Read Yimchungru Naga Jihu 11 Bible Online

Jihu 11 - Yimchungru Naga bible

Jihu 11

¹Küyimki Israel thrungkhi Hazor kiulongthsüpuh Jabinnü asokhea, apinü thiyusheak Madon kiulongthsüpuh Joab, Shimron tüsho Akshaph kiulongthsürübo kilim,

²tüsho dukulim awung lomi, Kinnereth düjinglim Araba lokeamlo tüsho Dor phünide aniyüzahlim yüshih.

³Tüsho apinü thiyusheakbo Jordan thrip abande alarü Kananrü, Amonrü, Hitrü, Perizrü, awung lomi ching Jebusrü, tüsho Mizpa lomi Hermon ching larü Hivrü kilim yüshih.

⁴Arübo nihbuh bonungrü ke yean loyi nangde be tüsho khora le keochih-lolungbebo she hihdakde lubah arü.

⁵Harü kiulongthsürübo sühmüh alala thsürubah arü tüsho Israel bede keochihpü thsüde Merom ke ching binkheam.

⁶ATUNGPUHNÜ Jihusua ki tha, “ Arübo ki dütre, tümüde shido hadüchokia Israelrü khilim inü arübo laksahbah; nüsanü khora jingbo lipshakbah tüsho lolungbebo takabahbah.”

⁷Jumonü Jihusua tüsho thirithsürübo zukleangnü arübah arübo Merom ke chingnü yanabah.

⁸ATUNGPUHNÜ arübo Israelrü khah ching jih; Israelrübonü Misrephothmaim, Sidon, tüsho Mizpa jindükhün aniakhiuklim khiungde müshamde yan. Thiriri müshekhamyi khiungde arünü yande laksah.

⁹ATUNGPUHNÜ thiyukhüm jihkhi nangde Jihusuanü khora jingbo lipshak tüsho lolungbebo takabahjih.

¹⁰Jushu Jihusuanü Hazor lim alode arübah yan tüsho kiulongthsüpuh ju nukshangnü laksah. ( Judüki Hazor ju kiulongthsübo ching wu-sühmüh lakhi kiulongthsü khülang lakheah.)

¹¹Arünü ju ching rhangdung lakhi khülang she maningshihde nukshangnü laksah, tüsho kiuto she monü takabah.

¹²ATUNGPUH yamlarü Mosanü thiyukhüm jihkhi nangde Jihusuanü jurü kiulongthsürü kiutobo tüsho kiulongthsürübo yanabah, tüsho alala nukshangnü sheshih.

¹³Tüshe, Israelrünü wungduduhbo ching lakhi kiutobo mütak tahle Hazor lang Jihusuanü takabah.

¹⁴Israelrübonü shoto kukruk tüsho shiwühbo nihbuh thsungkheaknü ju kiutobo chingnü lu; tüshe arünü mihtsürübo a alala shekhamshih.

¹⁵ATUNGPUHNÜ thiyukhüm ayamlarü Mosa kilim jih, jurübo Mosanü Jihusua kilim jih, tüsho Jihusuanü jurübo anide rhimo. ATUNGPUHNÜ Mosa kilim thiyukhüm jihkhi nangde apinü tümü mürhimokhi müla.

¹⁶Jumonü Jihusuanü alomi alala yankhia lu; awung lomi tüsho Negeb, Goshen lo alala tüsho lokeamlo, Araba, Israel awung lomi tüsho Jordan dükhün,

¹⁷Halak wung chingnü Seir lim wutukhi, Hermon wung khüp Lebanon jindükhün ching Baalgad khiungde apinü kiulongthsürübo alala kingde laksah.

¹⁸Jurü kiulongthsürübo kheak Jihusuanü nimung ashang thirithsü.

¹⁹Israelrü kheak mungtsükhi kiuto Hivrü lapung Gibeon ju lang alakheah; püpü alala keochihpung kamabah.

²⁰Israelrü bede keochihshihpü ATUNGPUHNÜ arü ki lümkihshih, junangde arübo shahde thsümünimde tüsho mihmuzho mülade laksahkhamshihpü thsü. Ha ATUNGPUHNÜ Mosa ki thiyukhüm jihkhi ah.

²¹Judüki Jihusuanü yübahle atoshang mihtsürü Anakim de ajikhi trük awung lomi ching larü Hebron, Debir, Anab, tüsho Juda le Israel awung lomi ching larübo laksahkham; Jihusuanü arübo laksahkham tüsho arü kiutobo thsümünimjih.

²²Israel ching larü Anakimrü sheshe maningshih; tüshe, Gaza, Gath, tüsho Ashdod ching larü anükhüh aningjih.

²³Junangde ATUNGPUHNÜ Mosa ki thiyukhüm jihkhi yande Jihusuanü lomi alala yankhia lu; tüsho Jihusuanü jurübo Israelrü kilim nihbuh yo thsüpü chamachih-a trük abande jih. Jushu mihtsürübo keochihkhi chingnü sühakhim.