Read Yimchungru Naga Ibri 1 Bible Online

Ibri 1 - Yimchungru Naga bible

Ibri 1

¹Adüso kim tüsho limro ahihdo chingnü wukihrübo hode Thrünpuhnü isa jipürü ki asuk;

²tüshe harü akheam nimungbo ching a api hode alomi thrünbah alala yamrüplurüp lubuh kamshihkhi atsührü hode isa ki asuk.

³Atsührü ju Thrünpuh müretah tahkihlokhi tüsho wulakhi api yu hode lüpdükhi lashihde, dükde api mihtsürüpang huhkhi lah. Apinü neak tsangkhitpü jih dunglim yinmi ching wüntremüretah khah tsülim bin.

⁴Jumonü arü kheaknü mung atobe yamrüplurüp lukhi nangde yunirübo kheaknü api atobe kam.

⁵Tümüde Thrünpuhnü yunirü she ki she ha ruk mütha, “Nü I tsührü ah, khihni I nü Buh kamdo.” Yungsho kheaküshe, “I api Abuh thsübah, tüsho api I tsührü thsübah.”

⁶Tüsho kheaküshe apinü adüjibuh ha lomi ching bede arüchoki tha, “Thrünpuh yunirübo alalanü api kingaünshang.”

⁷Yunirübo dünkheak apinü tha, “Shepünü api yunirübo apungbo, tüsho api yamlarübo motrubo thsücho.”

⁸Tüshe atsührü dünkheak apinü tha, “O Thrünpuh, nü kiulongthsü lünnü lün labah, tüsho thiyuro-lungki tso ju nü kiulongthsü tso lah.

⁹Nünü thiyuro-lungki muzhodo tüsho amülim thraneando; jumonü nü Thrünpuhnü nü müyamrübo kheaknü alü thsüde asühkhi müdangkenü nü mujujihdo.”

¹⁰Apinü tha, “Nü Atungpuhnü atankih ching alomi thrün, tüsho thüningbo ju nü khah rhimobo lah;

¹¹arü adükheakbah, tüshe nü a aninga labah; khimmih nangde arü alala amürhütbah,

¹²khimniuniu nangde nünü arü khiua zobah, tüsho khimmih nangde arü amüthribah. Tüshe nü a rukhüh lang lah, tüsho nü kambo küyimkishe mükheam.”

¹³Tüshe Thrünpuhnü yunirü ki küyimkishe mütha, “Inü nü riribo nü jing jungpung mükamshihyi khiungde I khah tsülim binang.”

¹⁴Arü alala ju akhümkhit yamrüplurüp lurü tankihrü thsüde tankihpü mebo thiyikhi yung de?