Read Yimchungru Naga Jihu 6 Bible Online

Jihu 6 - Yimchungru Naga bible

Jihu 6

¹Kheakü Israelrü tremonü Jirikho kiuto ju tsüde rih. Shenü she ayüzahpü yungsho awukhiukpü mukukdebah.

²ATUNGPUHNÜ Jihusua ki tha, “ Kheahang kiulongthsüpuh tüsho athrungrü bonungrübo bebah, Jirikho nü khah ching jihdo.

³Nü tüsho nü yo thirithsürübonü nimung ching khülang kiki nimung thuruk kiuto mükamde tsahang.

⁴Amükeamrü thünenü namfimihnupung juhnü athsükhi hulipungpung shuhbah tangzüng sangdan müngüh yüshang. Nimung athüne nipü amükeamrübonü hulipungpung mütde, nüsanü kiuto thüne ki mükamde tsahang.

⁵Jushu arünü achangnü khülang ki mütbah, ju soakede, mihtsürü alalanü achangnü ahoang, tüsho kiuto ju alungbah. Ju yande bonungrü lüpdükhi kiuto ching buh mikhuhnü yüzahbah.”

⁶Jihusuanü amükeamrübo jibahle tha, “ATUNGPUH tangzüng sangdan hanang, tüsho nüsa thüne hulipungpung shuhbah ju müngüh yüang.”

⁷Apinü amihtsürübo ki tha, “ Tsahmusuang tüsho kiuto mükamde tsahang, thsühnuk shuhrü mihtsürübo ATUNGPUH sangdan müngüh yüshang.”

⁸Jihusuanü mihtsürübo ki thiyukhüm jihkhi yande, amükeamrü thünenü hulipungpung khungde arü dunglim ATUNGPUH tangzüng sangdan yanshihde ATUNGPUH müngüh yü.

⁹Thsühnuk shuhrübo ju hulipungpung mütrü müngüh yü, tüsho aheangrü ashurü ju mutukzhakde hulipungpung mütde ayüchoki tangzüng sangdan yande yü.

¹⁰Tüshe Jihusuanü mihtsürübo ki thiyukhüm jih, “Inü thiyukhüm jihkhi nimung mukhungyikia daho tüsho thiyubüm khülang she dakhiuk, jushu lang ahoang.”

¹¹Jumonü ATUNGPUH tangzüng sangdan hanbah kiuto mükamde khülang ki yü, tüsho arübo binkheampung ching alodarübah ju re ju ching binkheam.

¹²Jihusuanü ashido yapsu mükikde asürü, tüsho amükeamrübonü ATUNGPUH sangdan shuh-a lu.

¹³Tüsho amükeamrü thünenü hulipungpung mutukzhakde mütde ATUNGPUH sangdan müngüh yü; tüsho thsühnuk shuhrü müngüh yü tüsho ashurü aheangrü ATUNGPUH sangdan dunglim yande kiuto mükamde tsah.

¹⁴Mahne nipü arünü kiuto mükamde khülang ki tsah tüsho khimyam ching alodarü. Ha ruk arünü nimung thuruk mükam.

¹⁵Athüne nipü arünü mükikde asürübah kiuto mükamde thüne ki ju ruk lang tsah: Ha nimung arünü thüne ki mükamde tsah.

¹⁶Tüsho thüne nipü, küyimki amükeamrübonü hulipungpung mütkhea, Jihusuanü mihtsürübo ki tha, “ Ahoang! Tümüde ATUNGPUHNÜ kiuto nüsa kilim jihdo.

¹⁷Kiuto tüsho ju ching lakhi kukruk lüpdükhi ATUNGPUH ki kingaün jihpü thsüde shahde thsümünima bahang. Müzammürambe Rahab tüsho ayamkhün lang aningshihbah, tümüde anihbenü isa yo thirirhurü jikshih.

¹⁸Tüshe thsümünima bahpü lakhi kukrukbo nüsanü dulu; jude thsüsho, nünü Israel binkheampung ching küpkhuk tüsho athsümünim handarübah.

¹⁹Shotoyinchi, suna, müwayinchi kukruk tüsho yinchi ATUNGPUH kilim atsangkhitkhi lah; jurübo ATUNGPUH rahpung-yam ching zobah.”

²⁰Jumonü amükeamrübonü hulipungpung mütkhi soakede mihtsürübonü achangnü aho, tüsho chipi keamabah. Jushu bonungrü alala buh mikhuhnü kiuto ching yüzah tüsho yanabah.

²¹Tüsho arünü kiuto ching larü athrürü tüsho aliberü, azürü tüsho azorü alala, moshipungbo, namfimihnu tüsho donkibo nuknü laksahkham.

²²Jihusuanü thirirhurü mahne ki tha, “Nükenü alibe ki thiyuchihchimkhi nangde müzammürambe yam ching yüang tüsho anihbe lung betsührü alala bekhitang.”

²³Jumonü anenü Rahab yam ching yü tüsho anihbe lung abuh, abe, akhiungmungrü tüsho betsührü aningkhi alala bekhit. Anenü arübo khümkhitpü thsüde Israel binkheampung phünide bede yünü binshih.

²⁴Arünü kiuto tüsho ju ching lakhi lüpdükhi takabah; arünü shotoyinchi, suna, müwayinchi kukruk tüsho yinchibo lang ATUNGPUH rahpung-yam ching zo.

²⁵Tüshe Jihusuanü müzammürambe Rahab tüsho anihbe betsührübo khümkhit, tümüde anihbenü Jirikho lim yüshihkhi thirirhurü mahne jikshih. ( Anihbe tsühsoniusobo khihni khiungde Israel ching lachoh.)

²⁶Judüki Jihusuanü thiyuchihchim khülang jihde tha, “Shepünü Jirikho kiuto thsülopü mürangbanü ATUNGPUH muthrumünean khüp labah. Shepünü khimtanbanü tsührü athrürü adüjibuh dükheakbah; Shepünü chipimurungbo thsübanü tsührü athrürü akheambuh dükheakbah.”

²⁷Junangde ATUNGPUH Jihusua lung lakheah, tüsho api mungshimungthu lomi athrünkhi ching soride yü.