Read Yimchungru Naga 2 Timothi 1 Bible Online

2 Timothi 1 - Yimchungru Naga bible

2 Timothi 1

¹Jisu Khrista ching lakhi alokhikhi rhangdung yande Thrünpuh lümkhi hode Jisu Khrista amüsüh-thsangyurü Paul kilimnü,

²Inü muzhokhi I tsührü Timothi kilim: Abuh Thrünpuh tüsho isa Atungpuh Jisu Khrista kilimnü amüthsüm, mihmuzho tüsho mungtsü lashang.

³Küyimki inü I tamkhüntamnü ching azhing ayin nü lümkhitbanü, I buh pürünü arhimokhi nangde I lümkhi amüsühnü atankihkhi Thrünpuh ki inü makshe jihchoh.

⁴Inü nü chikebo lümkhitchoki nü shorupü künde kamchoh, junangde I asühkhinü mide akambah.

⁵Nü ji Lois tüsho nü be Euni büne akin nangde nü akin düküngde alakhi inü lümkhitchoh, tüsho kheakü nü kheak lah de inü kinlah.

⁶Jumonü I khahbo nimkihkhi hode nü kheak lakhi Thrünpuh thsambah takkihloang de inü nü ki thalochoh;

⁷tümüde Thrünpuhnü isa kilim trechihtrean me jihkhi yung tüshe wu, amuzho tüsho zangrü danyukkhi me ah.

⁸Isa Atungpuh, yungsho api yo aramrü I dünkheak thiyumütsan thsüpü dachih, tüshe Thrünpuh wu ching thiyusheak-atsü thsungkheak thsünüpü ching shihcham luang,

⁹shepünü isa khümkhit, tüsho amüsüh jikhi ching isa jikhea, isa rhimobo dünkheaknü yung, tüshe api lümkhi tüsho adüso kambo ching Jisu Khrista hode apinü isa kilim jihkhi amüthsüm dünkheaknü,

¹⁰tüsho kheakü isa khümkhitrü Jisu Khrista arükhi hode isa ki amikheak akhiuk. Apinü ashepü akheam thsüshih tüsho thiyusheak-atsü hode müshepü rhangdung amikheak akhiuk.

¹¹Ha thiyusheak-atsü thsungkheak I ju thsangyuthsangrarü, amüsüh-thsangyurü tüsho thsangyurü mokhit,

¹²jumonü harü dünkheaknü I thsünüchoh tüshe inü machih tümüde shepü kheak inü akinkheanü inü mükheahlah, tüsho api ki thiyikhi nimung khiungde apinü aheangpü kukbah de inü mütsanlah.

¹³Jisu Khrista kheak lakhi akin tüsho amuzho ching nünü I kheaknü asokhi thiyuro yubo yanang;

¹⁴isa kheak lakhi Amüsüh Me hode nü ki thiyikhi thiyuro aheangang.

¹⁵Asia ching larü alala I kheaknü rholode tsoabahdo de nünü mükheahlah, tüsho arü bolung Phygela tüsho Hermogenea belah.

¹⁶I alochode reangzahshihkhi thsungkheak Onesiphora yamkhün kilim Thrünpuhnü mihmüthsüm jihshang; I rihyam ching lakhi apinü machih,

¹⁷tüshe küyimki api Rom khiungkheanü apinü künsahde I yim tüsho I ngü.

¹⁸Ju nimung Atungpuh kilimnü mihmüthsüm apinü angüpü Atungpuhnü mülüshang! Efisia ching apinü I rungde arhimokhi alala nünü mükheahlah.