Read Yimchungru Naga Jihu 8 Bible Online

Jihu 8 - Yimchungru Naga bible

Jihu 8

¹ATUNGPUHNÜ Jihusua ki tha, “Nü yo bonungrü alala bebahle Ai lim wutuang. Dütre tüsho mulong dünini. Kheahang, inü Ai kiulongthsüpuh, api mihtsürü, kiuto tüsho alo nü kilim jihdo.

²Nünü künangde Jirikho tüsho kiulongthsüpuh kheak rhimokheanü ju ruk Ai tüsho kiulongthsüpuh kheak she rhimoang, tüshe hakhip a kukrukbo tüsho shiwühbo nü lupü kuklah. Kiuto ju adunglimnü ayanpü thsakhamang.”

³Jumonü Jihusuanü anihbuh bonungrü alala bebah Ai lim yüpü thsakham; tüsho thirithsürü 30,000 mokhita azhing chingnü yüshih.

⁴Apinü thiyukhüm ha jih, “Nüsa kiuto dunglim peang jikang, tüshe ju chingnü khide limshude düyü; ayanpü thsakhamang.

⁵I tüsho I mihtsürübo kiuto khiungbah. Tüsho küyimki Airü isa azhihde akhiukbanü atan isanü athsükhi ruk isa arü müngüh tsobah.

⁶Isanü arü kiuto chingnü mümünitkhitkhamkia arünü isa müshambah; tümüde arünü athabah, ‘ Atan ruk thsü arübo isa müngüh tsochoh.’ Jumonü isa arü müngüh tsobah;

⁷jushu nüsa thüram chingnü asürübah tüsho kiuto yanbah; tümüde ATUNGPUH nüsa Thrünpuhnü ju nüsa khah ching jihbah.

⁸Küyimki nüsanü kiuto ju ayankhitbanü, ATUNGPUHNÜ thiyukhüm jihkhi nangde mo thsahkihang. Harü ha nüsa kilim I yukhüm jihchoh.”

⁹Jumonü Jihusuanü yüshih tüsho arübo nihbuh jikpung Ai aniyüzahlim, Ai le Bethel dükeak aleangde bin. Jihusuanü ju tsüngre arü binkheampung ching bin.

¹⁰Yapsu mükikde Jihusuanü asürübahle bonungrübo jimukhung, tüsho api lung Israel azothsürübonü rungde arübo bebah Ai limpeang yü.

¹¹Thirithsürü alala api lung wutubahle khuhto limro thrip kumung lim binkheam, tüsho arü le Ai dükeak ju jindükhün lakheah.

¹²Apinü mihtsürü 5000 khüh bea lubahle Ai le Bethel dükeak kiuto aniakhiuklim thrip jikshih.

¹³Junangde thirithsürübonü kiuto kumung lim khuhto limro tüsho huzulim aheangrübo anükhüh de binshih tüshe Jihusua a ju re jindükhün ching binkheam.

¹⁴Küyimki Ai kiulongthsüpuhnü ju ngükhea, api tüsho kiuto ching lakhi amihtsürübonü yapsu mükikde Araba limpeang Israel bede keochihpü ashoruachihpung niokheamde yü; tüshe api azhihde kiuto dunglim thüram thsüa binlah de apinü mümükheah.

¹⁵Jihusua le amihtsürübonü rük thsüde arü müngüh sunglo limpeang tsoa huh.

¹⁶Kiuto ching larü athrünkhi jimukhungbah arü müshampü tha, tüsho arübonü Jihusua müshamchoki, kiuto chingnü hüngde yüa lakheah.

¹⁷Ai yungsho Bethel ching larü sheshe maningde Israel dunglim yü; arünü kiuto chipimurungbo khimshuhmülih-a zo tüsho Israel müshamde yü.

¹⁸ATUNGPUHNÜ Jihusua ki tha, “Nü khah ching lakhi thsüh Ai limpeang chungang; tümüde inü ju nü khah ching jihchoh.” Apinü athakhi nangde Jihusuanü rhimo,

¹⁹tüsho akhah shuhkih akede, jika binrübo nahde jukmusubah shande yünü kiuto ju zündo. Arünü kiuto ching yüzahbah mo nahde thsahkih.

²⁰Küyimki Airübonü rholoa kheahkhea, arünü thüning ching mokhüh liude ayükihkhi ngü. Arü müngühlim shande sunglo lim tsorü Israelrübonü treaklode arükhi hode arübo atsokhitpü limro müladebah.

²¹Küyimki Jihusua le amihtsürübonü, dunglim thüram thsürünü kiuto zündoa monü takde angükhea, arübonü rholo tüsho Airübo laksah.

²²Israelrübo kiuto chingnü she keochihpü akhiuk tüsho Airübo ju thrip aban shahde zündoabah, tüsho khülang lang she maningde laksahkham.

²³Tüshe Ai kiulongthsüpuh a arhangnü rama handarünü Jihusua kilim jih.

²⁴Israelrübonü sunglo ching arü müshamrü lüpdükhi nuknü laksah; tüsho alode Ai lim yübah ju ching larü laksahkham.

²⁵Ju ni laksahrü Airü athrürü tüsho aliberü alalanü 12,000.

²⁶Tümüde Airü mülaksahkhamyi khiungde Jihusuanü thsüh chunga yüshihkhi akhah mutuklo.

²⁷ATUNGPUHNÜ Jihusua ki thiyukhüm jihkhi nangde Israelrübonü shiwüh tüsho kukrukbo kiuto chingnü ayankhikhi arü thsungkheaknü lu.

²⁸Jumonü Jihusuanü Ai ju takabahjih tüsho kamruhroro thsungkheaknü thsümünima mujungshih, ju khihni khiungde lah.

²⁹Apinü Ai kiulongthsüpuh pang ju sang kheak arelim khiungde zhin. Ani yüzahshu pang ju ayihkhipü Jihusuanü thiyukhüm jih, tüsho ju kiuto khuhto chipimurung limpeang jipa bah, tüsho ju kheak lung rhunga mujukshih, ju khihni khiungde lah.

³⁰Tüsho Jihusuanü Ebal wung ching ATUNGPUH Israel Thrünpuh kilim kingaün sadam khülang thsü.

³¹ATUNGPUH yamlarü Mosanü Israelrü kilim thsangdankhi, Mosa yakzan hüm ching lakhi yande apinü rhimo: “Yinbeannü mükheankhukkhi lungnü kingaün sadam thsü.” Arünü ju kheak ATUNGPUH kilim taka kingaün tüsho mungtsü kingaün jih.

³²Tüsho ju ching, Jihusuanü Israelrü mihtsürü mikinü Mosanü athrütkhi yakzan ching yo lungbo kheak thrütkih.

³³Israelrü tüsho arü limberübo, atorübo, mahkhaprübo tüsho arü bolung khiungkerübo she bebah Levirü amükeamrübonü hanbah atsahkhi tangzüng sangdan thrip mahne lim abinbah zhip. Chamkhüh Gerizim Awung müngüh tüsho püpü chamkhüh Ebal Wung müngüh zhip, junangde atankih ATUNGPUH yamlarü Mosanü thiyukhüm jihkhi nangde arünü Israel müngühjihbeah de thaa huh.

³⁴Jushu yakzan hüm ching lakhi yande, Jihusuanü müngühmühi tüsho muthrumünean alala yakzan ju achangnü khe.

³⁵Jihusuanü Mosa yukhüm ju amukhungrü, aliberü le azürü tüsho arü bolung lakhi khiungkerübo alala kilim phümütsande khea huh.