Read Yimchungru Naga 2 Korint 12 Bible Online

2 Korint 12 - Yimchungru Naga bible

2 Korint 12

¹Alü thsüpü tümü mülalashe inü akükheangpü lah; tüshe inü Atungpuh michihbo tüsho amikheak akhiukkhibo thaanü.

²Kam thürükheak phüyi tsodo, inü mükheahkhi Khrista ching mihtsürü khülang yinmi mahsampü ching bekih — pang bede a shi pang mübenü inü mümükheah, Thrünpuhnü mükheahlah.

³Tüsho ha mihtsürü asühpung ching bede yükih de inü mükheahlah — pang bede a shi pang mübenü inü mümükheah, Thrünpuhnü mükheahlah —

⁴tüsho mihtsürü münnü müthakhukbe tümüanü apinü so.

⁵Hadürü mihtsürü dünkheak inü kükheangbah, tüshe I reangmüzahkhibo dünkheak düna, I dünkheak inü mükükheang.

⁶Inü akükheangpü thsüa lalashe, I mümakha, tümütüsho inü thiyuro asukbah, tüshe inü jude müthsü, junangde shenü she I kheak ngükhi yungsho asokhi hobah I dünkheak alü mülümde alabah.

⁷Amikheak akhiukkhi hihde angükhi hode I changde mülümshihpü, Arimri yunithsürü khülang, I thsümüchishihpü I pang ching ayang khülang jih.

⁸Ha I kheaknü lude atsopü inü Atungpuh ki mahsam ki mushu.

⁹Tüshe apinü I ki tha, “Nü thsungkheaknü I amüthsüm suhdahde lah, tümüde reangmüzahkhi ching I wu khiukdahde kamshihdo.” I reangmüzahkhi dünkheak inü alü asühde kükheangbah, junangde Khrista wu I kheak labah.

¹⁰Jumonü Khrista dünkheaknü inü reangmüzahkhi, mükhemükim, küpkhuk, thsümüchi, tüsho thsümütsübo kheak reangkeamlah; tümüde küyimki I reangmüzahbanü, I sühmüh lah.

¹¹I makharü lakheah, tüshe ju nüsanü akamshihkheah. Tümüde nüsanü I shijihpü lakheah; tümütüsho I tümü mükama lalashe harü “adungto amüsüh-thsangyurübo” ki I aninibe yungde alakheah.

¹²I amüsüh-thsangyurü ah de amütsankhi nüsa bolung khinthiyinbe tüsho amüyinsahbebo ahihdo khide arümkheamde rhimodo.

¹³Inü nüsa kheak hahmülang müjihkhi kheak hode, püpürü borübo kheaknü nüsa küdükhüh abobe lakhea? Ha amülim I ki neak bahjang.

¹⁴Kheakü inü mahsam kipü nüsa rhuakheahpü thsakhambah lah, tüshe I nüsa ki hahmülang mükam, tümütüsho inü alunekhi ju nüsa lakhit yung tüshe nüsa ah; tümüde tsührübonü bebuhrü khilim yung tüshe bebuhrübonü tsührübo khilim zojihbeah.

¹⁵Nüsa me thsungkheaknü inü asühde bahzübahdobah tüsho I she shuhmülanga jihbah. Inü nüsa khide muzhosho, I a nükde amuzhoba de?

¹⁶Nüsa ki hahmülang müjih de nüsanü amulongbah. Tüshe inü rük thsüde nüsa mülapyukdo de nüsa khürünü thachoh!

¹⁷Inü nüsa kilim thiyirü hode nüsa thsümüchia la de?

¹⁸Inü Tita yüpü tuthsuk, tüsho keoniorü api lung thiyi. Titanü nüsa thsümüchih-a la de? Ikenü lümkhi rukhüh rhimokhi yung de? Ikenü jingdükü rukhüh dükükhi yung de?

¹⁹Isanü nüsa ki isa dün chilode arükheah de nüsanü lümde alakhea de? Khrista ching larü nangde isanü Thrünpuh miki asukde alakheah; tüsho amuzho müyamrübo, isanü arhimokhi alala nüsa düküngpü thsungkheak ah.

²⁰Tümüde küyimki I arübanü inü alümkhi nangde nüsa mülapü tüsho nüsanü alümkhi I mülapü inü trede lah; junangde rukachih, mükthsü, bukakhiuk, yihnelune, mülapmüji, dünthamungtha, mungshilokhi, tüsho ayingying lapü kuklah.

²¹Küyimki I nüsa kilim alode arübanü Thrünpuhnü I nüsa miki azhihayihshihpü tüsho mümüsühkhi, müzammüram, tüsho küpküprara rhimokhi chingnü mulong mümüthrirü ahihdo kurungkheak tüzhopü inü trejihlah.