Read Yimchungru Naga 2 Korint 11 Bible Online

2 Korint 11 - Yimchungru Naga bible

2 Korint 11

¹I anükhüh mudukmükea lalashe nüsanü arümjang. I lung arümjang!

²Inü nüsa kheak amüsüh mükthsülah, tümüde inü nüsa ju atsangkhit arhangberü nangde yamkhünbuh khülang, Khrista ki rhangshihpü alokhido.

³Tüshe inü trejihde alakhi ju phurutonü arük hode Eve mülapyukkhi nangde, lümrhangkhi tüsho Khrista kilim shuhmülanga jihkhi chingnü nüsa lümkhibo bephülapde atsobah.

⁴Tümüde khürünü arübah isanü thsangyuthsangrakhi Jisu kheaknü püpü Jisu thsangyuthsangrasho, yungsho nüsanü leangkhikhi kheaknü püpü me leangkhisho, yungsho nüsanü leangkhikhi kheaknü püpü thiyusheak-atsü leangkhisho, nüsanü thülihkhürado ju khüp laabahbah.

⁵Tüshe “adungto amüsüh-thsangyurü” bolung I aninibe ah de inü mülümchoh.

⁶I athapü ching müzükhita lalashe, I amükheah lah; isanü ha limro aban nüsa kilim mütsandü lang huhdo.

⁷Nüsa shuhkihpü thsüde inü akeangnü Thrünpuh thiyusheakatsü nüsa ki thsangyuthsangrakhi ju I neak a de?

⁸Nüsa rungpü thsüde arung leangkhide inü borübo kheaknü jangkhido.

⁹Tüsho küyimki I nüsa lung lakhea tüsho yihnüpü lakhea, inü sheshe hahmülang müjih, tümüde I yihnüpübo Macedonia chingnü arükhi I keoniorübonü jih. Junangde ahokhi ching nangde tümü ching she inü nüsa hahmülang müjih.

¹⁰Khrista thiyuro I kheak lale, I kükheangkhi Akaia lomi ching zhikde müla.

¹¹Inü nüsa mümuzhomonü ha thacho de? Inü muzholah de Thrünpuhnü mükheahlah!

¹²Arü kükheangküyang rhimo ching isa nangde rhimochoh de atharü zhipdopü inü tümü rhimochonü mutukzhakde arhimobah.

¹³Tümüde hadürü mihtsürübo ju arükchih amüsüh-thsangyurübo, mülapyukrübo, Khrista yo amüsühthsangyurübo de müthria huhchoh.

¹⁴Tüsho amüyinsahpü müla, tümüde Arimrinü she api ju ayin yo yunirü ah de müthria huhchoh.

¹⁵Jumonü api yamlarübonü she thiyuro-lungki yamlarübo ah de müthria huhchoki ju jakso yung. Akheam ching arü rhimonü athülünkhi ngübah.

¹⁶Inü thalochoh, I makharü de shenü dülümshih; tüshe nüsanü jude thsüa lasho, makharü nangde I leangkhiang, junangde inü anikhüh kükheangpü labah.

¹⁷Ha küdahnü mulongramde kükheangkhi ching Atungpuhnü thaang dükhi yung, tüshe makharü khülang nangde thachoh.

¹⁸Tümütüsho ahihdonü alomi shih yande kükheangchoh, I she akükheangbah.

¹⁹Tümüde nüsanü lümlung lade makharü ki asühde arümdo!

²⁰Khürünü junono she, muyuyu she, jangkhikhi she, nihbuh shuhkihkih she, nüsa miro kheak damdam she nüsanü arümchoh.

²¹Ju thsungkheak isa khide reangmüzah de I achihbe thsüde inü thachoh! Tüshe khürünü tümüpürü dünkheak kükheangpü mürangchonü, inü she ju dünkheak kükheangpü mürangchoh de makharü khülang nangde thachoh.

²²Arü Ibrirü a shi? I she ah. Arü Israelrü a shi? I she ah. Arü Abraham tsühsoniusobo a shi? I she ah.

²³Arü Khrista yamlarübo a de? Makharü nangde inü thachoh — tüshe arü kheaknü I a yamlarü atsü ah. Inü alü mürangde rhimodo, ahihdo ki rihyam ching lado, ahihdo ki shika tsühdo, tüsho ahihdo ki shemüchihdo.

²⁴Jihudarünü phüngü ki samrükheak tuku kiki I rhapdo,

²⁵Tsonü mahsam ki I shikdo; khülang ki lungnü ru. Mahsam ki sangkung angakkhi ching be; tüsho tsüngre khülang tüsho nimung khülang keto ching lakheah;

²⁶alochode hantsahchoki ayungbo ching, jangkhijangrarü, I mihtsürübo, khiungkerü kilimnü, kiuto ching, sunglo ching, keto ching, arükchih keoniorübo kilimnü atrebe lakheah;

²⁷rozhakkhi tüsho khisahkhi ching, azhing ching ahihdo ki yapshede müyükhi, ahihdo ki khümkethürikhi, tüsho thsaksahde bünkeang lakheah.

²⁸Püpürübo lung khiode, inü borübo alala thsungkheak lümrhihkhinü mulong kimikhi nimung aban dünji.

²⁹Küyimki khürü reangmüzahbanü, I she reangmüzahde kamchoh; küyimki khürü neak yihbeakbanü, I lümthsününü mide kamchoh.

³⁰Inü kükheanganü dükhülaa, I reangmüzahde ahuhkhibo dünkheak inü kükheangbah.

³¹Lünnü ashijihpü lakhi Atungpuh Jisu Abuh tüsho Thrünpuhnü inü akeangyu müthachoh de mükheahlah.

³²Damaska ching, kiulongthsüpuh Areta bukkhüp lakhi kovünornü I rampü lümde kiuto chipiripitbo ching aheangrübo zojih,

³³tüshe chipi bitkhi chingnü I ju muluk chingnü yükishih tüsho api khah chingnü tsokhit.