Read Yimchungru Naga Efisia 4 Bible Online

Efisia 4 - Yimchungru Naga bible

Efisia 4

¹Jumonü I Atungpuh thsungkheaknü aramrünü nüsa küpü ching jia lanü ju thülünde rhangdung lapü nüsa ki tuthsukchoh,

²azhihayihde tüsho tsüyihde, arümkheamde, amuzho ching khülangnü khülang arümkheamachihde,

³mungtsü shuründe Me arihako lapü mulong jihang.

⁴Nüsa mulonglam khülang ching jia lakhi nangde pang khülang tüsho Me khülang,

⁵Atungpuh khülang, akin khülang, baptikhi khülang,

⁶Thrünpuh khülang tüsho alala kumung tüsho alala ching labuh isa alala Abuh.

⁷Tüshe Khrista thsambah adünkhi yande isa aban kilim amüthsüm jih.

⁸Jumonü ha tha, “Küyimki api achang kheak yükihkheanü apinü aramrü boto khülang be tüsho apinü mihtsürübo kilim thsambahbo jih.”

⁹(Api wutukhi amütsan tümü a? Ha amütsan akhuhde api alomi abobe ching aki.

¹⁰Jumonü alomi alala mishihpü thsüde shepü akikheanü, thüningbo alala hode awutubuh ju khülang lang ah.)

¹¹Tüsho api thsambahbo ju khürü amüsühthsangyurü, khürü wukihrü, khürü thsangyuthsangrarü, khürü namfimihnu neakrü tüsho thsangyurü,

¹²tankih rhimo thsungkheak amüsührü düküngshihpü, Khrista pang zokihshihpü,

¹³isa alala akin arihako tüsho Thrünpuh tsührü mükheahkhi mukhiungyi khiungde, tüsho Khrista trungdung akekhitkhi ching mihzo mükamyi khiungde;

¹⁴junangde kheaküa isa thsunga yüla arüla de tüsho kingaün-yakzan apungnü yünde, arü rük amütsü ching azürü nangde müla.

¹⁵Tüshe amuzho ching thiyuro thade, Khrista aku thsübah alakhi limro aban ching isa zokihbah.

¹⁶Api kilimnü pang abümnü, müchina tüsho awuhrupung wuhrude, shihcham thsükhi abannü tsüde rhimosho, pang abümnü zochoh tüsho amuzho hode aküdahnü zokihchoh.

¹⁷Kheaküa khiungkerü amüthülünkhi lümkhi nangde nüsa düla de inü Atungpuh mung chingnü mütsande thachoh;

¹⁸arü mulong müküpde arü kheak yakli mümükheahkhi lakhi hode arü lümkhi mitingde, Thrünpuhnü ajihkhi rhangdung chingnü chamkhibah lah;

¹⁹achihayak alala dükheakabahbah mutukzhakde alü amümüsüh rhimopü arünü amütsübe kamabah.

²⁰Nüsanü Khrista manikhitdebahdo!

²¹dükdüpüa nüsanü api dünkheak sodo tüsho Jisu kheak lakhi thiyuro nüsa ki thsangyudo.

²²Khakhih nüsa rhangdung yakli tüsho mülapmüji shihkünkhi hode athsümünimkhi bahang,

²³tüsho nüsa mulong tüsho lümkhi aso kamloang,

²⁴tüsho thiyuro-lungki tüsho amüsüh ching Thrünpuh kiphahkhi ching thrünkhi yakli aso khümyukang.

²⁵Jumonü arükchih lakhi bahbah mihbüm abannü yamhingrü ki thiyuro thaang, tümüde isa rukhüh kheyukrü ah.

²⁶Nü bukakhiukkhi ching neak düyihbeak; nü bukakhiukde ani düyüzahshih,

²⁷tüsho amünean kilim kim düjih.

²⁸Ahührünü kheaküa dahüh, tüshe apinü rhimoang, api khahnü thiyuro rhimo rhimoang, junangde apinü küpkhukrü kilim jihpü kukbah.

²⁹Asorü kilim amüthsüm ngüde alü thsüpü yihnüpü atsü kheak hode nüsa mün chingnü amütsü dakhiukshih.

³⁰Arhokhitpü nimung thsungkheak nüsa yümkih-a lakhi Thrünpuh Amüsüh Me mulong dütukthsüshih.

³¹Akhüh, mulong zhipzhip, bukakhiuk, alanaji tüsho dünthamungtha athsümünim alala bede bahang,

³²tüsho Khrista ching Thrünpuhnü nüsa neak bahjihkhi nangde khülangnü khülang neak bahachihde, amuzho mulongnü khülangnü khülang muzhoachihang.