Read Yimchungru Naga Ibri 5 Bible Online

Ibri 5 - Yimchungru Naga bible

Ibri 5

¹Achangbe amükeamrü aban nihbuh mihtsürü bolungnü arü thsung thsüde Thrünpuh tankihde, neakbo dünkheak shuhmülanga jihkhibo tüsho kingaünkhibo jihpü mokhitchoh.

²Apinü tümü yak mümükheahrü tüsho atsophülaprü ki aphuayaknü arhimopü kuklah, tümütüsho api she reangmüzahkhi bukkhüp lah.

³Jumonü apinü anihbuh neakbo le mihtsürübo neak dünkheak shuhmülanga jihpü kamchoh.

⁴Shenü she nihbuh küdahnü wüntre muluchoh; Aron nangde api ju Thrünpuhnü jia labeah.

⁵Junangde Khrista she achangbe amükeamrü thsüpü nihbuh küdahnü ashuhkihkhi yung, tüshe Thrünpuhnü api ki tha, “Nü I tsührü ah, khihni I nü Buh kamdo.”

⁶Kheaküshe apinü dang püpü ching tha, “Melkizedek kiphahde, nü a lün thsungkheak amükeamrü ah.”

⁷Jisunü api rhangdung lachoki achangnü zhide tüsho chike bukde api khümkhitkhukpü labuh ki tamkhüntamnüde amushukhibo lakheah, tüsho apinü wüntre lade amushukhinü api ki sojih.

⁸Api ju atsührü thsüa lalashe, apinü thsünükhi hode mihyuanipü mükheah;

⁹tüsho khiukdahkhi kamde api ju anihbuh ki mihyuanirü alala yo lünnü akhümkhit limro kam,

¹⁰tüsho Melkizedek kiphahde achangbe amükeamrü thsüpü Thrünpuhnü jia zojih.

¹¹Ha dünkheak isanü hihde athapü lah, tüshe nüsanü nahnah manikhitkhinü athanakpü chaklah.

¹²Kheakü hadükia nüsa ju thsangyurü thsübe laa lalashe, kheaküshe Thrünpuh yu thiyuro adungtobe nüsa ki thsangyupü thsüde khürü yihnüpü lah. Tsühyungbe amüküp yungde niuhke nüsa yihnüpü lah;

¹³tümüde shepü niuhke kheaknü rhangdung lanü thiyurolungki yu ching ayeanzo yung, tümüde api khungarü ah.

¹⁴Tüshe tsühyungbe amüküp ju azorü thsungkheak ah, tümüde sherünü athsükhukpü lanü amütsü chingnü atsü mütsankhitpü rhimoakheahde yeanzamdo.