Read Yimchungru Naga Jihu 7 Bible Online

Jihu 7 - Yimchungru Naga bible

Jihu 7

¹Jirikho chingnü tümükhüh lang she lusho asheshihbah de ATUNGPUHNÜ thiyukhüm jihkhi ju Israelrü bolung Akhannü mani, jumonü ATUNGPUHNÜ Israelrü kheak bukakhiuk. ( Akhan ju Judarü Zabdi tsührü Karmi tsührü tüsho Zera guk chingnü alakheah.)

²Jihusuanü mihtsürü khürü aniakhiuklim Beth-aven phünide alakhi Ai lim Jirikho chingnü yüshihde tha, “Wutuang tüsho lomi züta kheahang.” Tüsho mihtsürübonü yübah Ai züta kheah.

³Arünü Jihusua kilim arülopü thiyukhüm ha ruk jih: “ Ai yanpü thsungkheaknü mihtsürü alala yihnüpü müla. Mihtsürü 2000 yungsho 3000 lang yüshang. Ju kiuto adümkhüh ah, mihtsürü athrünkhi ju ching dükhishih.”

⁴Jumonü Israelrü mihtsürü 3000 khühnü Ai yan, tüshe arü Airü müngüh tso.

⁵Airünü arübo kiuto chipimurung chingnü lungdang Shebarim khiungde yan tüsho adüpheak kheaknü 36 bande laksah. Jushu Israelrübo mulong niukthünakde ke kamabah.

⁶Jihusua tüsho Israelrü limberübonü mulong tukthsüde arü khim rukrüp, tüsho arü ku kheak asungthulung yükihde alo ching awuh, tüsho arü mulong tukthsükhi huhde ATUNGPUH tangzüng sangdan ki alo ching awuhde arelim khiungde yap.

⁷Tüsho Jihusuanü tha, “ Aya Atungpuh T HRÜNPU H ! Nü tümü thsüpü isa Jordan behode Amorrü khah ching sheshihpü arükhea le? Isa Jordan thripkhüh thsüpü reangkeamde lashihkhülaa tsüdo:

⁸O ATUNGPUH , inü tümü thakhukba, kheakü Israelrü thiriri müngüh tsodo!

⁹Kananrü tüsho lomi ching larübonü ha sobah isa zündobah, tüsho alomi chingnü isa mung dükheakshihbah. Dale nü mung ato thsungkheaknü nünü tümü rhimoba?”

¹⁰ATUNGPUHNÜ Jihusua ki tha, “ Asürang! Tümüde nü miro alo ching khurambah yabla?

¹¹Israelnü neak yihbeakdo! Inü arü ki thiyuchihchimkhi arünü thsümünimdo; arünü muthrumüneankhi kukruk khürü lua lah, tüshe ju ahüh-a, müyimde nihbuh kukruk ching yukdo.

¹²Hamonü Israelrübo arü riri azhihde müzhipkhukkheah. Arübo thiriri müngüh tso, tümüde arünü nihbuh zangrü athsümünimbe ching thsungyuk! Nünü dulu de thiyukhüm jihkhi kukrukbo ju thsümünima mübahyikia I nüsa lung müla!

¹³Asürang! Mihtsürübo tsangkhitang tüsho I kilim bedarüpü thsakhamang. Arü ki shido arüpü thaang, tümütüsho I, ATUNGPUH Israel Thrünpuhnü athapü ha lah: O Israel, thsümünima bahpü inü thiyukhüm jihkhi kukruk khürü nüsa bolung lah, jurübo kukruk nüsanü yihkhita mübahyikia nüsanü nüsa riri müngüh müzhipkhuk.

¹⁴Jumonü nüsa trükbo ayannü yapsu arübah. ATUNGPUHNÜ athrükhitkhi trük ju guk ayannü arübah; kheaküshe ATUNGPUHNÜ athrükhitkhi guk ju yamkhün ayannü arübah, tüsho ATUNGPUHNÜ athrükhitkhi yamkhün ju mihtsürü khülang khülang arübah.

¹⁵Muthrumüneankhi kukruk lubuh ju yimkhitsho, api lung ayamkhün tüsho kukruk alala monü atakbah, tümüde apinü Israel kurungkheak achih handarüdo tüsho ATUNGPUH kheak tangzüngkhi thsümünimdo.”

¹⁶Ashido yapsu Jihusuanü mükikde asürübah trük ayannü bede arü, tüsho Juda thrükhit.

¹⁷Apinü Juda trük ju guk ayannü bedarü, tüsho Zera guk thrükhit. Jushu apinü Zera guk ju yamkhünnü bedarü, tüsho Zabdi yamkhün thrükhit.

¹⁸Jushu apinü Zabdi yamkhün ju mihtsürü khülang khülangnü bedarü, tüsho Zera tsührü Zabdi tsührü Karmi tsührü Akhan thrükhit.

¹⁹Jihusuanü api ki tha, “I tsah-a, ATUNGPUH Israel Thrünpuh kilim müretahshang, tüsho neak alokhiang. Nünü tümü rhimokheanü I ki kheakü thaang; ju I ki düram.”

²⁰Akhannü alo, “ Ju thiyuro, inü ATUNGPUH Israel Thrünpuh azhihde neak yihbeakdo, tüsho inü ha rhimo:

²¹Isanü ayankhikhi kukruk bolung thsünü akheahakham Babilon shulünkhim ching kheahshe, shotoyinchi khahngak 2, tüsho suna yinchibo khahngak 1 bande mürühde angümonü inü ludo. Jurübo I yo khimyam alunglim shotoyinchinü khimbah kiua ramlah.”

²²Jumonü Jihusuanü mihtsürü khürü thiyia khimyam lim alihde yüshih tüsho kukrukbo ju khimyam ching shotoyinchinü khimbah kiua ramkhi ngü.

²³Arünü ju khimyam chingnü lubahle Jihusua tüsho Israelrübo athrünkhi miki arü, tüsho jurübo ju ATUNGPUH miki shukhia zo.

²⁴Jihusua le Israelrü alala rukhühnü Zera tsührü Akhan lung atsührü athrürü aliberübo tüsho ju lung shotoyinchi, khim, suna yinchi, mihnupungbo, donki, namfimihnu, khimyam, tüsho kukruk lüpdükhi lubahle Akor Dükhün lim yü.

²⁵Tüsho Jihusuanü tha, “Nünü tümü thsükhi isa kheak küpkhuk hande arükhea? ATUNGPUHNÜ khihni nü kheak küpkhuk hande arüchoh!” Mihtsürü alalanü Akhan ju lungnü rusah; arünü ayamkhün tüsho lakhitbo she ruthünak tüsho monü takabahjih.

²⁶Arünü api kheak lung ashang rhungkih, ju khihni khiungde lah. Judüki ATUNGPUHNÜ api bukakhiukkhi chingnü rholo. Jumonü ju dangpung ki Akor Dükhün de jichoh.