Read Yimchungru Naga Efisia 5 Bible Online

Efisia 5 - Yimchungru Naga bible

Efisia 5

¹Jumonü amuzhokhi tsührübo nangde Thrünpuh kheahkhirü thsang.

²Tüsho Khristanü isa muzhode tüsho isa thsungkheaknü rhümthüneade Thrünpuh kilim api shuhmülanga jihkhi nangde amuzho ching laang.

³Tüshe nüsa bolung müzammüram tüsho mümüsühkhi alala yungsho yihnelune athashe müthabeah, tümütüsho amüsührü bolung ju maye.

⁴Amayekhi chihkhüh, yanchoyu, yungsho keangthsükeanglü dülashih; tüshe ju müthri makshe jihkhi lashang.

⁵Müzammüram, amümüsüh mihtsürü, yihnelunerü (sangthsü kingaünrü) sheshe Khrista tüsho Thrünpuh kiulongthsü ching yamrüplurüp müla de mütsanang.

⁶Shenü she thiyu akeangkeangnü nüsa dümülapyukshih, tümüde hadürü hode mihyumanirübo kheak Thrünpuh mulong zhipzhip arüchoh.

⁷Jumonü arü lung datruachih,

⁸tümüde nüsa khülangki amiting ching lakheah, tüshe kheakü nüsa Atungpuh lung ayin ching lah; ayin tsührübo nangde laang

⁹(tümüde ayinatrüm sangaso ju atsü, alungki tüsho thiyuro alala ching ngüchoh),

¹⁰tüsho Atungpuh asühshihbe anikhitpü mürangang.

¹¹Amiting rhimobo ching shihcham dülu, tüshe jurü yinde kamshang.

¹²Tümüde arünü jikde athakhi she achihbe lah;

¹³tüshe küyimki ayinnü tümükhüh yinde akamshihbanü ju ngükhukde kamchoh, tümüde ngükhukde akamkhi ju ayin ah.

¹⁴Jumonü ha tha, “O ayaprübo asürang, tüsho ashekhi chingnü asürang, tüsho Khristanü nüsa kilim ayin jihbah.”

¹⁵Lümlung mülarü yung tüshe lümlung larü mihtsürü nangde, nü künangde tsahchonü kümkangde kheahang,

¹⁶kim alala tsüde ahoriang, tümütüsho nimungbo amütsü lah.

¹⁷Jumonü dümakha, tüshe Atungpuh lümkhi tümüanü anikhitang.

¹⁸Tüsho yukhunü dümüshang, tümüde ju athsümünimbe lah; tüshe Menü mishang.

¹⁹Mungshikhünbo, khünbo, tüsho Me khünbo chingnü khülangnü khülang ki thaachihang. Nüsa mulong athrünkhinü Atungpuh ki khün thsang; tüsho khün khungang,

²⁰isa Atungpuh Jisu Khrista mung chingnü lüpdükhi thsungkheak Abuh Thrünpuh kilim kamruhroro makshe jihang.

²¹Khrista ki wüntre jihkhi hode khülangnü khülang bukkhüp laang.

²²Niuberübo, Atungpuh ki nangde nüsa niubuhrü bukkhüp laang.

²³Khrista ju api pang borü aku tüsho akhümkhitrü thsükhi nangde, niubuhrü ju niuberü kumung aku ah.

²⁴Borü ju Khrista bukkhüp lakhi nangde, niuberübonü she lüpdükhi ching niubuhrü bukkhüp labeah.

²⁵Niubuhrübo, Khristanü borü muzhode anihbe thsungkheak api jihkhi nangde nüsa niuberübo muzhoang,

²⁶junangde kenü amüsüh dunglim api yunü anihbe tsangkhitpü thsü,

²⁷tüsho api kilim borü ju müretahde, areak yungsho aduhrhuh, yungsho judürü püpü mülade alabah, junangde anihbe lapha mükihde amüsüh labah.

²⁸Junangde niubuhrübonü nihbuh pang nangde arü niuberübo muzhobeah. Shepünü niuberü muzhochonü nihbuh muzhochoh.

²⁹Tümütüsho shenü she nihbuh pang müthraneanchoh, tüshe Khristanü borü ki rhimokhi yande kipduhchoh tüsho kümchoh,

³⁰tümütüsho isa ju api pang ching kheyukrü ah.

³¹“Jumonü athrürünü nihbuh abuh tüsho abe zojihbah tüsho aniube lung thsürua labah, tüsho ane shihphü khülang kambah.”

³²Ha aramyu asük khülang ah, tüsho ha Khrista tüsho borü dünkheak ah de inü thachoh;

³³tüshe nüsa mihbüm abannü nihbuh nangde niuberü muzhobeah, tüsho niuberünü nihbe niubuhrü muzhobeah.