Read Yimchungru Naga 2 Tesalonika 3 Bible Online

2 Tesalonika 3 - Yimchungru Naga bible

2 Tesalonika 3

¹Akheam ching keoniorübo, isa thsungkheak tamkhüntamnüjang, junangde nüsa lung rhimokhi nangde Atungpuh yu nahnahde abubah tüsho wüntrede akambah,

²tüsho mihbukmuyuk le amütsü mihtsürü kheaknü isa bekhitbah; tümüde alala a akinpü yung.

³Tüshe Atungpuh a thiyuro ah; apinü nüsa düküngshihbah tüsho amütsü chingnü nüsa aheangbah.

⁴Tüsho nüsa dünkheak isanü Atungpuh kheak mulongram lah, junangde isanü thiyukhüm jihkhi nüsanü rhimochoh, tüsho mutuklode arhimobah.

⁵Thrünpuh amuzho tüsho Khrista kheak düküngpü Atungpuhnü nüsa mulongbo khuhlanga huhshang.

⁶Keoniorübo, nüsanü isa kheaknü aleangkhikhi yakli müyande yomuhde alakhi keoniorü kheaknü chamkhibah laang de isa Atungpuh Jisu Khrista mung chingnü nüsa ki thiyukhüm jihchoh.

⁷Künangde isa kheahkhibanü nüsa küdah thsüde mükheahlah; nüsa lung isa lachoki yomuhde alakhi yung,

⁸adün müjihde isanü she yikhap she mütsüh, tüshe nüsa ki hahmülang müjihpü thsüde keaksah khisahde isanü azhing ayin rhimo.

⁹Ju isa alim müla dükhinü yung, tüshe akheahkhishihpü isa rhimo ching nüsa kilim amütsan khülang jihpü thsükheah.

¹⁰Tümüde nüsa lung isa lachoki she, isanü ha yukhüm nüsa kilim jih: “Shepünü rhimo mürhimobanü, api a düyimtsühshih.”

¹¹Tümütüsho nüsa khürü yomuhyothsünkhinü rhimo tümü mürhimode mührü rhimo ching lang arahrungde alakhi isanü sochoh.

¹²Kheakü hadürü mihtsürü ki malande arü rhimo rhimopü tüsho arü rhangdung lapü mulomüthsüpü Atungpuh Jisu Khrista mung chingnü isanü thiyukhüm jihde tuthsukchoh.

¹³Keoniorübo, atsü rhimopü ching dümukhiuk.

¹⁴Isanü ha kihüm ching thakhi anipü khürünü reanglosho, ju mihtsürü kheahyukang tüsho api achih ngüshihpü thsüde api ki tümü düthsü.

¹⁵Tütüshe api kheak thiriri nangde dükheah, tüshe keoniorü nangde tuthsukang.

¹⁶Kheakü mungtsü Atungpuhnü kim tüsho limro alala ching nüsa kilim mungtsü jihshang. Atungpuh nüsa alala lung laang.

¹⁷I Paulnü, ha salüm I khahnü thrütchoh. I yo kihüm aban ching ha amütsan dokhi lah; inü ha ruk thrütchoh.

¹⁸Atungpuh Jisu Khrista amüthsüm nüsa alala lung laang.