Read Yimchungru Naga Jihu 9 Bible Online

Jihu 9 - Yimchungru Naga bible

Jihu 9

¹Israelnü akukkhi yusheak Jordan aniyüzahlim kiulongthsürübo awungbo ching, lokeam lobo ching, tüsho Lebanon aku limpeang Mediterranean keto yeanbo lakhi ching soride yü, jurübo ju Hitrü, Amorrü, Kananrü, Perizrü, Hivrü tüsho Jebusrü kiulongthsürübo lakheah.

²Jihusua tüsho Israelrü bede keochihpü thsungkheaknü arübo thsürude mukhung.

³Tüshe küyimki Jirikho tüsho Ai ching Jihusuanü arhimokhi Gibeonrünü asokhea,

⁴arünü api ki limburü nangde rük thsüpü lüm, tüsho arübonü tsühyungbe yimkhiyimduhbah shungliukhim amürhüt tüsho shihküp qiuqiu awünbonü donki kheak hah thsüa mühah.

⁵Arünü arukrüpkhi khim yih tüsho athürelokhi jingkhümpü mürhüt khüm. Tüsho arünü yikhap akungkhi le mukabahkhi han.

⁶Junangde arübo Jihusua tüsho Israel kilim Gilgal binkheampung yübah tha, “Isa limshu lomi chingnü arükheah. Jumonü nüsanü isa ki binthrüm thsüpü thiyuchihchimang.”

⁷Tüshe Israelrübonü Hivrü ki tha, “ Tümüde isanü nüsa kheak binthrüm thsüpü? Khükijua nüsa a le aphüni larü labah.”

⁸Arünü Jihusua ki tha, “Isa nü yamlarübo ah.” Jihusuanü arü ki keokhi, “Nüsa sherü a? Nüsa küchingnü arükhea?”

⁹Jumonü arünü api ki ha yukhean tha, “ Atobuh, isa khide limshu lomi chingnü ATUNGPUH mungthukhi sobah arükheah, tümüde isanü ATUNGPUH nüsa Thrünpuhnü Ijip ching tümü rhimokheanü alala sodo,

¹⁰tüsho apinü Jordan aniakhiuklim thrip Amor kiulongthsüpuh mahne, Heshbon kiulongthsüpuh Sihon tüsho Ashtaroth ching lakhi Bashan kiulongthsüpuh Og kheak rhimokhi.

¹¹Jumonü isa limberübo tüsho isa lomi ching larü alalanü hantsah ching tsühyungpü tsanglunga hanbah nüsa shoruang de isa ki thakheah. Isabo nü yamlarü thsüde alapü nüsanü isa kheak binthrüm thsüang de athakheah.

¹²Isa yo yikhap ju kheahang; nüsa shorupü thüyam chingnü hantsahmusuchokia lalamde alakheah. Tüshe kheahang! Kheaküa muka kungabah-a lah.

¹³Yukhu yukchokia qiuqiu aso lakheah, tüshe kheahang! Jurübo rukthünaka lah. Limshangde hantsahkhinü isa khimmih tüsho jingkhümpübo mürhüta lah.”

¹⁴Jumonü limberübonü tsühyungpü khürü arü kheaknü leangkhi, tüshe ju dünkheak ATUNGPUH ki mükeokhi.

¹⁵Jihusuanü Gibeonrü kheak mungtsü thsüde alashihpü mülü. Tüshe Israelrü botonü arü kheak thiyuchihchimde alokhi.

¹⁶Ha thiyuchihchimkhi nimung mahsam dunglim, harü mihtsürübo ju aphüni larü ah de Israelrübonü mükheah.

¹⁷Jumonü Israelrübonü tsahmusubahle nimung mahsam dunglim arü lapung kiutobo harü khiung: Gibeon, Kephira, Beeroth, tüsho Kiriath-jearim.

¹⁸Tüshe Israelrübonü arü mülaksahkhuk, tümütüsho arü limberübonü A TUN GPU H , Israel Thrünpuh mung chingnü arü ki thiyuchihchimkheah. Ha dünkheak mihtsürü alalanü limberübo kheak atsanglo,

¹⁹tüshe arünü alo, ATUNGPUH Israel Thrünpuh mung chingnü isanü arü ki thiyuchihchimdo. Kheakü isanü arü qiupü mukuk.

²⁰Isanü thiyuchihchimkhi nangde isanü arübo rhangdung lashihbeah; jude thsüsho bukakhiukkhi isa kheak marü.

²¹Limberübonü arü ki tha, “ Arübo rhangdung lashang.” Jumonü arü dünkheak limberübonü lümkhi jihkhi nangde arübo ju boto alala sangyihrü tüsho kekhiprü kam.

²²Jihusuanü thiyukhüm jih-a Gibeonrü api miki bedarüshih, tüsho apinü arü ki keokhi, “Nüsa ha ching laa zobahle, tümüde nüsa limshu chingnü arükheah de rük thsükhea?

²³Nüsanü ha rhimokhi hode Thrünpuhnü nüsa muthrumüneando. Nüsa mihtsürübo lünnü sang yihde tüsho Thrünpuh arüngyam thsungkheaknü ke khipde azhorü thsübah.”

²⁴Arünü alo, “ Atobuh, isanü ha rhimokheah, tümütüsho ATUNGPUH nü Thrünpuhnü ayamlarü Mosa kilim lomi athrünkhi tüsho ju ching larü mihtsürü nüsa yü yande alaksahshihpü thiyukhüm jihkhi dükdü ah de isanü mükheah. Nüsa tremonü ha rhimokheah; isa rhangdung thsungkheaknü trede alakheah.

²⁵Kheakü isa nü khah ching lah; küpü nüsanü alim ah de lümchonü isa kheak rhimoang.”

²⁶Hanangde Jihusuanü arü ki rhimo: apinü arü Israelrü khah chingnü khümkhit; tüsho arünü arübo mülaksah.

²⁷Tüshe ju nimung Jihusuanü arübo, boto tüsho ATUNGPUHNÜ amokhitkhi dangpung ching lakhi ATUNGPUH kingaün sadam thsungkheaknü ha nimung khiungde, sangyihrü tüsho kekhiprü kamshih.