Read Yimchungru Naga 1 Timothi 2 Bible Online

1 Timothi 2 - Yimchungru Naga bible

1 Timothi 2

¹Akhuhbe ching inü atuthsukkhi ju mihtsürü alala thsungkheak mushukhi, tamkhüntamnükhi, amushujihkhi, tüsho makshe-jihkhi —

²isanü akinrü thsüde, tüsho wüntre lakhi alala ching akhimahe tüsho mungtsü rhangdung lapü thsüde kiulongthsürübo tüsho thiyukhümsühmüh larü thsungkheak mushujihbeah.

³Ha atsü ah, tüsho isa khümkhitrü Thrünpuh miki aleangkhikhukbe lah,

⁴apinü mihtsürü alala khümkhitpü tüsho thiyuro mükheahde kamshihpü mulongde lah.

⁵Tümüde Thrünpuh khülang, tüsho Thrünpuh le mihtsürü dükeak limburü, mihtsürü Jisu Khrista lah,

⁶apinü kim dükdü ching thiyumütsan jihde mihtsürü alala rhokhitpü anihbuh jih.

⁷Ha thsungkheaknü I thsangyuthsangrarü tüsho amüsüh-thsangyurü, akin tüsho thiyuro ching khiungkerü thsangyurü khülang kamshih. Inü akeangyu yungde, thiyuro thachoh.

⁸Inü dangpung aban ching bukmakhiukde yungsho murukachihde tamkhüntamnü ching amüsüh khahbo shuhkihshihnelah;

⁹inü aliberübo she amürühbe kuyü-züt yungsho sunabo yungsho shotolungbo yungsho amo-achak yungde azhihayihde, adüngakhide tüsho akhamkhinü khimmih yihshihnelah,

¹⁰tüshe atsü rhimode, akinrü liberü kiphahde alabeah.

¹¹Aliberü ju, khülangkinü azhihayihde malankhi chingnü anikhita lubeah.

¹²Inü aliberü sheshe athrürü kurungkheak thsangyupü yungsho thiyukhümsühmüh lapü mümülüjihchoh; anihbe zhikde alabeah.

¹³Tümütüsho akhuhde Adam tüsho jushu Eve thrün;

¹⁴tüsho Adam mümülapyuk, tüshe alibe mülapyuk tüsho athsümünimrü kam.

¹⁵Tütüshe anihbenü azhihayihde akin, amuzho, tüsho amüsühkhi ching mutukzhakde lasho tsührü zübekhi hode aliberü ju akhümkhitbah.