Read Yimchungru Naga 2 Korint 3 Bible Online

2 Korint 3 - Yimchungru Naga bible

2 Korint 3

¹Kheaküshe isanü nihbuh shilopü tankihcho de? Yungsho khürünü arhimokhi nangde, nüsa kilim yungsho nüsa kilimnü mungshi kihüm yihnüpü la de?

²Mihtsürü alalanü amükheahpü tüsho akhepü lakhi nüsa mulongbo kheak thrütkhi nüsa ju lang isa kihüm ah;

³tüsho nüsa ju isanü tankihkhi chingnü, dokenü yungde arhang Thrünpuh Menü, lungbeakbo kheak yungde mihtsürü mulongbo kheak thrütkhi Khrista kilimnü kihüm ah de nüsanü huhchoh.

⁴Thrünpuh kilim isa mulonglam hadürü Khrista hode lah.

⁵Isanü tümükhüh lang she isa küdahnü athsükhukkhi lah de alümkhi müla; isanü athsükhukpü ju Thrünpuh kilimnü lah.

⁶Apinü isa ju yakzan thrütkhi yo yungde Me ching tangzüng aso tankihrü thsüpü thülünde kamshih; tümüde yakzan thrütkhinü laksahchoh, tüshe Menü rhangdung jihchoh.

⁷Kheakü asheshihbe yakzan lungbeak kheak thrütkihkhi, akheambe thsüa lalashe, azhingzhingkhinü Israelrünü Mosa miro mükheahkhukde, müretahde arükheasho,

⁸Me yakzan a müretah atobe mülabea de?

⁹Tümütüsho abahyukbe yakzan ching müretah lakheasho, thiyuro-lungki yakzan a ju kihode müretahbah.

¹⁰Kheakü kihode müretahkhi akesho, müretahde alakhi thsü müla.

¹¹Kheamabahkhi müretahde arükheasho, lün labe a alü müretah labah.

¹²Tümütüsho isa hadürü mulonglam lakhinü, isa khide mulong tolah.

¹³Isa a azhingzhing kheamde alachoki Israelrünü mükheahshihpü api miro muhiudokhi Mosa nangde yung.

¹⁴Tüsho arü lümkhibo mitingde lah; tümütüsho khihni khiungde arünü awün tangzüng khechoki ju kudukiube mulokhi tümütüsho Khrista hodü lang ha lude tsodo.

¹⁵Khihni khiungde küyimki Mosa yakzan khebanü, kudukiubenü arü mulongbo yihdochoh.

¹⁶Tüshe küyimki khürünü Atungpuh kilim rholobanü ayihdobe lude tsochoh.

¹⁷Kheakü Atungpuh ju Me, tüsho küching Atungpuh Me lanü ju ching zuzu lah.

¹⁸Tüsho isa miro müyihdode Atungpuh müretah tahkihlode, Me lakhi Atungpuh kilimnü arükhi lünnü rünkihde ayükhi müretah lade api kiphahkhi ching müthriloa lah.