Read Yimchungru Naga Jihu 10 Bible Online

Jihu 10 - Yimchungru Naga bible

Jihu 10

¹Jirikho tüsho kiulongthsüpuh yanabahkhi ruk, Jihusuanü Ai tüsho kiulongthsüpuh yando de Jirusalem kiulongthsüpuh Adonizedeknü so. Tüsho Gibeonrünü Israelrü kheak mungtsüde arü bolung lah de apinü so.

²Ha sobah mihtsürübonü tode arhunganim tümütüsho Gibeon ju kiuto ato; ju Ai kheaknü atobe, tüsho mihtsürübo ju athrungrübo lakheah.

³Jumonü Jirusalem kiulongthsüpuh Adonizedeknü ha yusheak Hebron kiulongthsüpuh Hoham, Jarmuth kiulongthsüpuh Piram, Lakish kiulongthsüpuh Japhia, tüsho Eglon kiulongthsüpuh Debir kilim yüshihde tha:

⁴“ Gibeon yanpü thsungkheaknü arübah I rungang, tümüde arünü Jihusua tüsho Israelrü kheak mungtsü thsüdo.”

⁵Judüki Amorrü kiulongthsürü phüngü, Jirusalem, Hebron, Jarmuth, Lakish, tüsho Eglon kiulongthsürü bolung thirithsürübo bebah Gibeon zündo tüsho bede keochih.

⁶Tüsho Gibeonrünü Gilgal binkheampung ching Jihusua kilim thiyusheak yüshih, “Nü yamlarübo dübahyuk; isa kilim nahde atuang, isa khümkhitang, tüsho isa rungang; tümüde awung lomi ching larü Amorrü kiulongthsürü alala isa azhihde shomukhunga lah.”

⁷Jumonü Jihusua tüsho api bonungrü athrünkhi lung, athrungrübo bebah Gilgal chingnü tsahmusu.

⁸ATUNGPUHNÜ Jihusua ki tha, “ Arübo dütre, tümüde inü arübo nü khah ching jihdo; arübo shenü she nü azhihde müzhipkhuk.”

⁹Jumonü Jihusuanü tsüngreroro Gilgal chingnü tsahmusubah zukleangnü arü kheak arü.

¹⁰Tüsho ATUNGPUHNÜ arübo Israel müngüh yingyingde kamshih. Israelrübonü arü Gibeon ching laksah tüsho yande Beth-horon wutu limro khiung, tüsho Azeka le Makkeda khiungde laksah.

¹¹Küyimki Amorrü ju Israel bonungrü müngüh alihde yükheanü, ATUNGPUHNÜ arü kheak Beth-horon chingnü Azeka khiungde aru keamkhishih. Israelrü thsühnuknü alaksahkhi kheaknü arunü akingsahkhi ahihbe lakheah.

¹²ATUNGPUHNÜ Israel mihtsürü kilim Amorrü kheak akuk ngüshihkhi nimung mihtsürübo lungnü Jihusuanü ATUNGPUH ki tha, “ Ani, Gibeon kumung dütsahde zhipang; khinu, Aijalon jindükhün ching zhipang.”

¹³Ha trüknü arü riri mukukyikia aninü zhikde zhip tüsho khinunü maphap. Ha Jasher Hüm ching thrüta lah. Aninü thüning phulung zhikde zhip tüsho nimung khülang bande müyüzah.

¹⁴ATUNGPUHNÜ mihtsürü khülang düsheak anikhi hadürü nimung küyimkishe dünjia mükheah; tümüde ATUNGPUHNÜ Israelrü thsungkheak keochih!

¹⁵Judüki Jihusua tüsho Israelrü alala Gilgal binkheampung ching yülo.

¹⁶Judüki Amorrü kiulongthsürü phüngü ju tsokhitde yünü Makkeda lungkhün ching jik.

¹⁷Tüsho Jihusua ki tha, “ Kiulongthsürü phüngü Makkeda lungkhün ching jika lakhi ngüdo.”

¹⁸Apinü tha, “Lungkhün ripit ki ju lung atokhüh lah-a yüzahshang, tüsho ju ching aheangrü khürü zhipang;

¹⁹tüsho nüsa ju kheak düzhip, tahle thiriribo dunglim müshamang; arübo nihbuh kiuto ching düyüzahshih, tümüde ATUNGPUHNÜ arübo nüsa khah ching jihdo.”

²⁰Küyimki Jihusua tüsho Israelrünü arübo mükheamkhamyi khiungde shahde alaksahkhamkhea, tüsho küyimki khürü yünü chipi ayünkhi kiuto ching yüzahkhea,

²¹mihtsürü alala tsüdü lang Makkeda binkheampung ching Jihusua kilim arü; shenü she Israelrü azhihde mütha.

²²Jihusuanü tha, “Lungkhün ju lahashungang tüsho kiulongthsürü phüngü ju I kilim bede akhiukang.”

²³Junangde arünü rhimo, tüsho Jirusalem, Hebron, Jarmuth, Lakish, tüsho Eglon, harü kiulongthsürü phüngü bekhita api kilim bebah arü.

²⁴Küyimki arünü kiulongthsürü phüngü Jihusua kilim bedarükhea, Jihusuanü Israelrü athrünkhi jimukhung tüsho api lung yürü atorübo jia arü jingnü kiulongthsürübo hung ching thrümshih. Arünü jude rhimo.

²⁵Tüsho Jihusuanü arübo ki tha, “Dütre tüsho mulong dünini; reangzahang tüsho mulong ato thsang; tümüde ATUNGPUHNÜ nüsa riri alala ki ha ruk rhimopü thsüchoh.”

²⁶Ju dunglim Jihusuanü kiulongthsürü phüngü ju laksah tüsho arelim khiungde arü pang sangdung phüngü kheak zhina zo.

²⁷Ani yüzahchoki Jihusuanü thiyukhüm jih, tüsho arü pang ju sangdung kheaknü yihkhibah püpüki arü jikpung lungkhün ching thoyuka bah. Arünü lung atotobo lah-a lungkhün ching ju mürhüt, tüsho jurü ju khihni khiungde lah.

²⁸Ju nimung Jihusuanü Makkeda tüsho ju kiulongthsüpuh laksah. Ju ching larü alala apinü sheshe maningshihde laksah. Apinü Jirikho kiulongthsüpuh kheak tümü rhimokheanü junangde Makkeda kiulongthsüpuh kheak she rhimo.

²⁹Judüki Jihusua tüsho Israel alala Makkeda chingnü akhinde Libna ching yü tüsho ju yan.

³⁰Tüsho ATUNGPUHNÜ Israel kilim kiuto tüsho ju kiulongthsüpuh arü khah ching jih; ju ching lakhi khülang she maningshihde arü nukshangnü laksahkham. Arünü Jirikho kiulongthsüpuh kheak rhimokhi nangde Libna kiulongthsüpuh kheak she rhimo.

³¹Jushu, Jihusua tüsho Israelrü alala Libna chingnü Lakish khiung, tüsho ju zündobah yan.

³²ATUNGPUHNÜ nimung mahnepü ching Lakishrü ju Israelrü khah ching jih. Arünü Libna ching rhimokhi nangde ju kiuto ching khülang she maningde laksahkham.

³³Judüki Gezer kiulongthsüpuh Horam she Lakish rungpü atu, tüshe Jihusuanü api tüsho amihtsürübo sheshe maningde laksahkham.

³⁴Jushu, Jihusua tüsho Israelrü alala Lakish chingnü Eglon khiung tüsho zündode yan.

³⁵Arünü ju nimungnü yan, tüsho nukshangnü laksah; tüsho Lakish ching rhimokhi nangde ju ching lakhi mihtsürü sheshe maningde laksahkham.

³⁶Jushu, Jihusua tüsho Israelrü alala Eglon chingnü Hebron ching wutubah keochih,

³⁷tüsho ju yan, tüsho kiulongthsüpuh, ju mühi kiutobo tüsho ju ching lakhi mihtsürü athrünkhi nukshangnü laksah; Eglon ching rhimokhi nangde apinü ju kiuto thsümünimjih tüsho mihtsürü khülang she maningde laksah.

³⁸Jushu Jihusua tüsho Israelrübo Debir lim alodarübah ju ching keochih.

³⁹Apinü ju kiuto, kiulongthsüpuh tüsho ju mühi kiutobo alala yanabah. Ju ching she khülang lang she maningde laksahkham. Jihusuanü Hebron tüsho Libna tüsho jurü kiulongthsürübo kheak rhimokhi nangde Debir tüsho ju kiulongthsüpuh kheak she rhimo.

⁴⁰Jumonü Jihusuanü lomi alala, awung lomi tüsho Negeb lokeam lobo, adüpheak tüsho arü kiulongthsürü alala yankhitkham; apinü sheshe maningshih, tüshe sheak thsükhi alala ATUNGPUH Israel Thrünpuhnü thiyukhüm jihkhi yande thsümünimjih.

⁴¹Junangde Jihusuanü Kadesh-barnea chingnü Gaza, tüsho Goshen lomi chingnü Gibeon khiungde alala yanabah.

⁴²Tüsho Jihusuanü kiulongthsürübo tüsho ju lomi khülang kinü lukham, tümüde ATUNGPUH Israel Thrünpuhnü arü thsung thsüde keochih.

⁴³Jushu a Jihusua tüsho api lung Israelrü athrünkhi Gilgal binkheampung ching alodarü.