Read Yimchungru Naga Jihu 2 Bible Online

Jihu 2 - Yimchungru Naga bible

Jihu 2

¹Jihusuanü thirirhurü mahne Kanan tüsho adungto thsüde Jirikho lomi ramde rhua kheahshihpü Shittim chingnü thiyukhüm jihbah yüshih. Anenü yü tüsho ju tsüngre müzammürambe Rahab yam ching bin.

²Ju tsüngre Israelrü khürü lomi rük yimpü arüa lah de Jirikho kiulongthsüpuhnü so,

³jumonü apinü Rahab kilim thiyusheak jih, “Nü yam ching mihtsürü mahne ju lomi lüpdükhi rük yimpü arüa lah! Ane bedakhiukang!”

⁴Tüshe alibenü mihtsürü mahne jikabahshihbah tha, “Dükde, mihtsürü I kilim arükheah, tüshe küchingnü arükheanü inü mümükheah;

⁵azhing lim chipi rihpü thsüchoki ane wukhiukdo; ane külim tsodünü inü mümükheah; nahde ane müshamang, tümüde nüsanü ayanphuhbah.”

⁶( Tüsho Rahabnü mihtsürü mahne ju ayi lüpkhi lim bede wutubah, anihbenü akhinashu thsüde azokhi khim keakbe sangbün khüp jikshih.)

⁷Kiulongthsüpuh bonungrübo tsahmusu, tüsho chipi ju rihabah. Arü Israelrü thirirhurü kheahde Jordan hode ayükhi limro khiungde yü.

⁸Thirirhurü mahne ju müyapyichoki Rahabnü ayi lüpkhi lim wutu,

⁹tüsho ane ki tha, “ATUNGPUHNÜ ha lo nüsa kilim jihdo de inü mükheahlah tüsho nüsa trekhi isa kheak akihdo, tüsho lomi athrünkhi chingnü nüsa trechoh.

¹⁰Tümüde nüsa Ijip bahbah atsochoki künangde ATUNGPUHNÜ Amürüm Keto nüsa müngüh ngahshihkheanü isanü sodo, tüsho nüsanü künangde aniakhiuklim Jordan thrip Amorrü kiulongthsürü mahne, Sihon tüsho Og laksahkheanü ju she isanü sodo.

¹¹Ju soakede isa khide tre, nüsa dünkheaknü isa mulong tokhi alala dükheakabahdo. ATUNGPUH nüsa Thrünpuh ju akube yinmi ching tüsho ha lomi kheak Thrünpuh ah.

¹²Kheakü inü nüsa ki amuzho huhkhi nangde I buhtsüh ki amuzhobah de api mung chingnü thiyuchihchimang, tüsho nüsa kheak akin lapü thsüde I kilim amütsan khürü jihang.

¹³I buh tüsho I be, I khiungmungrü tüsho I chiniurübo, tüsho arü betsührübo mülaksahde akhümkhitbah de thiyuchihchimang!”

¹⁴Anenü alibe ki tha, “Isanü athakhi nangde mürhimosho Thrünpuhnü isa rhangdung lushang! Isanü arhimokhi nünü lang she ki müthasho, küyimki ATUNGPUHNÜ ha lo isa kilim jihbanü isanü nüsa ki thiyuronü amuzho huhbah de alokhichoh.”

¹⁵Jumonü alibenü ane ayinripit chingnü liu chingbah yükishih, tümüde alibe yam ju kiuto chipi kumung thsüa lakheah, junangde alibe chipi ching lakheah.

¹⁶Tüsho alibenü ane ki tha, “ Awung lomi lim ju yüang, jude müthsüsho amüshamrünü nüke yanphuhbah; tüsho amüshamrü alode mütsoyi khiungde nüke ju ching nimung mahsam jikang; jushu nüke limro ching tsopü kuklah.”

¹⁷Anenü alibe ki tha, “Nünü ike kheak thiyuchihchimshihkhi nangde dükde arhimobah.

¹⁸Nünü ha rhimoang, küyimki isanü nüsa lo yankhia lubanü, ike akishihkhi liu amürüm ayinripit kheak chinga zoang. Nü buh tüsho nü be, nü khiungmungrübo tüsho nü buh yamkhün ching larü nü yam ching bemukhungang.

¹⁹Khürükhüh nü yam ripit hobah wungdo wukhiuksho api zangrü amülim thsübah tüsho isanü ju hahmülang mühan; tüshe nü yam ching khürü yurisho ju isa hahmülang thsübah.

²⁰Tütüshe, isanü rhimode arükhi nünü khürü ki thasho, jushu a isa kheak thiyuchihchimshihkhi dünkheak isa amülim müla.”

²¹Alibenü ju mulongkhit tüsho ane tsoshih. Küyimki ane tsoabahkhea, alibenü liu amürüm ayinripit kheak chinga zo.

²²Thirirhurübo awung ching yü tüsho ju ching jik. Kiulongthsüpuh yam ching larü mihtsürübonü lomi lüpdükhi ching nimung mahsam yim, tüshe ane müngü, jumonü arübo Jirikho lim alodarü.

²³Thirirhurü mahne ju awung ching akibah keto ho, tüsho Jihusua kilim alode arübah adünjikhi alala anenü api ki thaa huh.

²⁴Anenü tha, “ATUNGPUHNÜ lomi athrünkhi isa jihdo de tsükjide thakhuklah, tümüde ju lomi ching larübo alalanü isa khide trechoh.”