Read Yimchungru Naga 1 Korint 9 Bible Online

1 Korint 9 - Yimchungru Naga bible

1 Korint 9

¹I zuzu müla de? I amüsühthsangyurü yung de? Inü isa Atungpuh Jisu müngü düpü? Nüsa ju inü Atungpuh lung rhimokhitkhi yung de?

²I ju püpürü ki amüsühthsangyurü yunga lalashe, nüsa ki I ju ah; tümüde nüsa ju I Atungpuh lung amüsüh-thsangyurü thsükhi mütsanyüm ah.

³I chikhirübo ki I chilo yu ha lah.

⁴I rhimokhi dün tsühyungbe ngükhi ju alungki yung de?

⁵Püpürü amüsüh-thsangyurübo tüsho Atungpuh lung keoniorübo le Kephasnü arhimokhi nangde Khristan niuberü khülangnü I atrupü alungki yung de?

⁶Yungsho rhangdung lapü thsungkheaknü Barnaba tüsho inü lang arhimopü la de?

⁷Shepünü nihbuh küdahnü bahzübahdode bonungrü rhimo thsücho? Shepünü aso asokhi mütsühde kurungasolu thsücho? Shepünü niuhke müyungde mihnu boto neakcho?

⁸Inü ha mihtsürü thiyukhümsühmüh chingnü thacho de? Yakzannü ju ruk mütha de?

⁹Tümüde ha Mosa yakzan ching thrüta lah, “Moshipungnü hi nitchoki nünü amün dürümdojih.” Thrünpuhnü ju moshipungbo dünkheak lümcho shi?

¹⁰Atsütsü apinü isa dünkheak thachoh yung de? Ha isa dünkheak thrüta lah, tümütüsho wochakrü tüsho yimlurünü hi shihcham ching mulonglamde arhimobeah.

¹¹Isanü nüsa bolung me müjih hiudo. Isanü nüsa kukruk alü thsüde yimlukhi ju hihdakla de?

¹²Püpürübo nüsa kheaknü arung ngüpü ha alim lasho, isa a alünü mülabea de? Judüalalashe, isanü ha alim mahori. Tüshe Khrista thiyusheakatsü limro müyihdopü isanü lüpdükhi arümkheam.

¹³Arüngyam ching rhimorübo arüngyam chingnü arü tsühyungbe ngüchoh tüsho kingaün sadam kheak tankihrü shuhmülanga kingaünkhi chingnü shihcham ngüchoh de nüsanü mümükheah de?

¹⁴Junangde sherü thiyusheak-atsü zhiyukchonü thiyusheak-atsü hode arü rhangdung lapü ngübah de Atungpuhnü thiyukhüm jih.

¹⁵Tüshe inü harü alimbo mahori, yungsho hadürü ngüpü inü müthrüt. Khürünü kükheangde junoshihpü dün a I ashekhi atsübe labah.

¹⁶Tümüde inü thiyusheak-atsü thsangyuthsangrasho ju inü akükheangpü müla, tümütüsho yihnüpü lakhi I kheak yihkihjih. Inü thiyusheak-atsü müthsangyuthsangrasho I are!

¹⁷Tümüde inü ha akeangnü rhimosho, I thsambah khülang lah; tüshe akeangnü yungsho, I a le athiyikhi rhimo lang rhimochoh.

¹⁸Dale tüsho I thsambah tümü a? Ha lang ah: thiyusheak-atsü ching I alim müthade akeangnü thiyusheak-atsü thsangyuthsangrachoh.

¹⁹Tümütüsho mihtsürü alala kheaknü I zuzu lalashe, alü bedarüpü thsüde I küdah thsüde alala azhorü kam.

²⁰Jihudarübo bedarüpü thsüde Jihudarübo ki I Jihudarü kam; I yakzan bukkhüp mülalashe yakzan bukkhüp larü bedarüpü thsüde arü ki I yakzan bukkhüp larü khülang kam.

²¹Yakzan mülarübo ki arü bedarüpü thsüde, Thrünpuh kilim yakzan mülakhi yung tüshe Khrista yakzan bukkhüp I ju yakzan mülarü khülang kam.

²²Reangmüzahrü ki arü bedarüpü I reangmüzahde kam. Inü khürü khümkhitpü thsüde mihtsürü alala ki I ju ruk kam.

²³Inü ha alala thiyusheak-atsü dünkheaknü rhimochoh, junangde inü ju müngühmühi ching berungbah.

²⁴Alihachihkhi ching alihrü alalanü alihchoh, tüshe khülangnü lang thsambah ngüchoh de nüsanü mümükheah de? Thsambah ngüpü thsüde alihang.

²⁵Jukthülahrü abannü zangrü danyukkhi chingnü ahorichoh. Arü ju adükheakbe kuthran ngüpü rhimochoh, tüshe isa a müdükheakbe lah.

²⁶Jumonü lümkhi müladüa malihchoh, khürünü apung ching shangkhi nangde inü müshangchoh;

²⁷azhihachihpü püpürü jibah dunglim I müthülünde kambah mütsüle inü I pang shangde düküngshihchoh tüsho inü danyuka zochoh.