Read Yimchungru Naga 1 Korint 6 Bible Online

1 Korint 6 - Yimchungru Naga bible

1 Korint 6

¹Küyimki nüsa khürü keoniorü azhihde atsangachih labanü, apinü khikzhakpü amüsührü kilim yungde amükinrü kilim yücho shi?

²Amüsührübonü alomi thiyukhapbah de nüsanü mümükheah de? Tüsho nüsanü alomi thiyukhappü lasho, nüsanü mübanmukhiungbo dünkheak mükhapkhukba de?

³Isanü yunirübo yukhapbah de nüsanü mümükheah de? Ha rhangdung dünkheak a küdükhüh laba!

⁴Nüsa hadürü neamneamruru lasho, tümü thsükhi nüsanü jurü borünü wüntre mülakhi miki zojihcho?

⁵Inü ha nüsa achihbe thachoh. Keoniorü bolung zanzhakpü thsüde nüsa bolung lümlung lakhi mihtsürü müla de?

⁶Tüshe keoniorünü keoniorü azhihde mahkhappung ching amükinrü miki yüchoh!

⁷Dükde amütsankhi ju nüsa bolung atsangachih lakhinü amukuk kamabahdo. Tümü thsükhi amülimpü müthsü le? Tümü thsükhi mülapyukkhipü müthsü le?

⁸Ju müthri nüsa küdah thsüde mülapyukang tüsho amülim thsang, tüsho ha nü keoniorübo ki rhimoang.

⁹Thiyuro-lungki mülarünü Thrünpuh kiulongthsü yamrüplurüp mulu de nüsanü mümükheah de? Dümülapyukshih; müzammüram, sangthsü kingaün, yüliyüra yungsho amakham müzammüram,

¹⁰ahühkhi, yihnelune, müshangmuru, thsangkhithsangyuk, yungsho jangkhijangranü Thrünpuh kiulongthsü yamrüplurüp mulu.

¹¹Tüsho hadürü nüsa khürü lakheah. Tüshe Atungpuh Jisu Khrista tüsho isa Thrünpuh Me mung chingnü nüsa müsüh, tsangkhit tüsho alim kamshih.

¹²“Alala I thsungkheaknü amülükhi lah,” tüshe alala a alü thsübe yung. “Alala I thsungkheaknü amülükhi lah,” tüshe tümünü she I azhorü mükamshih.

¹³“Tsühyungbe ju buk thsungkheak tüsho buk ju tsühyungbe thsungkheak” — tüshe Thrünpuhnü ane chido dükheakshihbah. Pang ju müzammüram thsungkheak adungto yung, tüshe Atungpuh thsungkheak, tüsho Atungpuh ju pang thsungkheak.

¹⁴Thrünpuhnü Atungpuh asürüshih tüsho api wunü isa she asürüshihbah.

¹⁵Nüsa pangbo ju Khrista pang ching shihchambo ah de nüsanü mümükheah de? Inü Khrista pang shihcham khülang lubah müzammüramrü pang lung shihcham kamshihba shi? Küyimkishe yung!

¹⁶Shepünü müzammüramrü lung arihchonü alibe lung pang khülang kamchoh de nüsanü mümükheah de? Tümüde ha thrüta lah, “Mahne ju shihphü khülang kambah.”

¹⁷Tüshe shepünü Atungpuh lung arihchonü api lung me khülang kamchoh.

¹⁸Müzammüram mükihkhiang. Mihtsürünü ayihbeakkhi neak püpü a pang aleanglim ah; tüshe müzammüram mihtsürünü nihbuh pang azhihde neak thsüchoh.

¹⁹Nüsa pang ju Thrünpuh kilimnü arükhi nüsa kheak lakhi Amüsüh Me arüngyam ah de nüsanü mümükheah de? Nüsa ju nüsa nihbuh yo yung;

²⁰nüsa ju amo jihbah athulokheah. Jumonü nüsa pang ching Thrünpuh müretahshang.