Read Yimchungru Naga 2 Korint 13 Bible Online

2 Korint 13 - Yimchungru Naga bible

2 Korint 13

¹I ha mahsam kipü nüsa kilim arüchoh. “Mahne yungsho mahsam thiyumütsan hode lüpdükhi mütsanmükhibeah.”

²I nüsa lung mahne kipü lachoki inü nüsa ki düh de thaabahdo. Kheakü I mülachoki thalochoh: I alode arüchoki püpüki neak yihbeakrü yungsho püpürü she inü müdükhe,

³tümütüsho Khristanü I hode asukchoh de nüsa künkhi alala nüsanü amütsanbah. Apinü nüsa lung yihnüpü thsüchoki api yiuhyiuhde müla, tüshe nüsa bolung api wu huhchoh.

⁴Tümüde api sühmüh mülakhi ching yümkih, tüshe Thrünpuh wu hode lah. Tümüde isa api lung sühmüh müla, tüshe nüsa lung rhimokhi chingnü Thrünpuh wu hode isa api lung labah.

⁵Nüsa akin hode ramlola shi yungnü nüsa küdah thsüde rükakheahang. Nüsabo rükakheahang. Khrista nüsa kheak lah de nüsanü mülümkhitcho de? — nüsanü rükakheahpü lakphah-a lah yungsho!

⁶Isanü mülakphahkhi nüsanü amükheahbah de inü kinlah.

⁷Kheakü nüsanü amülim tümü mürhimopü isanü Thrünpuh ki tamkhüntamnüchoh. Rükakheahkhi isanü kukdo de mihtsürünü angüshihbe yung tüshe isa mukukzamkhi nangde lalashe nüsanü tümü alimanü arhimobah.

⁸Tümüde isanü thiyuro azhihde tümü müthsükhuk, tüshe thiyuro thsungkheak lang ah.

⁹Küyimki isa reangmüzahba tüsho nüsa reangzahbanü isanü asühchoh, isa tamkhüntamnü ju nüsa alü thsüpü thsungkheak ah.

¹⁰Küyimki I arübanü, athokheampü yungde athsükihpü Atungpuhnü I kilim jihkhi thiyukhüm-sühmüh ahorikhi ching inü mümüküppü thsüde I nüsa kheaknü limshude alachoki inü ha thrütchoh.

¹¹Akheam thsüde keoniorübo, chode. Nüsa limrobo thsarihang, inü atuthsukkhi aniang, khülangnü khülang ki ayeang, mungtsü ching laang, tüsho amuzho tüsho mungtsü Thrünpuh nüsa lung labah.

¹²Amüsüh mün müthsüpkhinü khülangnü khülang ki salüm jihachihang.

¹³Amüsührü alalanü nüsa kilim salüm jihchoh.

¹⁴Atungpuh Jisu Khrista amüthsüm, Thrünpuh amuzho tüsho Amüsüh Me arihako nüsa alala lung laang.