihako. Hadürü lung a ayimtsüh she düyimtsüh.

¹²Tümütüsho aleangkheakrü thiyukhapkhi ching inü küde athsüjihpü? Nüsanü thiyukhappü larü ju borü ching yung de?

¹³Aleangkheakrü Thrünpuhnü thiyukhapbah. “Nüsa bolungnü mihbukmuyuk mihtsürü yankhita bahang.”