Read Yimchungru Naga 1 Timothi 5 Bible Online

1 Timothi 5 - Yimchungru Naga bible

1 Timothi 5

¹Azobuhrü mihtsürü düthürüh, tüshe buhrü nangde nünü api ki tuthsukang; akheamrü mihtsürübo ki niurübo nangde,

²azoberübo ki berübo nangde, akheamrü aliberübo ki niurübo nangde, alala atsangkhitkhi ching rhimoang.

³Atsütsü langzü larü khimoberü ki wüntre jihang.

⁴Khimoberü ju tsührübo yungsho tsührü tsührübo lasho, akhuhde yambuk thsungkheak akin rhimo arünü anikhitshang, tüsho arü bebuhrü kilim tümüanü jihloshang, tümüde ha Thrünpuh asühbe lah.

⁵Alibe shepü atsütsü khimoberü la, tüsho langzü lanü, anihbenü Thrünpuh kheak mulonglam zoshang tüsho azhing ayin mutukzhakde mushude tamkhüntamnüshang;

⁶tüshe khimoberü shepünü shih reangkeampü ching jihchonü anihbe arhang lalashe ashekhi lah.

⁷Ha thiyukhüm jihang, junangde arübo amülim mülade alabah.

⁸Khürünü nihbuh buhtsührü khung mükümsho, apinü akin thsunglochoh tüsho amükinrü kheaknü amütsübe ah.

⁹Khimoberü ju kam 60 azorü akumung, niubuhrü khülang ki thiyuro larü yungsho khimoberü bolung kheyukpü mukuk;

¹⁰tüsho anihbenü khungarü mütrümusukhi, hanrü mürühkhi, amüsührü jing müsühjihkhi, küpkhuk ching larü rungkhi tüsho atsü rhimobo alala ching shuhmülanga jihkhi tsüde amükheahkhi labeah.

¹¹Tüshe anüphulung khimoberü a dükheyuk; küyimki arü shihkünde akambanü Khrista azhihde arhanglopü mulongde kamchoh,

¹²junangde arü akhuhbe thiyuchihchimkhi thsümünimde abahyukkhi kamchoh.

¹³Kheaküshe arünü yomuhyothsünpü, yamrümpü, jipjiprarapü tüsho arünü amüthabe thade arahrungpü anikhita luchoh.

¹⁴Jumonü inü alümkhia anüphulung khimoberü a rhangbah tsührü lade, arü yambuk tsangshubeah, tüsho isa riri kilim isa azhihpü kim müjihbeah.

¹⁵Tümüde khürüa amünean dunglim tsoabahdo.

¹⁶Akinrü liberü khürü betsührü khimoberübo lasho, anihbenü arü rungshang; borü kilim hahmülang düjih, junangde atsütsü khimoberübo rungkhukbah.

¹⁷Azothsürü sherünü tsüde yakzan shuhcho, adungto thsüde thsangyuthsangra tüsho thsangyupü ching khisahrü alü wüntrepü thülünkhi thsüshang;

¹⁸tümüde amüsühyunü thachoh, “Nünü moshipung hi nitchoki amün dürümdojih,” tüsho “Rhimorü a api mihkhah dün ngüpü thülünlah.”

¹⁹Mahne yungsho mahsamnü thiyumütsan thsüde hande arükhi yungsho azothsürü azhihde amülim jihkhi düleangkhi.

²⁰Sherünü neak yihbeakchonü boto mikinü thürühang, junangde aninga larübonü atrekhi ching zhipbah.

²¹Thrünpuh tüsho Jisu Khrista le amokhitkhi yunirübo mikinü mulong müyütde, jakkheahkhi mürhimopü thsüde ha yuzüngbo anipü inü nü ki tuthsukchoh.

²²Khah nimkihpü ching düniokheam, yungsho püpürü neak ching düberung; nü tsangkhitde zoang.

²³Kheakü ke müthsün düyung, tüshe nü buk mütsükhi tüsho kheakü kheakü tukthsükhi hode kurungaso ke anüknük yungang.

²⁴Mihtsürü khürü neakbo a nahde mütsanchoh, tüsho mahkhap müngühnü yüchoh; tüshe püpürü neakbo a ashulim lang ngüchoh.

²⁵Junangde rhimo atsü nahde mütsanchoh; tüsho amütsübo she mümüyimkhuk.