Read Yimchungru Naga Filipi 3 Bible Online

Filipi 3 - Yimchungru Naga bible

Filipi 3

¹Akheam ching, I keoniorübo, Atungpuh lung asühang. Nüsa kilim ju rukhüh thrütlopü I küpkhuk müla, tüsho ha nüsa kümrü lah.

²Khihnubo, amütsü rhimorü, shih thsümünimrü aheangang.

³Tümüde isa ju me ching Thrünpuh kingaünrü, Jisu Khrista ching müretahrü, tüsho shih ching mulongram mülakhi thiyuro tsütabahkhi lah.

⁴Judüalalashe inü she shih ching mulongram lakhi amütsan lah. Mihtsürü khürünü shih ching mulongram lakhi thsungkheak api amütsan lah de lümsho, I alü thsüde lah:

⁵tizheah nipü tsütabah, Israel mihtsürü, Benjamin trük, Ibrirü zübekhi lah; yakzan yandüa Pharisi,

⁶mulong sümsüm yandüa borü thsümüchirü; thiyuro-lungki yandüa yakzan bukkhüp amudopü müla.

⁷Tüshe tümüpürü I alü thsükheanü kheakü inü Khrista dünkheaknü kukshahkhi de lümchoh.

⁸Jisu Khrista I Tungpuh de amükheahkhi ching khide athülün lakhinü inü lüpdükhi kukshahkhi khechoh. Tümüde api dünkheaknü alala kukshahkhi inü thsünü, tüsho jurü sünit khejihchoh, junangde inü Khrista alü thsübah

⁹tüsho yakzan yande I küdahnü thiyuro-lungki kamkhi yung tüshe Khrista ching akin hode akin kheak ningkihkhi Thrünpuh kilimnü arükhi thiyuro-lungkinü I api kheak ngübah;

¹⁰junangde inü api tüsho arhang kamlokhi wu mükheahbah tüsho api shekhi ching api ruk kamde thsünükhi ching shihcham lubah,

¹¹junangde kuksho ashe chingnü arhang kamlokhi khiungbah.

¹²I ha ngüabahdo yungsho I khiukdahabahdo de yung; tüshe inü ju tholopü mürangchoh, tümütüsho Khristanü she I tholodo.

¹³Keoniorübo, ha inü tholodo de mülüm; tüshe inü khülang rhimokhi ju, dunglim tümü lanü mihababahbah müngüh tümü lanü akhiungpü thsüchoh.

¹⁴Jumonü inü Jisu Khrista hode Thrünpuhnü ajikhi akulim thsambah ngüpü langakindo münchi lim alihchoh.

¹⁵Isa sherü azorüanü ha lümbeah; tüsho nüsa lümkhi püpü lasho Thrünpuhnü nüsa ki mütsanjihbah.

¹⁶Isanü khiunga lakhi thiyuro ju lang tholoanü.

¹⁷Keoniorübo, I kheahkhiang, tüsho isanü nüsa kilim jihkhi yakli yande sherünü lachonü mütsanang.

¹⁸Püpüki inü alochode nüsa ki thado tüsho kheaküshe chike bukde thachoh, ahihkhühnü Khrista sangkim yo thiriri thsüde lachoh.

¹⁹Arü akheam ju athsümünim, arü thrünpuh ju buk, tüsho arü müretah ju arü achihbe, alomi kukrukbo kheak lümkhi zolah.

²⁰Tüshe isa mihkhung jua yinmi ching lah, tüsho ju chingnü isanü akhümkhitrü, Atungpuh Jisu Khrista aleangchoh.

²¹Apinü anihbuh yakzan bukkhüp lüpdükhi hande arükhukkhi wu hode isa reangmüzahkhi pang müthrijihbah tüsho müretahkhi api pang nangde akamshihbah.