Read Yimchungru Naga Jihu 18 Bible Online

Jihu 18 - Yimchungru Naga bible

Jihu 18

¹Arünü alomi kukkhit dunglim mükühabahshu, Israelrü lüpdükhi Shilo ching mukhung tüsho ATUNGPUH shorupung khimyam khülang thsü.

²Judüki Israel trük thüne yamrüplurüp müngüyide alakheah.

³Jumonü Jihusuanü Israelrü ki tha, “ATUNGPUH nüsa jipürü Thrünpuhnü ajihkhi lo ching yübah muluyichoki nüsa külokhüh henih thsüba le?

⁴I kilim trük abande mihtsürü mahsamsam arüshang, tüsho arü yamrüplurüp lupü lakhi lomi chinzhina kheahde thrüta lupü yüshihanü. Tüsho arübo I kilim alode arüshihanü.

⁵Arünü ju shihcham thüne thsüde achambah, Juda ju düjinglim lomi ching, tüsho Josep yamkhün dukulim lomi ching labah.

⁶Lomi shihcham thüne chamkhi ju thrütbahle I kilim lubah arang, tüsho inü nüsa thsungkheak ATUNGPUH isa Thrünpuh ki keode azan thsübah.

⁷Tütüshe nüsa bolungnü Levirü kilim a yamrüplurüp müjih. Tümüde arü yamrüplurüp ju amükeamrü thsüde ATUNGPUH tankihpü ah; tüsho Gad, Reuben, tüsho Aniakhiuklim Manase trükbo a arü yamrüplurüp Jordan aniakhiuklim luabahdo, ju ATUNGPUH yamlarü Mosanü arü kilim jihkheah.”

⁸Jumonü mihtsürübonü tsahmusude arü; tüsho lomi thrüta lupü yürü ki Jihusuanü tha, “Lomi alala ching yüang tüsho thrüta lubah I kilim alode arang, tüsho ha Shilo ching nüsa thsungkheaknü A TUN GPU H ki azan thsüde akeokhibah.”

⁹Jumonü mihtsürübonü lomi alala ching yü tüsho kiuto shihcham thüne chamkhi ju arünü hüm ching thrüt; tüsho arübo Jihusua kilim Shilo ching alode arü.

¹⁰Arübo thsungkheak Jihusuanü azan thsüde ATUNGPUH ki keokhi tüsho Israel trükbo kilim alo chama jih.

¹¹Benjaminrü kilim guk ayannü ajihkhi lo ju Juda tüsho Josep trük dükeak lakheah.

¹²Dukulim arü lo aredung ju Jordan kheaknü tankihlah; aredung ju dukulim Jirikho lo düpheak thrip yü tüsho aniyüzahlim awung lomi hode Beth Aven khiunglah.

¹³Kheaküshe aredung ju düjinglim Luz lo düpheak (ju Bethel) yüki, ju kheaknü Beth-horon düjinglim awung kheak Ataroth-addar yüki khiunglah.

¹⁴Tüsho aredung ju püpü thrip, aniyüzahlim awung chingnü düjinglim anguhbah Beth-horon thripkhüh anguhbah Kiriath-baal chingnü kheamlah (ju Kiriathjearim), Juda trük kiuto. Hanü aniyüzahlim aredung thsülah.

¹⁵Düjinglim aredung ju Kiriathjearim akheam kheaknü Ephraim lim Nephtoa kenü khiunglah.

¹⁶Ju kheaknü achinkheam dukulim Rephaim jindükhün ching Hinnom tsührü jindükhün chinzhina kheahpung wung khiunglah. Kheaküshe düjinglim Hinnom jindükhün hode abolim Jebusrü lo düpheak Engrogel thrip yükilah.

¹⁷Jushu dukulim Enshemesh lim yülah tüsho Adummin wutu lim miki Geliloth khiunglah. Ju chingnü Reuben tsührü Bohan lungkhim khiungde yükilah;

¹⁸tüsho dukulim Beth-araba lo düpheak hobah Araba lim yükilah;

¹⁹ju chingnü Beth-hogla wung dukulim hochoh; tüsho dukulim Ashe keto Jordan akheam kheaknü arün ah; ha düjinglim aredung ah.

²⁰Jordan ju aniakhiuklim aredung thsülah. Haju Benjamin trük guk ayannü ajihkhi yamrüplurüp aredungbo ah.

²¹Kheakü Benjamin trük kilim arü guk ayannü ajihkhi kiutobo ju Jirikho, Beth-hogla, Emek Keziz,

²²Beth-araba, Zemaraim, Bethel,

²³Avvim, Para, Ophra,

²⁴Kepharammoni, Ophni, tüsho Geba: kiulongbo bebah kiuto 12.

²⁵Gibeon, Rama, Beeroth,

²⁶Mizpa, Kephira, Moza,

²⁷Rekem, Irpeel, Tarala,

²⁸Zela, Haeleph, Jebus (ju Jirusalem), Gibea, tüsho Kiriath-jearim: kiulongbo bebah kiuto 14. Ha Benjamin tsührübo yamrüplurüp ah.