Read Yimchungru Naga Philemon 1 Bible Online

Philemon 1 - Yimchungru Naga bible

Philemon 1

¹I Paul, Jisu Khrista dünkheaknü aramrü, tüsho isa keoniorü Timothi kilimnü, Isa rukhüh rhimorü amuzho Philemon

²tüsho isa keoniorü Applia, isa müyamrü bonungrü Arkipa, tüsho nüsa yam ching lakhi borü kilim:

³Isa Abuh Thrünpuh tüsho Atungpuh Jisu Khrista kilimnü nüsa kilim amüthsüm tüsho mungtsü lashang.

⁴Küyimki inü I tamkhüntamnü ching nü lümkhitbanü kamruhroro I Thrünpuh kilim makshe jihchoh,

⁵tümütüsho Atungpuh Jisu tüsho akinrü alala kilim nü amuzho tüsho akin lakhi inü sochoh,

⁶tüsho nü akin chamachihkhinü Khrista ching lakhi isa mükheahmudu atsü alala zokihshihpü inü tamkhüntamnüchoh.

⁷Keoniorü, inü nü muzho chingnü khide asühpü tüsho mulong shukheam ngüdo, tümütüsho nüsa hode akinrübo mulong rhüngrhüngde kamloshihdo.

⁸Jumonü nünü arhimopü lakhi Khrista ching inü nü ki mulong tode tüsho thiyukhüm jihpü thsüa lalashe,

⁹amuzho chingnü inü nü ki mushuchoh. I Paul, Jisu Khrista limburü tüsho kheakü aramrü —

¹⁰I rihyam ching lachoki I tsührü kamkhi Onesima dünkheak inü nü ki mushuchoh.

¹¹Akhuhlim a nü ki yihnüpü mülade lado, tüshe kheakü nü tüsho I ki yihnüpü kamdo.

¹²Inü api lung I mulonglam bede nü kilim thiyia arüloshihchoh.

¹³Thiyusheakatsü dünkheak I rihyam ching lachoki apinü I rungshihpü thsüde I lung lashihpü lümkheah;

¹⁴tüshe nünü mulongkhi ju reangkihde yung tüshe nü zuzu lümkhi hode alapü thsüde nünü mümülüde inü tümü mürhimo.

¹⁵Khükijua, api lünnü beloa lupü thsüde api nü kheaknü anükhühkheak chamkhia lah khunuh,

¹⁶kheaküa azhorü yung tüshe azhorü kheaknü alübe, adungto thsüde I ki amuzhokhi keoniorü lah tüshe shih tüsho Atungpuh lung nü ki küdükhüh laba.

¹⁷Jumonü nünü I ju nü atrurü ah de lümsho, nünü I leangkhipü lakhi nangde api leangkhiang.

¹⁸Apinü nü ki amülim thsüa lasho, yungsho tümükhüh zünglasho ju I kheak züngkihjang.

¹⁹I Paul, I khahnü ha thrütchoh, inü ashaklobah — nünü I kilim, nü jihpü lakhi she inü tümü müthachoh.

²⁰Am, keoniorü, Atungpuh lung inü nü kilimnü alü thsükhi khürü lunelah. Khrista ching I mulong rhüngrhüngshang.

²¹Nü mihyuanikhi mulongram lade, inü athakhi kheaknü she nünü alü rhimobah de mükheahbah inü nü kilim thrütchoh.

²²Kheaküshe, I thsungkheak khiungshak thsakhamang, tümüde nü tamkhüntamnü hode nü kilim arülopü inü mulonglam lah.

²³Jisu Khrista ching I lung rukhüh aramrü Epaphranü nü kilim salüm mühahchoh,

²⁴Tüsho I lung rhimorü Mark, Aristarka, Dema, tüsho Luknü she ah.

²⁵Atungpuh Jisu Khrista amüthsüm nü me lung laang.