Read Yimchungru Naga 1 Tesalonika 4 Bible Online

1 Tesalonika 4 - Yimchungru Naga bible

1 Tesalonika 4

¹Akheam ching, keoniorübo, nüsanü künangde alaba tüsho Thrünpuh asühshihbanü isa kheaknü anikhitbah rhimode alakhi nangde alü thsüde rhimoang de Atungpuh Jisu mung chingnü nüsa ki mushude tuthsukchoh.

²Tümüde Atungpuh Jisu hode isanü nüsa kilim thsangdankhi tümü jihkheanü nüsanü mükheahlah.

³Nüsa tsangkhitpü ju Thrünpuh lümkhi lah: junangde nüsanü müzammüram bahkhibeah;

⁴nüsa mihbüm abannü amüsüh tüsho wüntre ching nihbuh niuberü lung lapü mükheahbeah,

⁵Thrünpuh mümükheahrü amükinrü nangde shihkünkhi ching yung;

⁶junangde mihtsürü shenü she hadürü ching nihbuh keoniorü ki müthsümünim, tüsho amülim müthsü, tümütüsho isanü nüsa ki amüngühnü düh de athakhi nangde harü alala ching Atungpuh ju royimrü lah.

⁷Tümüde Thrünpuhnü mümüsühde alapü yungde amüsüh ching lapü isa jikheah.

⁸Jumonü sherünü ha bahyukchonü mihtsürü yungde nüsa kilim Amüsüh Me jihbuh Thrünpuh bahyukchoh.

⁹Tüshe keoniorü muzhopü dünkheaknü khürünü nüsa ki thrütpü thsüde yihnüpü müla, tümüde khülangnü khülang muzhoachihpü Thrünpuhnü nüsa ki thsangyudo.

¹⁰Tüsho atsütsü nüsanü Macedonia ching keoniorü alala muzhochoh, tüshe keoniorübo, nüsanü alü thsüde arhimopü tuthsukchoh.

¹¹Isanü nüsa ki thakhi nangde, akhimahe rhangdung lapü, nüsa nihbuh shothsümolo lümpü tüsho nüsa khahnü arhimopü nüsa mükkheahkih thsang,

¹²junangde nimung aban nü rhangdung lakhinü aleangkheakrü wüntre ngübah tüsho she kheak she nü düthsün angüde müla.

¹³Keoniorübo, shea larü dünkheak nüsanü mümükheahde mülashihne, yungsho mulonglam mülakhi mihtsürübo nangde mulong murozhakshihne.

¹⁴Tümütüsho Jisu shebah arhang kamlokheah de isanü kinlah, junangde Jisu hode Thrünpuhnü api lung asherübo bede arübah.

¹⁵Tümüde isa sherü Atungpuh arüpü khiungde rhangdung lanü asherü kheaknü akhuhde müyü de Atungpuh yu hode isanü nüsa ki khipkhitchoh.

¹⁶Tümütüsho Atungpuh ju thiyukhüm jihkhi zhide, yunirü-atobuh düsheak thsüde, tüsho Thrünpuh yo hulipungpung mütde yinmi chingnü akibah. Tüsho Khrista ching shea larü akhuhde asürübah;

¹⁷judüki isa aninga larü, thüning ching Atungpuh shorupü arü lung amo ching rukhüh bemukhungbah tüsho isa lünnü Atungpuh lung labah.

¹⁸Jumonü harü yubonü khülangnü khülang mulong shukheamachihang.