Read Yimchungru Naga Efisia 1 Bible Online

Efisia 1 - Yimchungru Naga bible

Efisia 1

¹Thrünpuh lümkhi hode Jisu Khrista amüsüh-thsangyurü Paul kilimnü, Jisu Khrista ching thiyuro lakhi amüsührü kilim:

²Isa Abuh Thrünpuh tüsho Atungpuh Jisu Khrista kilimnü nüsa kilim amüthsüm tüsho mungtsü laang.

³Yinmi kiulongthsü ching me müngühmühibo Khrista ching isa müngühjihbuh, isa Atungpuh Jisu Khrista Abuh Thrünpuh shiang.

⁴Api miki isa amüsüh tüsho areak mükihde alapü alomi khimtan müngühnü apinü isa api lung mokhit.

⁵Api lümkhi ayannü Jisu Khrista hode isa api tsührü thsüpü lümjung,

⁶ju apinü muzhodakbuh lung isa kheak akeangnü ajihkhi api müretahkhi amüthsüm shijihpü lakheah.

⁷Api amüthsüm lakhit ayannü neakbo bahjihkhi api thiyih hode api kheak isa rhokhitkhi lah,

⁸ju apinü lümlung tüsho anikhitkhi ching isa suhdahde kamshih.

⁹Tüsho Khrista ching apinü alümkihkhi atsü yande api aram lümkhi isa ki mükheahshih,

¹⁰junangde yinmi ching tüsho alomi kheak lüpdükhi api kheak arihpü kim-khiukkhi lümkhi thsü.

¹¹Lüpdükhi api lümthiyan yande rhimobah, api lümkhi yande akhujungkhinü, isanü api lung yamrüplurüp ngü,

¹²junangde isa akhuhde Khrista kheak kinrü ju api müretah shijihpü thsungkheak labah.

¹³Nüsanü akhümkhit thiyusheakatsü thiyuro so dunglim api kheak kin; kheaküshe nüsanü api kheak kinde, alokhikhi Amüsüh Menü amütsan yüm.

¹⁴Me ju api müretah shijihpü isanü lakhit-kukruk muluyi khiungde isa yamrüplurüp ngüpü thiyuchihchim lah.

¹⁵Jumonü inü she, Jisu Khrista ching nüsa akin tüsho amüsührü alala thsungkheak nüsa amuzho so dunglim,

¹⁶I tamkhüntamnü ching nüsa tamde nüsa thsungkheak makshe jihpü anüzhak müthsü:

¹⁷junangde isa Atungpuh Jisu Khrista Thrünpuh, müretah Abuhnü lümlung me tüsho api mükheahkhi ching amikheak akhiukkhi nüsa kilim jihbah,

¹⁸nüsa anikhitpü mük khimshuhjihbah, junangde apinü ajikhi mulonglam, amüsührü lung api yamrüplurüp müretah lakhitbo nüsanü amükheahbah,

¹⁹tüsho tümü ju api wu ato rhimokhi yande akinrü isa kilim makekhukkhi api sühmüh tokhi la,

²⁰küpü apinü ashe chingnü arhang kamloshihchoki tüsho yinmi kiulongthsü ching akhah tsülim binshihchoki Khrista kheak rhimokhea,

²¹thiyuzüng, thiyukhümsühmüh, yakzan shuhkhi, tüsho ha lün ching lang yungde arüpü lakhi ching she mung jia lakhi alala kumung changlah;

²²tüsho apinü alala api jing khüp yüzahshih, tüsho borü thsungkheak alala kumung api aku kamshih.

²³Borü ju Khrista pang, alala mishihbuh api abanathsangkhi lah.