Read Yimchungru Naga 2 Tesalonika 2 Bible Online

2 Tesalonika 2 - Yimchungru Naga bible

2 Tesalonika 2

¹Keoniorübo, kheakü isa Atungpuh Jisu Khrista arüpü tüsho api shorupü isa mukhungpü dünkheaknü isanü nüsa ki mushuchoh,

²müchityu yungsho thiyusheak, yungsho isa kilimnü kihüm thsüa la, Atungpuh nimung arüdo de athakhi hode nüsa nahde mulong dajan yungsho arhungangüm mülabeah.

³Shenü she nüsa tümü ching she dümülapyukshih, tümüde azhihkhi makhiukyikia tüsho athsümünimpü akhua lakhi aneak mihtsürü makhiukyikia ju nimung marü.

⁴Apinü azhihbah tüsho aküdah thsüde Thrünpuh ah de ajikhi yungsho kingaünbe kukruk kurungkheak shuhkihbah, junangde api ju Thrünpuh ah de zhiyukde Thrünpuh arüngyam ching binbah.

⁵Küyimki I nüsa lung lakheanü inü ha nüsa ki thado de nüsanü mülümkhitcho de?

⁶Tüshe anihbuh kim ching akhiukpü kheakü tümünü api thololanü nüsanü mükheahlah.

⁷Tümüde mümütsankhi mihbukmuyuknü rhimode lah; tüshe shepünü ju thololanü limro chingnü yihkhita mübahyikia adünjipü lakhi ju müdünji.

⁸Judüki mihbukmuyuk ju amikheak akhiukbah, tüshe küyimki Atungpuh Jisu arübanü, api mün sheaknü anihbuh laksahbah tüsho api müretahde arükhinü anihbuh dükheakshihbah.

⁹Amünean rhimo hode mihbukmuyuk arükhi ju wu alala bede tüsho arükchih amütsanbo tüsho amüyinsahbebo,

¹⁰tüsho adükheakpü larü thsungkheak rük amütsü alala labah, tümütüsho arünü thiyuro muzhobah akhümkhitpü lakhi reanglo.

¹¹Jumonü tümü arükchih lanü arünü akinshihpü Thrünpuhnü arü kheak amülim wu yüshih,

¹²junangde thiyuro mükinde amütsü rhimo ching asührü alala bahyukbah.

¹³Tüshe Atungpuhnü muzhokhi keoniorübo, isanü kamruhroro Thrünpuh ki makshe jihpü lah, tümütüsho Menü atsangkhitkhi hode akhümkhitpü tüsho thiyuro ching kinpü atankih chingnü Thrünpuhnü nüsa mokhit.

¹⁴Nüsanü isa Atungpuh Jisu Khrista müretahkhi ngüpü thsüde isanü thsangyuthsangrakhi thiyusheak-atsü hode nüsa ha ching jikheah.

¹⁵Jumonü keoniorübo, thiyunü yungsho münnü yungsho kihümnü thsüala, isanü nüsa thsangyukhi thiyuro ching düküngde zhipang tüsho ramrihang.

¹⁶Kheakü isa Atungpuh Jisu Khrista tüsho isa muzhobuh tüsho amüthsüm hode isa kilim lünnü sühakhim tüsho atsü jihbuhnü,

¹⁷nüsa mulong shukheamshang tüsho rhimo atsü aban tüsho thiyu ching düküngde kamshang.