Read Yimchungru Naga 2 Korint 10 Bible Online

2 Korint 10 - Yimchungru Naga bible

2 Korint 10

¹I Paulnü, Khrista amuzho tüsho azhihayih hode nüsa ki mushuchoh — nüsa ki a I azhihayihdo, tüshe nüsa kheaknü atrütsho müküplah!

²Küyimki I arübanü, isa ha lomi yakli yande lah de alümrü mihtsürü khürü ki inü alümkhi nangde thiyu mütode alabah de nüsa ki mushuchoh.

³Tümüde isa alomi ching lah tüshe alominü arhimokhi nangde isanü thirithsü mülachoh.

⁴Isa thirithsü thsühnukbo ju alomi yo yung tüshe chipibo thsümünimbe Thrünpuh wu lah.

⁵Thrünpuh mükheahmudu lim atsangachih tüsho lülüshishi limkhudo aban isanü thsümünimchoh, tüsho lümkhi aban Khrista yu anipü ramde arüchoh.

⁶Nüsanü mihyuanikhi adüngakhi thsüsho, isanü mihyumanirü aban thsümüchipü thsakhama lah.

⁷Nüsa mükbo ki tümü lanü kheahchoh. Khürünü api Khrista yo ah de mütsansho, isa nangde api ju Khrista yo ah de lümloshang.

⁸Atungpuhnü isa kilim, nüsa thokheampü yungde abekihpü thiyukhüm-sühmüh jihkhi dünkheak inü khü alü thsüde kükheangkheang she, ju dünkheak I achihpü müla.

⁹Inü I yo kihümnü nüsa müzünpü nangde ahuhpü mükün.

¹⁰Tümüde khürünü thachoh, “Api kihümbo mülanglah tüsho müküplah, tüshe api lachokia thünaklah, tüsho api yu thakhi tümü she yung.”

¹¹Isa mülachoki isa kihüm hode tümü thachonü isa bechoki jude thsüchoh de hadürü mihtsürünü anikhitshang.

¹²Sherünü küdah thsüde shilochonü isanü arü kheak mazhih yungsho makeachihpü mürangchoh. Küyimki arünü arü adünba tüsho arünü arü kheak akeakheahba, arü lümlung müla.

¹³Tütüshe akhukhi hode isanü mükükheang, tüshe nüsabo she khiungde Thrünpuhnü akhukhi khiungde alabah.

¹⁴Isanü nüsa mukhiungkhi nangde isa küdah thsüde müpeangshangchoh; nüsa khiungde Khrista thiyusheak-atsü lubah arükhi ju isa akhuh lakheah.

¹⁵Akhukhi hode isanü püpürü rhimokhi ching mükükheangchoh; tüshe nüsa akin zokihsho, nüsa bolung lakhi isa lu khide ato kambah de isa mulonglam lah,

¹⁶junangde nüsa lomi hode isanü thiyusheakatsü thsangyuthsangrabah, tüsho püpürü lu ching rhimoabahkhi kheak isanü mükükheang.

¹⁷“Shepünü kükheangchonü, Atungpuh dünkheak kükheangshang.”

¹⁸Tümütüsho nihbuh küdah thsüde shilokhinü yung, tüshe shepü Atungpuhnü shijihchonü athülün lah.