Read Yimchungru Naga Jihu 5 Bible Online

Jihu 5 - Yimchungru Naga bible

Jihu 5

¹Israelrü muhoyichoki khiungde ATUNGPUHNÜ Jordan ngahshihdo de Jordan aniyüzahlim Amor kiulongthsürü, tüsho Mediterranean keto yean Kanan kiulongthsürübo alalanü so. Israelrü dünkheaknü arübo trede mulong niuthünak tüsho arü me sühmüh mülade kam.

²ATUNGPUHNÜ Jihusua ki tha, “Yinchikheamnü nukjip khürü kingang tüsho Israelrü mahne kipü tsütabahang.”

³Jumonü ATUNGPUHNÜ thiyukhüm jihkhi yande, Jihusuanü nukjip kingbah Gibeath-haaraloth chingnü Israelrübo tsütabah.

⁴Hamonü Jihusuanü harübo tsütabahjih: Ijip chingnü akhiukrü athrürü, tüsho thirithsürübo Ijip chingnü akhiukbah sunglo ching sheabahrü alala.

⁵Ijip chingnü akhiukrü alala tsütabah-a lalashe arü limro sunglo ching zübekhi tsührübo a tsütamübahyide alakheah.

⁶Tümüde thirithsürü mihtsürü Ijip chingnü akhiukkhi müshekhamyi khiungde Israelrü sunglo ching kam yirü tsah, tümütüsho arünü ATUNGPUHNÜ athakhi mani; ATUNGPUHNÜ arü jipürü ki niuhke tüsho mukhuke bukkhi lo jihpü thiyuchihchimkhi arünü müngüshih de ATUNGPUHNÜ thiyuchihchim.

⁷Jumonü Jihusuanü arü tsührübonü arü bebuhrü dün zhipmuloshihpü bemusude tsütabahjih; tümüde arübo limro ching tsütamübahde alakheah.

⁸Tsütabahkhamshu, mü munguyi khiungde lomi mihtsürü athrünkhi khimyam ching la.

⁹ATUNGPUHNÜ Jihusua ki tha, “ Khihni Ijiprü azhorü kuhi nüsa kheaknü tsoshihchoh.” Jumonü ju dangpung ki Gilgal de ji, ju mung khihni khiungde lah.

¹⁰Küyimki Israelrü Jirikho dükhün thüninde Gilgal ching binkheamkhea, arünü ju khinu thürükheak phüyi nipü arelim phunghothünio mung.

¹¹Phungho-thünio ashidopü, arünü Kanan lo chingnü akhiukkhi phaüm muyukkhi yikhap tüsho angukhi hi akhuhbe thsüde tsüh.

¹²Arünü ju lo chingnü akhiukkhi tsüh nimungnü ründe manna makidebah, tüsho Israelrübonü judürü müngülo tüshe arünü ju kam a Kanan chingnü akhiukkhi tsühyungpü tsüh.

¹³Küyimki Jihusua Jirikho thüninde alakhea, apinü mihtsürü khülang nuk shuhbah, api müngüh zhipde ngü, Jihusuanü api miki yübah keokhi, “Nü isa bonungrü khülang khüh a shi, dashi thiriri a le?”

¹⁴Apinü alo, “ Küpü she yung; tüshe ATUNGPUH bonungrü thiyukhüm jihrü I kheakü arüdo.” Tüsho Jihusuanü alo kheak khukningbah kingaün, tüsho apinü tha, “I TUN GPU H , nü yamlarü ki nünü tümü thiyukhüm jihnela?”

¹⁵Tüsho ATUNGPUH bonungrü limthobuhnü Jihusua ki tha, “Nü jingkhümpü yihkhitang, tümüde nü zhippung lo ju amüsüh ah.” Tüsho Jihusuanü api ki thakhi nangde rhimo.