Read Yimchungru Naga 1 Tesalonika 5 Bible Online

1 Tesalonika 5 - Yimchungru Naga bible

1 Tesalonika 5

¹Tüshe keoniorübo, kim tüsho nimung thsungkheaknü nüsa ki thrütpü tümü yihnüpü müla.

²Tümüde Atungpuh nimung ju azhing ching ahührü khülang nangde arübah de nüsanü mükheahlah.

³Küyimki mihtsürünü, “Mungtsü tüsho akhümkhit” de athabanü mübünkeangkhi liberü kheak zübethsünükhi nangde zukleangnü arü kheak athsümünim arübah, tüsho arü mutsokhide alabah.

⁴Tüshe keoniorübo, ha nimungnü ahührünü nangde nüsa müyinsahshihpü thsüde nüsa amiting ching müla.

⁵Tümüde nüsa alala ayin tüsho animung tsührübo ah; isa ju azhing yungsho amiting yo yung.

⁶Jumonü püpürü nangde isanü müyapnü tüshe isanü kurhanganü tüsho rhüngrhüngde danyukanü.

⁷Tümüde sherünü yapchonü azhing ching yapchoh, tüsho sherü müshangchonü azhing ching müshangchoh.

⁸Tüshe isa ju animung yo a le, isanü rhüngrhünganü, tüsho akin tüsho amuzho treangkhümbe yihanü, tüshe akhümkhit mulonglam thsungkheak yinchikuthran thrananü.

⁹Tümüde Thrünpuhnü isa bukakhiukpü thsungkheak yung, tüshe isa Atungpuh Jisu khrista hode akhümkhit ngüpü mokhit.

¹⁰Isa arhang lalashe yungsho shea lalashe api lung isa rukhüh lapü thsüde isa dünkheaknü api she.

¹¹Jumonü nüsanü rhimode alakhi nangde khülangnü khülang tuthsukachihang tüsho shuhkihachihang.

¹²Tüshe keoniorübo, nüsa bolung rhimorü tüsho Atungpuh lung nüsa limbede thsangdanrü ki wüntre jihang de nüsa ki mushuchoh,

¹³tüsho rhimo dünkheaknü amuzho ching khide changde arü ki wüntre jihang. Nüsa bolung mungtsü laang.

¹⁴Keoniorübo, yomuhyothsünrü athsunganahpü, mulong ninirü yanmusupü, reangmüzahrü rungpü, arü alala kheak arümkheampü isanü nüsa ki tuthsukchoh.

¹⁵Nüsa shenü she amütsü müthri amütsü müjihlopü mütsanang, tüshe kamruhroro khülangnü khülang tüsho alala ki atsü rhimopü yimang.

¹⁶Kamruhroro asühachihang,

¹⁷müdüchingde tamkhüntamnüang,

¹⁸kuhi alala ching makshe jihang, tümüde ha nüsa thsungkheak Jisu Khrista ching Thrünpuh lümkhi ah.

¹⁹Me dümütshih,

²⁰müchitkhi mükhemükim düthsü,

²¹tüshe lüpdükhi rükakheahang; tümü atsüanü düngde ramrihang,

²²amütsü mungjibo chingnü bahkhiang.

²³Thrünpuh mungtsünü nüsa abümnü tsangkhitshang; tüsho isa Atungpuh Jisu Khrista arüchoki nüsa me rhangdung tüsho pang areak mükihde zoang.

²⁴Shepünü nüsa jichonü thiyuro lah, tüsho apinü ju rhimobah.

²⁵Keoniorübo, isa thsungkheak tamkhüntamnüjang.

²⁶Amüsüh mün müthsüpkhinü keoniorü alala ki salüm jihang.

²⁷Ha kihüm keoniorü alala ki kheang de Atungpuh hode inü nüsa ki mushuchoh.

²⁸Isa Atungpuh Jisu Khrista amüthsüm nüsa lung laang.