Read Yimchungru Naga 2 Korint 4 Bible Online

2 Korint 4 - Yimchungru Naga bible

2 Korint 4

¹Jumonü Thrünpuh mihmüthsüm hode ha tankihpü lakhinü, isa mulong müninichoh.

²Ju müthri isanü müyima lakhi tüsho achihbe limrobo bahkhido; isanü mümülapmüji yungsho Thrünpuh yu arükchih mükamshih. Tüshe thiyuro thakhi ching Thrünpuh miki, mihtsürü aban ki isa tsülah dükhinü lah.

³Tüsho isa thiyusheak-atsü muhiudoa lalashe, ju adükheakrübo kilim lang muhiudoa lah.

⁴Thrünpuh kiphahkhi, Khrista müretah thiyusheak-atsü ayin arünü müngüshihpü ha lomi thrünpuhnü amükinrü lümkhibo yihdojih.

⁵Tümüde isa küdah yung, tüshe Jisu Khrista ju Atungpuh tüsho Jisu dünkheaknü isabo ju nüsa tankihrübo de thsangyuthsangrachoh.

⁶Tümüde Thrünpuh, shepünü “Amiting chingnü ayin tahshang,” de athakheanü, Khrista miro ki Thrünpuh müretah mükheahmudu ayin isa kilim jihpü isa mulongbo ching api ayin tah.

⁷Tüshe ato wu ju isa yungde Thrünpuh yo ah de ahuhpü ha rahpung alo phüh ching lah.

⁸Limbeak aban ching isa thsünülah, tüshe müzünak; yingyinglah tüshe mulonglam müdükheak;

⁹thsümüchido, tüshe mübahyuk; kingmülündo, tüshe müyuri;

¹⁰isa pang ching Jisu rhangdung ngüshihpü kamruhroro pang ching Jisu shekhi hanlah.

¹¹Tümütüsho isa ashebe pang ching api rhangdung ngüpü thsüde Jisu dünkheaknü isa rhangdung kamruhroro atrebe ashepü ching lakheah.

¹²Jumonü ashekhinü isa kheak rhimode lah, tüshe nüsa kheak rhangdung lah.

¹³Amüsühyunü thachoh, “Inü akinkhi hode inü asukchoh.” Ju akin me rukhühnü isanü she kinchoh tüsho asukchoh.

¹⁴Shepünü Atungpuh Jisu arhang kamloshihkheanü isa she Jisu lung arhang kamloshihbah tüsho nüsa lungnü api miki bede ayübah de isanü mükheahlah.

¹⁵Ha alala nüsa alü thsüpü thsungkheak ah, junangde mihtsürü alü alü khiungkhi amüthsümnü Thrünpuh müretah kilim makshe jihshihpü hihde akamshihbah.

¹⁶Jumonü isanü mulong müninichoh. Aleanglim isa keaksah-a lalashe, alunglim a nimung aban isa aso kamlochoh.

¹⁷Tümüde ha anükhühkheak thsünükhi junü makekhukkhi akheam müla müretah isa thsungkheak thsakhamde lah.

¹⁸Tümütüsho isanü ngüde alakhi kukruk yung, tüshe amüngükhi kukrukbo kheak kheahchoh; tümüde ngüde alakhibo anükhühkheak labah, tüshe tümü müngünü lünnü alabah.