Read Yimchungru Naga Kolosi 3 Bible Online

Kolosi 3 - Yimchungru Naga bible

Kolosi 3

¹Nü Khrista lung arhang kamlokheasho, Thrünpuh khah tsülim Khrista bina lapung, akulim kukrukbo yimang.

²Alomi ching lakhi kukrukbo kheak yungde, akulim lakhi kukrukbo kheak nüsa lümkhibo zoang.

³Tümüde nü shedo, tüsho nü ju Khrista lung rhangdung Thrünpuh kheak jika lah.

⁴Küyimki isa rhangdung lakhi, Khrista akhiukbanü, nü she müretahkhi ching api lung akhiukbah.

⁵Jumonü tümüpürü nü kheak alomi yakli lanü sheshang: müzammüram, mümüsühkhi, amürühkhi, amütsü künkhi tüsho küpü sangthsü kingaünkhibo la, ju yihnelune.

⁶Harü dünkheaknü Thrünpuh bukakhiukkhi arüchoh.

⁷Küyimki nü harü ching lakheanü, khülangki nünü arü yande tsahdo.

⁸Tüshe kheakü alala chamkhia bahang: bukakhiuk, mulong zhipzhip, lungchihlunghean, dünthamungtha, nü mün chingnü makhamaleak thakhi.

⁹Khülangnü khülang ki akeangyu dütha, tümütüsho nüsanü awün yakli rhimobo bahdo,

¹⁰tüsho athrünrü mejak yande mükheahmudu ching aso kamlokhi yakli aso yihbah.

¹¹Ha ching Greek tüsho Jehudarü, tsütabahkhi tüsho tsütamübahkhi, yakzan mülakhi mihtsürü, yakli mümükheahrü, azhorü tüsho zuzu de müla, tüshe Khrista ju alala, tüsho alala ching lah.

¹²Thrünpuhnü mokhitkhi, amüsüh tüsho amuzhokhi a le, amuzho, tsüyihkhi, aninirü kamkhi, azhihayih tüsho arümkheam yihang,

¹³khülangnü khülang arümkheamachihde, tüsho khürünü püpürü azhihde atsangpü lasho, neak bahachihang; Atungpuhnü nüsa neak bahjihkhi nangde nüsanü she neak bahjihbeah.

¹⁴Tüsho harü alala kurungkheak, tsüdakde arihakokhi ching lüpdükhi rhükrukhi amuzho yihang.

¹⁵Tüsho nüsa pang khülang ching jikhi, Khrista mungtsünü nüsa mulongbo ching yakzan shuhshang. Tüsho makshe jihde laang.

¹⁶Khrista yusheaknü lümlung alala ching, khülangnü khülang thsangyude tüsho thsangdanachihde nüsa kheak suhdahde lashang, tüsho nüsa mulong ching Thrünpuh kilim makshe jihde mungshikhünbo, khünbo tüsho me khünbo thsang.

¹⁷Tüsho nüsanü tümüpürü rhimobeanü thiyu yungsho rhimo thsüthsü, Abuh Thrünpuh kilim api hode makshe jihde lüpdükhi Atungpuh Jisu mung chingnü rhimoang.

¹⁸Niuberübo, Atungpuh kheak ayekhi nangde nüsa niubuhrü bukkhüp laang.

¹⁹Niubuhrübo, nüsa niuberübo muzhoang, tüsho arü kheak müküpde düla.

²⁰Tsührübo, lüpdükhi ching nüsanü berübuhrü ki mihyuaniang, tümüde hanü Atungpuh asühshihchoh.

²¹Buhrübo, nüsa tsührübo bukdakhiukshih, jude yungsho arü mulong ninide akambah.

²²Yamlarübo, lüpdükhi ching nü yo aputungrübo ki mihyuaniang; arünü nü kheahde alachoki tüsho arünü amuzhoshihpü lang yung, tüshe mulong jihde tüsho Atungpuh wüntrede ju rhimoang.

²³Nünü tümüpürü rhimobanü, mihtsürü thsungkheak yungde, Atungpuh thsungkheak rhimokhi nangde nü mulong alalanü rhimoang,

²⁴tümütüsho yamrüplurüp thsambah Atungpuh kilimnü aleangkhibah de nünü mükheahlah; nü a Atungpuh Khrista tankihchoh.

²⁵Tümüde amülim rhimorü ki, apinü amülim rhimokhi dün jihlobah, tüsho jakkheahkhi müla.