Read Yimchungru Naga Filipi 4 Bible Online

Filipi 4 - Yimchungru Naga bible

Filipi 4

¹Jumonü inü muzhokhi tüsho lümrhihkhi, I asühkhi tüsho I kuthran, I keoniorü, inü muzhokhi müyamrübo Atungpuh lung düküngde zhipang.

²Inü Euodia tüsho Syntake ki keoniorü nangde Atungpuh lung arihang de mushuchoh.

³Tüsho harü liberübo rungpü nüsa rukhüh rhimorü ki she inü keokhichoh, tümüde arünü Klement tüsho rhangdung hüm ching mungbo thrüta lakhi püpürü I lung rukhüh rhimorü lung thiyusheak-atsü ching banthsangde rhimodo.

⁴Atungpuh lung kamruhroro asühang; inü thalochoh, asühang.

⁵Nüsa arümkheamachihkhi alalanü mükheahshang. Atungpuh thüninde lah.

⁶Tümü thsungkheak she mulong düsansan, tüshe lüpdükhi ching tamkhüntamnüde tüsho makshe jihde amushukhibo Thrünpuh ki mükheahshang.

⁷Tüsho anikhitkhi alala kihode alakhi Thrünpuh mungtsünü Jisu Khrista ching nüsa mulong tüsho lümkhibo aheangbah.

⁸Akheam ching, keoniorübo, tümüpürü thiyuro la, tümüpürü wüntrepü la, tümüpürü alim la, tümüpürü atsangkhit la, tümüpürü akhamkhi la, tümüpürü amuzho la, tümüanü atsüdak lasho, tümüanü mungshipü thülünde lasho, judürü dünkheak lümakheahang.

⁹Nüsanü I kheaknü tümü anikhitde, leangkhide, sode tüsho ngüdünü rhimoang; tüsho Thrünpuh mungtsü nüsa lung labah.

¹⁰Nüsanü akheam ching I lümrhihkhi aso kamlokhi Atungpuh lung inü tode asühchoh; nüsanü I thsungkheak lümrhihde lado, tüshe nüsa kim müngüde lado.

¹¹I yihnüpü lamonü ha thachoh yung, tümütüsho tümütümü kuhi thsüthsü she I reangkeampü inü anikhitdo.

¹²Tümü yihnüpü labea tüsho suhdahbeanü inü mükheahlah. Kuhi tümükhüh ching yungsho alala ching bukthsüpü tüsho akhümpü, suhdahpü tüsho mülamüthsüpü inü anikhitdo.

¹³I sühmüh jihbuh hode inü lüpdükhi thsükhuklah.

¹⁴Tüshe I küpkhukbo ching nüsanü arungkhi ju nüsa tsüdakkhi lakheah.

¹⁵Thiyusheak atsü atankih ching, I Macedonia chingnü akhinchoki, nüsa kheak hode ajihpü tüsho aleangkhipü ching borü shenü she I lung matrurungde nüsa Filipirünü mükheahlah;

¹⁶Tesalonika ching she nüsanü alochode I kilim arung mühah.

¹⁷Ju inü thsambah yimkhi yung; tüshe nüsa alü thsükhi ching bukhi sangaso inü yimchoh.

¹⁸Inü khiukde tüsho alü she leangkhido; nüsanü amühahkhi thsambahbo rhümthünea kingaün aleangkhikhukbe, shuhmülanga jihbe tüsho Thrünpuh asühshihbe Epaphrodita kilimnü leangkhibah I suhdahde lah.

¹⁹Jisu Khrista ching api müretahkhi lakhit ayannü I Thrünpuhnü nüsa yihnüpü lüpdükhi jihbah.

²⁰Isa Abuh Thrünpuh kilim lünnü lün müretah thsang. Amen.

²¹Jisu Khrista ching amüsührü aban ki salüm. I lung lakhi keoniorübonü nüsa kilim salüm jihchoh.

²²Amüsührü alala, adungto thsüde Kaesar yamkhünnü nüsa kilim salüm jihchoh.

²³Atungpuh Jisu Khrista amüthsüm nüsa alala lung laang.