Read Yimchungru Naga 1 Tesalonika 2 Bible Online

1 Tesalonika 2 - Yimchungru Naga bible

1 Tesalonika 2

¹Keoniorübo, isanü nüsa rhua kheahkhi akeangkeang yung de nüsanü mükheahlah;

²tüshe isa Filipi ching küpkhukde achih ngüa lalashe, azhihkhi ato mikhuh ching Thrünpuh thiyusheak-atsü nüsa ki khipkhitpü isa Thrünpuh kheak isa mulong tode alakheah de nüsanü mükheahlah.

³Tümüde isanü amushukhi ju alakmihkhi yungsho mümüsühkhi, yungsho rük thsüde yung;

⁴tüshe isa kheak thiyusheakatsü reangkihjihpü Thrünpuhnü amulongkhi nangde mihtsürü asühshihpü yung tüshe isa mulong rükakheahbuh Thrünpuh asühshihpü isanü asukchoh.

⁵Isanü küyimkishe mülapmüji yubo yungsho yihnelunede müram — Thrünpuh thiyumütsan ah;

⁶yungsho isa Khrista amüsühthsangyurü thsümonü nüsa ki kheangzükheangdoa lalashe, mihtsürü kilimnü, nüsa yungsho püpürü kilimnü isa mungshi müyim.

⁷Tüshe isa ju berünü tsührü kümkhi nangde nüsa lung azhihayihde alakheah.

⁸Jumonü, nüsa khide amuzhokhinü isanü nüsa ki Thrünpuh thiyusheakatsü lang yung tüshe isa nihbuh rhangdung she ajihpü thsakhambah alakheah, tümütüsho isanü nüsa khide muzhode kam.

⁹Keoniorübo, isa rhimokhi tüsho khisahkhi nüsanü lümkhitchoh; isanü nüsa ki Thrünpuh thiyusheakatsü thsangyuthsangrade lachoki, nüsa ki hahmülang müjihpü thsüde isanü azhing ayin rhimodo.

¹⁰Isa künangde nüsa ki amüsüh, thiyurolungki tüsho amudopü mülade nüsa akinrübo ki yakli lakheanü, nüsa tüsho Thrünpuh she isa thiyumütsanbo lah;

¹¹tümüde buhrünü tsührübo ki nangde isanü nüsa aban ki thsangdankhi nüsanü mükheahlah.

¹²Isanü nüsa ki api kiulongthsü tüsho müretahkhi ching nüsa jibuh Thrünpuh ki thülünde rhangdung lapü mulong toshihdo, mulong shukheamdo, tüsho tuthsukde lado.

¹³Tüsho küyimki isa kheaknü nüsanü asokhi yu leangkhikhea, nüsanü ju mihtsürü yu nangde yung, tüshe kheakü nüsa akinrübo kheak rhimode alakhi, atsütsü Thrünpuh yu de aleangkhikhi thsungkheak isanü mutukzhakde Thrünpuh ki makshe jihchoh.

¹⁴Keoniorübo, nüsa ju Judea ching Jisu Khrista lung Thrünpuh borübo kheahkhirü kamdo; tümüde Jihudarü hode arü thsünükhi nangde nüsa nihbuh lomi mihtsürü hode ju ruk thsünüdo,

¹⁵arünü Atungpuh Jisu tüsho wukihrübo chido laksah, isa yankhita bah, tüsho Thrünpuh masühshihde kam tüsho mihtsürü alala azhih,

¹⁶ju khiungkerü ki thabah arü khümkhitbah mütsüle de arünü isa zhipdode arhimokheah. Junangde kamruhroro arü neak mujungde kamshih. Tüshe akheam ching Thrünpuh bukakhiukkhi arü kheak arü.

¹⁷Keoniorübo, lümkhi ching yungde pangnü kim akhihkhüh thsungkheak nüsa kheaknü chamkhia lakhinü, mironü miro nüsa shorupü khide mulong dukde alakheah;

¹⁸isanü nüsa kilim arüpü mulongdo — I Paulnü alochode mürangdo — tüshe amüneannü isa zhipdokheah.

¹⁹Tümüde isa Atungpuh Jisu miki api arüchoki isa mulonglam yungsho asühpü yungsho akükheangkhi amütsan tümü laba? Ju nüsa yung de?

²⁰Tümütüsho nüsa ju isa müretah tüsho asühpü lah!