Read Yimchungru Naga Galatia 5 Bible Online

Galatia 5 - Yimchungru Naga bible

Galatia 5

¹Zuzu thsungkheaknü Khristanü isa zuzu kamshih; jumonü düküngde zhipang, tüsho azhorü sangshuh ching düshuhlo.

²Kheakü nüsanü tsütabahsho nüsa thsungkheaknü Khrista ju tümü yihnüpü müla de I Paulnü nüsa ki thachoh.

³Shepünü tsütabahchonü apinü yakzan alala anipü kamchoh de mihtsürübo aban ki inü thiyumütsan thsülochoh.

⁴Nüsa shepünü yakzan hode alim thsüpü mürangchonü Khrista kheaknü limshudo; amüthsüm chingnü nü chamkhide tsodo.

⁵Tüshe akinnü, Me hode thiyuro-lungki mulonglam isanü aleangchoh.

⁶Tümüde Jisu Khrista ching tsütabahkhi yungsho tsütamübahkhi thsüthsü tümü büthsüde müla, tüshe amuzho hode akinnü rhimochoh.

⁷Nüsa tsüde rhimode alakheah; shepünü nüsa thiyuro anipü chingnü tukloshihkhea?

⁸Ha athsungkhi ju nü jibuh kilimnü yung.

⁹Phaüm anikhühnü yikhap alala bümkihshihchoh.

¹⁰Nüsanü püpü lümkhi müthsüpü inü Atungpuh kheak mulongram lah. Nüsa yingyingshihbuh ju shepü shepü thsüthsü she Atungpuhnü thsümüchibah.

¹¹Tüshe keoniorübo, inü judü lang tsütabahpü thsangyuthsangrasho, tümüde kheakü khiungde I thsümüchikhi la? Judeasho inü sangkim dünkheak thsangyuthsangrakhinü küpkhuk tümü makhiukshih.

¹²Nüsa kipathsük jihrü ju inü a khapthumunga bahshihnelah.

¹³Tümüde keoniorübo, nüsa zuzu lim jido; shihkünkhi ching nüsa zuzu dahori, tüshe amuzho hode khülangnü khülang ki yamlarü thsang.

¹⁴Tümüde yakzan alala thiyu khülang ching tharüplah, “Nünü nü yamhingrü ki nihbuh nangde muzhoang.”

¹⁵Tüshe nüsanü nguhachihde tüsho tsühachihsho, khülangnü khülang mütsühkhamachihpü thsüde kümkangang.

¹⁶Tüshe inü thachoh, Me hode tsahang, tüsho shihkünkhi reangdükeamshih.

¹⁷Tümüde shihnü Me azhihde künchoh; tüsho harü khülangnü khülang mübaplapachih, junangde nünü alümkhi rhimopü zhipdochoh.

¹⁸Tüshe Menü nü besho nü ju yakzan khüp müla.

¹⁹Kheakü shih rhimo mütsande lah: müzammüram, mümüsühkhi, yüliyürakhi,

²⁰sangthsü kingaün, wurük, mükihachihkhi, rukachih, mükthsü, bukakhiuk, yihnelune, achamnakbo,

²¹lungkhangkhi, müshangmuru, amakham adanasün, tüsho judürü püpübo. Shepünü hadürü rhimochonü Thrünpuh kiulongthsü yamrüplurüp mulu de püpüki nangde inü nüsa ki thachoh.

²²Tüsho Me sangaso ju amuzho, asühpü, mungtsü, arümkheam, tsüyihkhi, tsüde thiyuro lakhi,

²³azhihayih, nihbuh danyukkhi; hadürü azhihdüa yakzan müla.

²⁴Tüsho sherü Jisu Khrista yoanü akünkhi tüsho amürühkhi bede shih yakli yümkihabahdo.

²⁵Isanü Me hode lachosho, isanü Menü abekhi ching tsahanü.

²⁶Isanü khülangnü khülang ki mükükheangnü, bukmakhiukshihnü yungsho mulungkhangnü.