Read Yimchungru Naga 2 Korint 1 Bible Online

2 Korint 1 - Yimchungru Naga bible

2 Korint 1

¹Thrünpuhnü amulongkhi hode Jisu Khrista amüsüh-thsangyurü Paul, tüsho isa keoniorü Timothi kilimnü, Korint ching Thrünpuh borü, ju lung Akaia alala ching lakhi amüsührü alala kilim:

²Isa Abuh Thrünpuh tüsho Atungpuh Jisu Khrista kilimnü nüsa kilim amüthsüm tüsho mungtsü lashang.

³Isa Atungpuh Jisu Khrista Abuh tüsho Thrünpuh, mihmüthsümbo Abuh tüsho mulong shukheam alala Thrünpuh shiang,

⁴shepünü isa thsümütsü alala ching isa mulong shukheamcho, junangde Thrünpuhnü isa mulong shukheamkhi junü thsümütsü ching larü isanü mulong shukheampü kukbah.

⁵Tümüde isanü Khrista thsünükhi ching suhdahde chamachihkhi nangde, Khrista hode isanü mulong shukheampü ching suhdahde chamachihchoh.

⁶Isa thsünüsho, ju nüsa thsungkheak mulong shukheam tüsho akhümkhit lah; tüsho isa mulong shukheamsho, ju isa thsünükhi nangde nüsanü arümkheamde thsünükhi nüsa thsungkheak mulong shukheam lah.

⁷Nüsa thsungkheak isa mulonglam matrüt; tümüde isa thsünükhi ching nüsanü shihcham lukhi nangde, nüsanü isa mulong shukheam ching shihcham lubah de isanü mükheahlah.

⁸Keoniorübo, tümüde Asia ching isa thsünükhi nüsanü mümükheahde mülashihne; isanü marümkhukpü thsüde isa thsünü ato khüp la, junangde rhangdung lapü mulonglam she akheam thsü.

⁹Isa asheshihpü lakheah; tüshe junü isa nihbuh kheak yungde asherü arhang kamloshihbuh Thrünpuh kheak angükihshih;

¹⁰apinü ashepü akhito chingnü bekhit, tüsho isa bekhitchoh; isanü api kheak kinchoh junangde kheaküshe apinü isa bekhitchoh.

¹¹Nüsanü she tamkhüntamnü hode isa rungbeah, junangde ahihkhühnü tamkhüntamnü alojihde isa ki müngühmühi mülüjihkhi thsungkheak isa thsung thsüde ahihkhühnü makshe jihbah.

¹²Tümüde isa kükheangkhi ju ha: isanü alomi ching tüsho nüsa miki, amüsühkhinü tüsho kinde kurhangkhinü, alomi lümlungnü yung tüshe Thrünpuh amüthsüm hode yakli huhdo de isa lümkhinü thiyumütsan lah.

¹³Tümüde isanü nüsa kilim thrütkhi ju tümü yung tüshe nüsanü akhekhukbe tüsho anikhitkhukbe lah; nüsanü khiukde anikhitbah de inü mulonglam lah,

¹⁴nüsanü chamkhüh anikhitkhi nangde, Atungpuh Jisu nimung ching isanü nüsa dünkheak nangde, nüsanü isa dünkheak kükheangbah.

¹⁵Tümütüsho nüsa alü asühkhi ngüpü thsüde I nüsa kilim akhuhde arüpü mütsande alakheah.

¹⁶I Macedonia lim yüchoki inü nüsa rhuakheahnelah, tüsho Macedonia ching nüsa kilim alode arübah nüsanü rungde Judea lim yübah.

¹⁷Jumonü, küyimki inü ha lümkhi thsükhea, inü ju thülihde athsükhea de? Yungsho inü lümkhi thsükhi ching khülangkinü “Am, am” tüsho “Yung, yung” düpü alomi shih yande athsükhea de?

¹⁸Atsütsü Thrünpuh ju thiyuro lakhinü, nüsa kilim isa yu “Am” tüsho “Yung” de mülakheah.

¹⁹Thrünpuh tsührü, Jisu Khrista dünkheak nüsa ki thsangyuthsangrarü Silvana le Timothi tüsho I a “Am” tüsho “Yung” de mülakheah; tüshe api lung kamruhroro “Am” de lah.

²⁰Tümüde Thrünpuhnü alokhikhi alala api kheak “Am” ngüchoh. Jumonü isanü api hode Thrünpuh müretahpü lim “Amen” de thachoh.

²¹Tüshe Khrista ching nüsa lung isa arihshihkhi, tüsho isa mujude-müsühkhitkhi ju Thrünpuh ah;

²²apinü isa kheak mütsanyüm yihkih tüsho mütsanmükhi thsüde isa mulong ching api Me jih.

²³Nüsa muzhokhinü I nüsa kilim Korint ching alode marü de I yumütsan thsüde inü Thrünpuh jichoh.

²⁴Nüsa akin kurungkheak isanü thiyuzüng mahori, tüshe nüsa asühpü thsüde rukhüh rhimorübo ah; tümüde akin hode nüsa düküngde zhiplah.