Read Yimchungru Naga Ibri 6 Bible Online

Ibri 6 - Yimchungru Naga bible

Ibri 6

¹Jumonü isanü Khrista dünkheak akhuhbe thsangyukhi bahbah, ashekhi rhimo chingnü mulong müthrikhi tüsho Thrünpuh kinkhi khimtan müthsülode azorü kamde yüanü;

²baptikhi tüsho khah nimkihkhi, asherü arhang kamlokhi tüsho lünnü thiyukhap dünkheak thsangyukhi.

³Tüsho Thrünpuhnü mülüjihsho isanü ha rhimobah.

⁴Tümüde khülangki mulong müthribah, yinmi thsambah tsahkeakheahkhi, tüsho Amüsüh Me ching shihcham lurü thsungkheaknü amukukkhi lah;

⁵arünü Thrünpuh yu atsü tüsho arübe lün wubo tsahkeakheahdo,

⁶jumonü arünü chamkhide tsosho, arü mulong rholokhi ching belodarüpü mukuk, tümütüsho arünü kheaküshe Thrünpuh tsührü yümkihlochoh tüsho boto ki mungchih kipchoh.

⁷Alo küpünü tsüng alochode akeamkhi yungabahcho, tüsho thulu thsürü kilim yihnübe wokephüyak akhiukshihchonü, Thrünpuh kilimnü müngüh mühi leangkhichoh.

⁸Tüshe ayangbo le thrümthrukbebo mukhuhsho, ju yihnüpü mülakhi tüsho muthrua bahpü thüninde lah; akheam ching a ju takabahpü lah.

⁹Amuzho müyamrübo, isanü hanangde thaa lalashe, nüsa akhümkhit müngühmühi atsübe lakhi nüsa dünkheak mulongram lah.

¹⁰Thrünpuh ju mulungkirü yung; apinü nü rhimo, api mihtsürü rungkhi tüsho mutukzhakde arü rungkhinü api ki amuzho huhkhi mihamübah.

¹¹Nüsa mulonglam mütsanpü thsüde, nüsa mihbüm abannü ha ruk düshihde akheam khiungde huhshihnelah,

¹²junangde nüsa sühdukde mükam, tüshe akin tüsho arümkheam hode alokhikhi yamrüplurüp lurü kheahkhirü thsübah.

¹³Küyimki Thrünpuhnü Abraham ki thiyuchihchim thsükhea, apinü thiyuchihchimpü thsüde atobe mülakhinü aküdah thsüde thiyuchihchim thsü,

¹⁴“Atsütsü inü nü müngühjihbah tüsho wüh bushihbah.”

¹⁵Hanangde arümde aleang dunglim alokhikhi ju Abrahamnü leangkhi.

¹⁶Mihtsürübonü arü kheaknü atobe hode thiyuchihchim thsüchoh, tüsho arü atsangachih alala ching adüngakhi thsungkheak thiyuchihchim ju arün lah.

¹⁷Tümütüsho Thrünpuhnü alokhia lakhi, yamrüplurüp lurü ki mümüthrikhi api lümkhi khide mütsande ahuhpü mulongkhinü, apinü ju thiyuchihchimnü adüngakhi thsüdo,

¹⁸junangde Thrünpuhnü akeangyu müthakhukbe, mümüthrikhukpü mungji mahne hode isa kilim jihkhi mulonglam kheak ramrihpü isa shande ayürü khide mulong toshihbah.

¹⁹Isa ha mulonglam me thsungkheaknü, atholobe adüküng tüsho mulong tokhi lah. Ha alungbe arüngakopung ching zhindokhim dunglim yüzahchoh.

²⁰Isa thsung thsüde Jisunü isa müngühnü ju ching yüzah. Melkizedek kiphahde lün thsungkheaknü api achangbe amükeamrü kam.