Read Yimchungru Naga Efisia 6 Bible Online

Efisia 6 - Yimchungru Naga bible

Efisia 6

¹Azürübo, nüsa berübuhrü ki mihyuaniang, tümüde ha alungki lah.

²“Nü buh tüsho nü be wüntreang,” ha alokhikhi thiyuzüng akhuhbe lah:

³“Junangde nüsa tsüde alabah tüsho alomi ching kutsüp ashang labah.”

⁴Buhrübo, nüsa tsührübo bukakhiukpü thsüde düthürüh, tüshe adanyukkhi tüsho Atungpuh thsangdankhi ching arü mütrükhitang.

⁵Yamlarübo, Khrista ki nangde trede tüsho ajande, mulong khülangnü nüsa alomi putungrübo ki mihyuaniang;

⁶mihtsürü asühshihrü nangde müknü angükhi tankihkhi limro ching yung, tüshe Khrista tankihrü nangde mulong chingnü Thrünpuh lümkhi rhimode,

⁷lümkhi atsünü tankihkhi mihtsürü kilim yungde Atungpuh kilim nangde,

⁸tümütüsho azhorü yungsho zuzu larü thsüthsü, sherünü tümüpürü atsü rhimobanü, apinü ju nangde Atungpuh kilimnü aleangkhibah de nüsanü mükheahlah.

⁹Aputungrübo, junangde nüsa yamlarübo ki rhimoang. Arü dümüzün, tümütüsho shepü arü le nü Putungrü chidoanü yinmi ching lah, tüsho api kheak jakkheahkhi müla.

¹⁰Akheamde, Atungpuh tüsho wuto sühmüh ching düküngang.

¹¹Thrünpuh thirithsü zülu alala yihang, junangde nüsanü amünean lümkhi azhihde azhipkhukbah.

¹²Tümüde isanü shochihkhi ju shih tüsho thiyih azhihde yung, tüshe yakzanshuhrübo, thiyukhüm-sühmühbo, ha amiting lomi wubo tüsho yinmi kiulongthsübo ching amüneanbo me thrungkhibo azhihde ah.

¹³Jumonü Thrünpuh thirithsü zülu alala luang, junangde amütsü nimung arüchoki nüsanü azhipkhukbah, tüsho alala rhimo dunglim düküngde azhipbah.

¹⁴Jumonü thiyuronü nü chim rümang, tüsho thiyuro-lungki treangkhümbe yukbah zhipang,

¹⁵tüsho mungtsü thiyusheak-atsü kukruknü nü jing khümang;

¹⁶harü kheak khiode, amünean yo motru hühzo alala yihmütkhukpü thsüde akin tsung luang.

¹⁷Akhümkhit kuthran luang, tüsho küpü Thrünpuh yu lanü, Me nukshang luang.

¹⁸Kim alala ching tamkhüntamnü mungji alala tüsho amushukhi bede Me chingnü tamkhüntamnüang. Ju khiungde amüsührü alala thsungkheak mushujihde aroride kurhangang.

¹⁹I thsungkheak she tamkhüntamnüjang, junangde thiyusheak-atsü mulong tode azhiyukpü I mün khimshuhkhi ching thiyusheak jihbah,

²⁰ju thsungkheak I arhükkhi ching limburü ah; junangde inü athapü lakhi yande mulong tode ju khipkhitbah.

²¹Kheakü I küde la tüsho I tümü rhimochonü nüsanü amükheahpü thsüde, amuzho keoniorü tüsho Atungpuh tankihkhi ching thiyuro lakhi Takikanü lüpdükhi nüsa ki thabah.

²²Ha lümkhi thsungkheaknü inü api nüsa kilim thiyido, junangde isa küde lanü nüsanü amükheahbah, tüsho apinü nüsa mulong toshihbah.

²³Abuh Thrünpuh tüsho Atungpuh Jisu Khrista kilimnü mungtsü tüsho akin bede amuzho lashang.

²⁴Isa Atungpuh Jisu Khrista atsütsünü amuzhorü alala kilim amüthsüm laang.